ސެޕްޓެމްބަރު 9, ގައި ބާއްވާ ރިޔާސީ އިންތިހާބުގެ ކެމްޕޭނުގައި އެމްޑީޕީގެ ރިޔާސީ ކެންޑިޑޭޓް, ރައީސް އިބްރާހިމް މުހައްމަދު ސޯލިހު މިހާތަނަށް ދަތުރުކުރެއްވި 100 އަށް ވުރެ ގިނަ ރަށުން ވެސް ފެނިގެން ދިޔައީ އެމަނިކުފާނަށް އޮތް ތާއީދެވެ. އެހެން ނަމަވެސް, ރަށްރަށުގެ ކުދި ބޮޑު ގިނަ ބަޔަކު ނިކުމެ މަރުހަބާގެ ސަފަށް އެ އެތުރިލަނީކީ އެއްވެސް "ކަންބޮޑުވުމެއް" ނެތި އެއް ނޫނެވެ.
ފަސް އަހަރު ވެރިކަން ކުރެއްވުމަށްފަހު ރައީސް ދެ ވަނަ ދައުރަކަށް ކުރިމަތިލައްވާއިރު, ފާހަގަކުރެވޭ އެއް ކަމަކީ ރާއްޖޭގެ ކޮންމެ ރަށެއްގައި ވެސް ގިނަ މަޝްރޫއުތަކެއް ފެށިފައި ހުރުމެވެ. ރައްޔިތުންނަށް ބޭނުންވާ މުހިންމު ކަންކަން ފެށި, ނިމޭނެ ކޮޅެއް ނުފެނި ހުރުމަކީ މި ތ. އަތޮޅުގެ ރައްޔިތުންގެ ވެސް ހިތުގެ އުދާސްތަކެވެ. ނަމަވެސް މިއަދު މަރުހަބާގެ ސަފަށް ނިކުމެ އެތިބީ އެ އުދާސްތަކަށް ރައީސް ސޯލިހު ތަސައްލީއެއް ގެނެސްދެއްވާނެ ކަމުގެ އުއްމީދުގަ އެވެ.
އެމްޑީޕީން ކޮޅުމަޑުލަށް ކަނޑައެޅި ކޯޑިނޭޓަރު އަހުމަދު ސައީދު މުހައްމަދު ދެކެވަޑައިގެންނެވި ގޮތުގައި ތ. އަތޮޅުގެ ރައްޔިތުންގެ އެއްވެސް ކަންބޮޑުވުމެއް ނެތެވެ. އޭނާ ވިދާޅުވި ގޮތުގައި ގޯސް އޮތީ ކަންބޮޑުވުން މާނަ ކުރުމުގަ އެވެ.
"ހަގީގަތަކީ އެއްވެސް ކަންބޮޑުވުމެއް ނޯންނާނެ. އަޅުގަނޑު ކަންބޮޑުވުން މާނަ ކުރާ ގޮތަކީ ރައްޔިތުންނަށް ތަކުލީފުތަކެއް ހުރެ, އެކަމަށް ހައްލު ނުލިބުން،" ސައީދު ވިދާޅުވި އެވެ.
ސައީދު ވިދާޅުވި ގޮތުގައި, ރަށްރަށުގައި ފަށައި, ނުނިމި ހުރި މަޝްރޫއުތަކަކީ އެއީ މި ސަރުކާރުން ފައްޓާފައިވާ މަޝްރޫއުތަކެވެ. އެ މަސައްކަތް ނިންމާނީވެސް މި ސަރުކާރުން ކަމަށް ސައީދު ވިދާޅުވި އެވެ.
ރިޔާސީ އިންތިހާބުގެ ކެމްޕޭނުގައި ރައީސް ތ އަތޮޅަށް ވަޑައިގެންނެވުން -- ފޮޓޯ: މިރާން/ އަދަދު
ފެނަކަ ކޯޕަރޭޝަނުގެ މެނޭޖިން ޑިރެކްޓަރު ކަން ވެސް ކުރައްވާ ސައީދު ވިދާޅުވީ, ކޮވިޑަށްފަހު ލިބުނު ކުޑަ ވަގުތުކޮޅުގައި, މި ސަރުކާރުން ވެފައިވާ ވައުދުތަކާއި, ފަށާފައިވާ މަޝްރޫއުތައް ބާރަށް ކުރިއަށް ދާ ކަމަށެވެ. އެ މޭރުމުން ވާހަކަ ދައްކަވަމުން އޭނާ ވަނީ, ދުނިޔޭގެ އިގްތިސޯދަށް އައި ލޮޅުމާއެކު ވެސް މަޝްރޫއުތައް ކުރިއަށް ދާކަން ފާހަގަކުރައްވާފަ އެވެ.
"ކަންބޮޑުވުމެއް އޮންނާނީ ރައްޔިތުންނަށް ތަކުލީފުތަކެއް ލިބި, އެ ތަކުލީފުތަކުން ސަލާމަތް ނުވާ ކަމަށް ވަންޏާ. މިސާލަކަށް ސިއްހީ މަރުކަޒުގައި އެމްބިއުލާންސެއް ނެތުން, އެތާނގަ ޑޮކްޓަރެއް ނެތުން, ސްކޫލުގައި ކިޔަވައި ދޭނެ ޓީޗަރެއް ނެތުން. އިރުއިރުކޮޅާ ކަރަންޓު ކެނޑުން،" ސައީދު ވިދާޅުވި އެވެ.
އޭނާ ދެކެވަޑައިގަންނަވާ ގޮތުގައި, މަގު ހަދަން ފެއްޓިފައި, ސްކޫލުގައި އިމާރަތެއް އަޅަން ފެއްޓިފައި ކުޑަކޮށް ލަސްވުމަކީ އެއީ ކަންބޮޑުވުމެއް ނޫނެވެ.
"އަޅުގަނޑުމެން ބޭނުންވޭ ކަންކަން އަވަހަށް ނިންމުމަށް, ނިންމުމަށް ކުޑަ ކުޑަ ޑިލޭތަކެއް އައުމަކީ އެއްވެސް ހާލެއްގައި ކަންބޮޑުވުން ކަމަކަށް އަޅުގަނޑެއް ގަބޫލެއް ނުކުރަން. އެ ބާވަތުގެ ކަންކަމަށް އަޅުގަނޑު ބޭނުންކުރާ ބަހެއް ނޫން ކަންބޮޑުވުމަކީ،" އޭނާ ވިދާޅުވި އެވެ.
ރިޔާސީ އިންތިހާބުގެ ކެމްޕޭނުގައި ރައީސް ތ އަތޮޅަށް ވަޑައިގެންނެވުން -- ފޮޓޯ: މިރާން/ އަދަދު
ސައީދު މިހެން ވިދާޅުވިއިރު, ތ. އަތޮޅު ރައްޔިތުންގެ މައިގަނޑު ކަންބޮޑުވުންތަކުގެ ތެރޭގައި ހިމެނެނީ, ކުރިން ވައުދުވެފައިވާ އެއާޕޯޓާއި ހޮސްޕިޓަލް އަދި ކޯޒްވޭ އެޅުން ފަދަ މަޝްރޫއުތައް ޕްލޭނަށްވުރެ ލަސްވުމެވެ. ކޮންމެ ރަށެއްގައި ވެސް ގިނަ އަދަދެއްގެ މަޝްރޫއުތަކެއް ފެށިފައި ހުރިއިރު, މިހާތަނަށް އެއްކޮށް ނިންމާލެވިފައިވާ މަޝްރޫއުތައް މަދެވެ.
ތޭރަ ރަށެއްގެ މައްޗަށް އެކުލެވިފައިވާ ތ އަތޮޅުގެ ކުދި އާބާދީތަކަށް ރައީސް ސޯލިހު ވަނީ ގިނަ ވައުދުތަކެއް ވެވަޑައިގެންފަ އެވެ. އޭގެ ތެރެއިން ކިތަންމެ ކުޑަ މިންވަރެއް ފުއްދުނު ނަމަވެސް އެ އަތޮޅު ރައްޔިތުން ދެކޭ ގޮތުގައި, މީގެ ކުރިން އެރަށްތަކަށް އެވަރުވެސް ނުވެ އެވެ. އެހެންކަމުން ދެން ހުރި މަޝްރޫއުތައް ނިންމަވާ ދެއްވާނެ ކަމުގެ ޔަގީންކަން އެ ރައްޔިތުންނަށް އެބަ އޮތެވެ.
"ދެންމެ އައި ގާދިއްފުށީގައި އިސްކޮށް ތިއްބެވި ބޭފުޅުން އެ ވިދާޅުވީ ރައީސްގެ އެއްވެސް ވައުދެއް ނުފުދިއެއް ނެތޭ. ދެން ދަތުރުކުރި ރަށްރަށުން ވެސް އެ ބުނަނީ ހަމަ އެހެން،" ތ. އަތޮޅުގެ ފަހު މަންޒިލް ކަމަށްވާ މަޑިފުށީގައި ހުންނަވައިގެން ސައީދު ވިދާޅުވި އެވެ.
ތ. އަތޮޅުގެ ކޯޑިނޭޓަރުގެ ހައިސިއްޔަތުން ސައީދު ވިދާޅުވި ގޮތުގައި އެ އަތޮޅުގެ ކޮންމެ ރަށަކުން ވެސް ރައީސް އެއްބުރުން ހޮވުމަށްޓަކައި މެޖޯރިޓީ ނެގޭނެ އެވެ. އޭނާ ސިފަ ކުރެއްވި ގޮތުގައި ގިނަ ރަށްރަށުން ތިބީ ރައީސް ސޯލިހް ދެ ވަނަ ދައުރަކަށް ހޮވުމަށް ކެތް މަދުވެފަ އެވެ.
