ރައްޔިތުންގެ މަޖިލީހުގެ މިއަހަރުގެ ތިން ވަނަ ދައުރުގެ ތިން ވަނަ ޖަލްސާ މިއަދަށް ތާވަލުކުރި ނަމަވެސް 13 މެމްބަރަކު ފިޔަވައި އެހެން މެމްބަރުން ވަޑައިނުގެންނެވުމުން އެ ޖަލްސާ ނުބޭއްވުނެވެ.
މަޖިލީހުގައި ޖުމްލަ 87 މެމްބަރުން ތިއްބަވާ އިރު ޖަލްސާއެއްގެ ކޯރަމް ހަމަވަނީ 22 މެމްބަރުން ވަޑައިގެންނެވުމުންނެވެ.
ވެރިކަން ކުރާ ކޯލިޝަނުގެ މައިޕާޓީ އެމްޑީޕީގެ މެޖޯރިޓީ އޮންނަ މަޖިލީހުގެ މަސައްކަތްތައް މިއަހަރުގެ ދެވަނަ ދައުރާ ހިސާބުން އޮތީ ގާތްގަނޑަކަށް ހުއްޓިފަ އެވެ. މަޖިލިސް ހުއްޓުމަކަށް އައީ މަޖިލީހުގެ ރަައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅި ހިސާބުން އުފެދުނު ހައިޖާނެއް ގަ އެވެ.
އާ ޕާޓީ ހެދުމުގެ މަސައްކަތް ފެށުމާއި އެކު، އެކަމުގައި އިސްކޮށް އުޅުއްވި މެމްބަރުން މަޖިލީހުގައި ސަރުކާރަށް ފާޑުވިދާޅުވާން ފެށުމާއި ރިޔާސަތުން ރައީސް މުހައްމަދު ނަޝީދު އަމަލުކުރައްވާ ގޮތާ މެދު އެމްޑީޕީން ހިތްހަމަ ނުޖެހި، އެމަނިކުފާނުގެ އިތުބާރު ނެތްކަމުގެ މައްސަލައެއް ހުށަހެޅި އެވެ. މަޖިލީހުގެ ނައިބުރައީސް އީވާ އަބްދުﷲގެ އިތުބާރު ނެތް ކަމުގެ މައްސަލަ ވެސް އެމްޑީޕީން ހުށަހެޅި އެވެ.
އެމައްސަލަތައް ވެއްދުމުން ނަޝީދާއި އީވާ މަޖިލީހުގެ ރިޔާސަތު ނުބަލަހައްޓަވަން ފެށްޓެވުމާ އެކު މަޖިލީހުގައި އޮތީ މަރުތަޅެއް އެޅިފަ އެވެ.
އެމްޑީޕީން މެމްބަރުންތަކެއް ވަކިވުމުން، މަޖިލީހުގެ ދާއިމީ ކޮމިޓީތަކުގެ އެކުލެވުމަށް ބަދަލު ގެންނަން އެޕާޓީން ވަނީ ހުށަހަޅައިފަ އެވެ. މިއަދު ބާއްވަން އުޅުނު ޖަލްސާއަށް ވެސް އެޖެންޑާކޮށްފައި އޮތީ އެ މައްސަލަ އެވެ.
