ރިޔާސީ އިންތިހާބުގައި އިދިކޮޅުން ވާދަކުރާ ކެންޑިޑޭޓުން ވެސް ބޮޑެތި ރިޔާސީ ވައުދުތަކެއް ވަނީ އެ ފަރާތްތަކުން ވިދާޅުވާ ގޮތާ ހިލާފަށް ދައުލަތް ދަރަނިވެރިވެފައިނުވާތީ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރިޔާސީ ކެމްޕޭނުގައި ތ. ކިނބިދޫއަށް ވަޑައިގެން ދެއްކެވި ވާހަކަފުޅުގައި، އިދިކޮޅު ފަރާތްތަކުން ސަރުކާރު ދަރަނިވެރިވެ ބަނގުރޫޓުވާނެ ކަމަށް ބުނާ ބުނުމަށް ރައްދު ދެއްވަމުން ރައީސް ވިދާޅުވީ، އިދިކޮޅު ކެންޑިޑޭޓުން ވެސް އަރާ ކޮންމެ ރަށެއްގައި ވައުދުތައް ވަމުން ގެންދަވާ ކަމަށެވެ.
"އަނެއްކޮޅުން ބަނގުރޫޓުވެފަ އޮތް ސަރުކާރެއްގެ ވާހަކަ ދައްކަނީ، ފައިސާއެއް ނެތޭ، 2025 ގައި ބަނގުރޫޓުވާނޭ، 2026 ގައި ބަނގުރޫޓުވާނޭ، އެހެން ނަމަވެސް ހަމަ ލިސްޓު ހިފައިގެން އަރާ ވައުދު ވަނީ، މިއީ ހަމަ ސަރުކާރުން ކުރާނެ ހަރަދު ނޫންތޯ،" ރައީސް ވިދާޅުވި އެވެ.
ރައީސް ވިދާޅުވީ އެފަދައިން އިދިކޮޅު ކެންޑިޑޭޓުން ގިނަ، ބޮޑެތި ވައުދުތަކެއް ވަމުން ގެންދަނީ ސަރުކާރުގައި ފައިސާ ހުރިކަން ނުވަތަ ލިބޭނެކަން އެބޭފުޅުންނަށް ވެސް އެނގޭތީ ކަމަށެވެ.
[ވައުދުތައް ވަނީ] ހަމަ ގައިމުވެސް ފައިސާ ހުރިކަން އިނގިގެން ނޫންތޯ، ނުވަތަ ފައިސާ ލިބޭނެކަން އިނގޭތީ ނޫންތޯ އެބޭފުޅުން އެ ވާހަކަތައް އެ ދައްކަވަނީ، އެހެންނޫނީ އެ ހައްދަވަނީ އިތުރުފުޅެއް
އެ ފަދައިން އިދިކޮޅުން ދައްކާ 'ދެކޮޅު ނުޖެހޭ' ވާހަކަތަކާމެދު ރައްޔިތުން ވިސްނަން ޖެހޭ ކަމަށް ވެސް ރައީސް ވިދާޅުވި އެވެ.
ރައީސް ވިދާޅުވީ ވައުދުވެވަޑައިގަންނަވަނީ އެކަންކަން ފުއްދުމަށް ބޭނުންވާ ފައިސާ ލިބޭނެކަމުގެ ޔަގީންކަން އޮވެ، އެ ފައިސާ ހޯދާނެ ގޮތް އެނގިވަޑައިގަންނަވާތީ ކަމަށެވެ. އަދި މި ސަރުކާރަކީ ފުދުންތެރި ސަރުކާރެއް ކަމަށް ވެސް ރައީސް ވިދާޅުވި އެވެ.
އިދިކޮޅު ކެންޑިޑޭޓުންގެ ތެރެއިން ސަރުކާރުގެ ދަރަނީގެ ވާހަކަ ގިނަ ކެންޑިޑޭޓުން ދަނީ ފާހަގަކުރަމުންނެވެ. އެގޮތުން މި މަހުގެ 18 ގައި ހދ. ނޮޅިވަރަމުގައި ހުންނަވާ ޖޭޕީގެ ރިޔާސީ ކެންޑިޑޭޓުވެސް ވަނީ ބައެއް ގައުމުތަކުން ލޯނު ދޫކުރާ ގޮތާއި ރާއްޖެއިން ލޯނު ނަގަމުންދާ މިންވަރަށް ފާޑުވިދާޅުވެފަ އެވެ.
"އަޅުގަނޑު މި ދައްކަނީ 120 ބިލިއަން ރުފިޔާގެ ދަރަނި މިއަދު އޮތް ވާހަކަ، އެއީ ސަރުކާރުގެ ދަރަނީ އެކަނި، ކޮބާތޯ ސަރުކާރުގެ ކުންފުނިތަކުގެ ދަރަނި، އިތުރު އެއް ބިލިއަން ޑޮލަރަށްވުރެ މަތިވާނެ އިނގޭތޯ، އެ ހުރިހާ އެއްޗެއް ހަވާލުވާންޖެހޭ ފަރާތަކީ ދިވެހި ރައްޔިތުން، ތިބޭފުޅުން، [ދަރަނީގެ ސަބަބުން] 2025 އަންނައިރު ދެން އަޅުގަނޑުމެން ތިބޭނީ ކޮންތާކުތޯ ލަފާކުރަން ތިބޭފުޅުންނަށް އުނދަގޫ ވެދާނެ،" އެ ދުވަހު އޭނާ ވިދާޅުވި އެވެ.
