ރިޔާސީ އިންތިހާބުގެ ވޯޓާސް ލިސްޓުތަކުގައި ސޮއިކުރަން ކެންޑިޑޭޓުންނަށް ދީފައިވާ ވަގުތު މިރޭ ހަމަވުމުން، އިތުރު ވަގުތެއް ނުދެވޭނެ ކަމަށް އިލެކްޝަންސް ކޮމިޝަންސް (އީސީ) އިން ބުނެފި އެވެ.
އީސީގެ ނައިބު ރައީސް އިސްމާއިލް ހަބީބް މި ނޫހާ ވާހަކަ ދައްކަވަމުން ވިދާޅުވީ އޮގަސްޓް 25، ގައި ވޯޓާސް ލިސްޓުގައ ސޮއިކުރުމަށް ހުޅުވާލުމަށްފަހު މިހާތަނަށް ފަސް ކެންޑިޑޭޓުންގެ ފަރާތުން ލިސްޓުގައި ސޮއިކޮށްފައިވާ ކަމަށެވެ. އަދި ތިން ކެންޑިޑޭޓުން ސޮއިކުރަން ނާންނަ ކަން ފާހަގަކުރެއްވި އެވެ.
"އެމްއެންޕީ، އުމަރު ނަސީރު އަދި ޑިމޮކްރެޓްސްގެ ފަރާތުން ސޮއިކުރާކަށް އަދި ނާދޭ،" ހަބީބް ވިދާޅުވި އެވެ.
ހަބީބް އިތުރަށް ވިދާޅުވީ، ވޯޓާސް ލިސްޓުގައި ސޮއިކުރުމަށް ކަނޑައަޅާފައިވާ ވަގުތު ހަމަވުމަށްފަހު އެއްވެސް ކެންޑިޑޭޓަކަަށް އިތުރު ފުރުސަތެއް ނުދެވޭނެ ކަމަށެވެ. އަދި އެއްވެސް ޕާޓީއެއް ނުވަތަ ކެންޑިޑޭޓެއްގެ އެދުމަށް ސޮއިކުރަން ދީފައިވާ މުއްދަތު އީސީން އިތުރު ނުކޮށްދޭނެ ކަމުގައި ވެސް ހަބީބް ވިދާޅުވި އެވެ.
"އަޅުގަނޑުމެން މިއޮތީ މިހާރު ވޯޓާސް ލިސްޓުގަ ސޮއިކުރަން ފުރުސަތު ހުޅުވާލާފަ. އިތުރު ވަގުތެއް އަޅުގަނޑުމެން ނުދޭނަން. އެ ފުރުސަތު ދޭގޮތަކަށް ނޫން އޮތީ،" ހަބީބް ފާހަގަކުރެއްވި އެވެ.
ވޯޓާސް ލިސްޓުތަކުގައި ސޮއިކުރަން ހުޅުވާލި މުއްދަތު މިރޭ 10:00 ޖަހާއިރަށް ހަމަވާނެ އެވެ. ރިޔާސީ އިންތިހާބުގައި ބަހައްޓާ 574 ވޯޓު ފޮށި ބަހައްޓާއިރު، އެއިން ކޮންމެ ފޮއްޓެއްގެ ވޯޓާސް ލިސްޓުގައި ވަކިވަކިން ކެންޑިޑޭޓުންގެ ފަރާތުން ސޮއިކުރަން ޖެހޭނެ އެވެ.
ވޯޓާސް ލިސްޓުތަކުގައި ކެންޑިޑޭޓުން ސޮއިކުރުމުގެ އުސޫލު އައީ ސެޕްޓެމްބަރު 7، 2013 ގައި ބޭއްވި ރިޔާސީ އިންތިހާބުގެ ފުރަތަމަ ބުރުގެ ނަތީޖާ ބާތިލްކޮށް ސުޕްރީމް ކޯޓުން ނެރުނު ހުކުމުގެ ގައިޑްލައިންގައި އެ ގޮތަށް އަމަލު ކުރުމަށް ބަޔާންކޮށް އަމުރު ކުރި ފަހުންނެވެ.
ވާދަކުރާ ކެންޑިޑޭޓުން
- އަމިއްލަ ގޮތުން؛ ކުރީގެ ހޯމް މިނިސްޓަރު އުމަރު ނަސީރު
- އަމިއްލަ ގޮތުން؛ ޑިފެންސްގެ ކުރީގެ ނައިބު ހަސަން ޒަމީލް
- އެމްޑީޕީ؛ ރައީސް އިބްރާހިމް މުހައްމަދު ސޯލިހު
- ޕީއެންސީ؛ މާލޭގެ މޭޔަރު ޑރ. މުހައްމަދު މުއިއްޒު
- ޖޭޕީ؛ މާމިގިލި ދާއިރާގެ މެންބަރު ގާސިމް އިބްރާހިމް
- އަމިއްލަ ގޮތުން؛ އެމްއާރުއެމްގެ ރައީސް އަހުމަދު ފާރިސް މައުމޫން
- ޑިމޮކްރެޓްސް؛ ހުޅުދޫ ދާއިރާގެ މެންބަރު އިލްޔާސް ލަބީބު
- އެމްއެންޕީ؛ ދަނގެތި ދާއިރާގެ މެންބަރު މުހައްމަދު ނާޒިމް
ސެޕްޓެމްބަރު 9، ގައި އޮންނަ ރިޔާސީ އިންތިހާބުގައި ވޯޓުލެވޭ މީހުންގެ ލިސްޓުގައި 282،395 މީހުންގެ ނަން އެބަ އޮތެވެ. އޭގެ ތެރޭގައި އަލަށް ރިޔާސީ އިންތިހާބުގައި ވޯޓު ލެވޭ މީހުންގެ އަދަދަކީ 27,006 އެވެ.
ރިޔާސީ އިންތިހާބު ކާމިޔާބު ކުރެވެނީ ވޯޓުލީ މީހުންގެ 50 އިންސައްތަ އަދި އިތުރު އެއް ވޯޓު ލިބިގެނެވެ. އެ ވަރަށް އެއްވެސް ކެންޑިޑޭޓަކަށް ވޯޓު ނުލިބޭނަަމަ، ފުރަތަމަ ބުރުގައި އެންމެ ގިނަ ވޯޓު ލިބުނު ދެ ކެންޑިޑޭޓުންގެ މެދުގައި ދެވަނަ ބުރެއް ބާއްވަން ޖެހެ އެވެ.
މި ފަހަރު ދެ ވަނަ ބުރަކަށްދާ ނަމަ އެ ވޯޓު ލުން އޮންނާނީ ސެޕްޓެމްބަރު 30، ގަ އެވެ.
