ސެޕްޓެމްބަރު އެކެއްގައި ދައުލަތުގެ މީޑިއާއިން ބާއްވާ ރިޔާސީ ބަހުސްގައި ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގަންނަވާނެ ކަމަށް އެމަނިކުފާނުގެ ކެމްޕޭނުން ބުނެފި އެވެ.
އެމްޑީޕީ އާއި ގުޅިފައިވާ ޕާޓީތަކުގެ ކެމްޕޭނުގެ ތަރުޖަމާނު މާރިޔާ އަހުމަދު މިއަދު ބޭއްވެވި ނޫސްވެރިންގެ ބައްދަލުވުމުގައި ވިދާޅުވީ، އެމްއެންޔޫ އަދި ދައުލަތުގެ މީޑިއާ ގުޅިގެން ބާއްވާ ރިޔާސީ ބަހުސްގައި ރައީސް ސޯލިހު ބައިވެރިވެވަޑައިގަންނަވާނެ ކަމުގެ ޔަގީންކަން ދެއްވާފައިވާ ކަމަށެވެ.
"އަޅުގަނޑަށް އެބަ ކޮންފާމް ކޮށްދެއްވާ ރައީސް ސޯލިހު އެމްއެންޔޫ ބަހުސަށް ވަޑައިގަންނަވާނެކަން. އެއީ އިލްމީ ބަހުސެއް ހިނގާނެ ތަނެއް. ޔުނިވާސިޓީތަކުގައި އެ ބޭފުޅުން އިލްމީ ގޮތުން ޕޮލިސީތަކާ ގުޅޭގޮތުން ވާހަކަ ދައްކައި ދިރާސާކުރާނެ," މިއަދުގެ ނޫސްވެރިންގެ ބައްދަލުވުމުގައި މާރިޔާ ވިދާޅުވި އެވެ.
ރައީސް ބަހުސްގައި ބައިވެރިވެވަޑައިގަންނަވަން ނިންމަވާފައި މިވަނީ ރިޔާސީ ބަހުސްގައި އެމަނިކުފާނު ނުފެންނާނެ ކަމަށް ބުނެ އިދިކޮޅު ޕާޓީތަކުން ފާޑުކިޔަމުންދާ ދަނޑިވަޅެއްގަ އެވެ.
އެގޮތުން ބަހުސްގައި ބައިވެރިވެވަޑައިނުގަތުމަށް އުޒުރު ދައްކަވަމުންދާ ކަމަށް ބުނެ ދަ ޑިމޮކްރެޓްސްއިން ވަނީ ކަންބޮޑުވުން ފާޅުކޮށްފަ އެވެ.
ދެހާސް އަށާރަ ވަނަ އަހަރުގެ ރިޔާސީ ބަހުސްގައި ވެސް އޭރު އެމްޑީޕީގެ ކެންޑިޑޭޓުގެ ގޮތުގައި ހުންނަވާ ރައީސް ސޯލިހު ބައިވެރިވެވަޑައިނުގަންނަވަ އެވެ. އެއީ, އެމްއެންޔޫގެ ބަހުސްގައި އެކަނި ބައިވެރިވާން އޭރުގެ ރައީސް އަބްދުالله ޔާމީން ނިންމެވުމުން އެއީ މިނިވަކަމާ އެކު ކުރިއަށް ނުދާނެ ބަހުސް ކަމަށް ބެލުމަށް ފަހު އެވެ.
އިންތިހާބަކާ ދިމާކޮށް ދައުލަތުގެ މީޑިއާއިން ގެނެސްދޭ މި ބަހުސް މިފަހަރު އޮންނާނީ ސެޕްޓެމްބަރު 1، ވަނަ ދުވަހުގެ ރޭ 9:00 ގަ އެވެ. އިމްތިޔާޒު އިތުރަށް ވިދާޅުވީ ޑިމޮކްރެޓުންގެ ކެންޑިޑޭޓު އިލްޔާސް ލަބީބު އެ ބަހުސްގައި ބައިވެރިވާނެ ކަމަށެވެ.
