ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް އެމްޑީޕީގެ ކެންޑިޑޭޓްގެ ހަައިސިއްޔަތުން ކުރައްވާ ކެމްޕެއިންގައި ރައީސް އިބްރާހީމް މުހައްމަދު ސޯލިހު މިރޭ ލ. ގަމަށް ވަރުގަދަ ތަސައްވުރެެއް ކުރައްސަވައި، ވާދަވެރިންގެ ކެމްޕެއިނަށް ފާޑު ވިދާޅުވެއްޖެ އެވެ.
ތ. އަތޮޅުގެ ރަށްތަކަށް ފަހު މިއަދު ހަވީރު ގަމަށް ވަޑައިގެން މިރޭ ބޭއްވެވި ޖަލްސާގައި ރައީސް ވިދާޅުވީ ގަމާއި ފޮނަދޫ އެކުގައި އާބަން ސެންޓަރަކަށް ބަދަލުކުރުމަށް ޓަކައި މި ފަސް އަހަރުގެ ތެރޭގައި ވެސް ބޮޑެތި މަސައްކަތްތަކެއް ކުރަން ސަރުކާރުން ޕްލޭންކުރި ކަމަށެވެ. އެހެން ނަމަވެސް ބައެއް މަަސައްކަތްތައް ލަސްވެއްޖެކަން ގަބޫލުކުރައްވާ ކަމަށާއި އެގޮތަށް ދިމާވި އެއް ސަބަބަކީ ކޮވިޑް-19 ގެ ބަލިމަޑުކަމުގެ ސަބަބުން އިގުތިސާދަށް ކުރިމަތިވި މައްސަލަ ކަމަށް ވެސް އެމަނިކުފާނު ވިދާޅުވި އެވެ. ގަން ހިމެނޭ ގޮތުން ރާއްޖޭގެ ބޮޑެތި ރަށްތައް ތަރައްގީކުރަން ހިންގަން ޖެހިފައި އޮތީ ބޮޑެތި ބިޔަ މަޝްރޫއުތައް ކަމަށާއި އެކަން ކަމަށް ފައިސާ ހޯދުމާއި ޕްލޭން ކުރަން ކުޑަކޮށް ދަތިވި ކަމަށް ވެސް ވިދާޅުވި އެވެ.
"އެހެން ނަމަވެސް އަޅުގަނޑުމެންގެ ޕްލޭނަކަށް ބަދަލެއް ނާދޭ. އަޅުގަނޑުމެންގެ އަމާޒަކީ މި ގަން މިއީ އާބަން ސެންޓަރެއްގެ ގޮތުގައި ޑިވެލޮޕްކުރުން. އެގޮތުން ބޭނުންވާ ވަސީލަތްތައް މިތަނުގައި ޑިވެލޮޕްކުރުން. އަަޅުގަނޑުމެންގެ އަމާޒަކީ މިތަން 10 އަހަރު ތެރޭގައި، ކުރިއަށް މި އޮތް 10 އަހަރު ތެރޭގައި 25،000 މީހުންގެ އާބާދީއަކަށް ބަދަލުކުރުން،" ރައީސް ވިދާޅުވި އެވެ.
އެމްޑީޕީން ލ.ގަމުގައި މިރޭ ބޭއްވި ޖަލްސާ.ފޮޓޯ:މިރާން ނާޝިމް/އަދަދު
ރައީސް ވިދާޅުވި ގޮތުގައި އެވަރުގެ އާބާދީއެއް ގަމަށް ގެންނާނީ މަޖުބޫރުކޮށްގެނެއް ނޫނެވެ. އޭގެ ބަދަލުގައި ބޯހިޔާވަހިކަމާއި ސިއްހީ ހިދުމަތާއި ތައުލީމު އަދި ދަތުރުފަތުރުގެ ނިޒާމަށް ގެންނަ ބަދަލުތަކުން މީހުން ގަމަށް އަންނާނެ ކަމަށް އެމަނިކުފާނު ތަސައްވުރުކުރެއްވި އެވެ.
"ކުރަން ޖެހޭނެ ކަމަކީ މީހުން ޝައުގުވެރިވާނެ ކަހަލަ ކަންތައްތައް، ހިޖުރަކުރާނެ ކަހަލަ ކަންތައްތައް މިތަނުގައި ޑިވެލޮޕްކުރުން،" ރައީސް ސޯލިހު ވިދާޅުވި އެެވެ.
ގަމަށް މީހުން ޝައުގުވެރިކުރުވުމަށް ޓަކައި އެންމެ ފުރަތަމަ ކުރަން ޖެހޭ ކަމަކީ އެމަނިކުފާނު ވިދާޅުވި ގޮތުގައި ބޯހިޔާވަހިކަން ފޯރުކޮށްދިނުމެވެ. އެގޮތުން ހިންގާ ފުރަތަމަ މަޝްރޫއުގައި މި އަންނަ އަހަރު ގަމުގައި 1،000 ހައުސިން ޔުނިޓް އަޅައިދޭން އެމަނިކުފާނު ވައުދުވެވަޑައިގެންނެވި އެވެ.
"މުޅި އަމާޒަކީ 5،000 ހައުސިން ޔުނިޓް މިތަނުގައި އަޅައިދިނުން،" އެމަނިކުފާނު ވިދާޅުވި އެވެ.
ގަން ހޮސްޕިޓަލް ޓާޝަރީ ހޮސްޕިޓަލަކަށް ބަދަލުކުރުމުގެ މަސައްކަތް ކުރިއަށް އެބަ ދާކަމަށާއި ކެންސަރް ހޮސްޕިޓަލްގެ މަސައްކަތް ވެސް ކުރިން ޕްލޭންކޮށްފައިވާ ގޮތަށް ކުރިއަށް ގެންދަވާނެ ކަަމަށް ވެސް ވިދާޅުވި އެވެ.
"ވާދަވެރިންގެ ކެމްޕެއިން އަދިވެސް ރަނގަޅަށް ނުފެށޭ"
ރިޔާސީ އިންތިހާބުގައި ވާދަކުރައްވާ އެހެން ކެންޑިޑޭޓުން ކެމްޕެއިން ކުރިއަށް ގެންދާ ގޮތަށް ފާޑު ވިދާޅުވެ، މިރޭގެ ޖަލްސާގައި ރައީސް ސިފަކުރެއްވި ގޮތުގައި އެމަނިކުފާނު ކުރައްވަނީ "ކޫލް ކެމްޕެއިން" އެކެވެ. އެހެން ކެންޑިޑޭޓުން އެމަނިކުފާނާ ހިސާބަށް އަންނަން އަދި ހަތަރު ފަސް ހަގުތާ ނަގާނެ ކަމަށް ލަފާކުރެއްވޭ ކަމަށް ވެސް އެމަނިކުފާނު ވިދާޅުވި އެވެ.
"އޭރަށް އޮންނާނީ އިންތިހާބު ނިމިފައި، އެބޭފުޅުން ރަނގަޅަށް ކެމްޕެއިން ފަށާއިރު. ނަތީޖާ އިއުލާނުކޮށްފައި އޮންނާނީ. އޭރަށް ދެން އެބޭފުޅުން މަސައްކަތްކުރައްވާނީ 2028 ގެ އިންތިހާބަށް،" ރައީސް ވިދާޅުވި އެވެ.
ރައީސް މިމޭރުމުން ވާހަކަފުޅު ދެއްކެވި އިރު އެމަނިކުފާނާ އެންމެ ކައިރިން ވާދަކުރައްވާނެ ކަމަށް ބެލެވޭ ޕީއެންސީގެ ކެންޑިޑޭޓް ޑރ.މުހައްމަދު މުއިއްޒު ވެސް ގެންދަވަނީ ގިނަ އަތޮޅުތަަކަށް ވަަޑައިގެން ފުޅާ ދާއިރާއެއްގައި ކެމްޕެއިންކުރައްވަމުންނެވެ. އެމަނިކުފާނުގެ ކުރީގެ އެކުވެރިޔާ، ރައްުޔިތުންގެ މަޖިލީހުގެ ރައީސް މުހައްމަދު ނަޝީދުގެ ދަ ޑިމޮކްރެޓްސް ޕާޓީން ވެސް އަންނަނީ އެފަދަ ކެމްޕެއިނެއް ކުރަމުންނެވެ.
