ގާނޫނު އަސާސީގައި ދެ ވަނަ ރިޔާސީ ދައުރަކަށް އެއްވެސް މީހަކަށް ކުރިމަތިނުލެވޭ ގޮތަށް ބަދަލުކުރަންޖެހޭ ކަމަށް، ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހީމް މިއަދު ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕެއިނުގައި މިއަދު ހެނދުނު އދ. ދިއްދޫއަށް ވަޑައިގެން ވާހަކަ ދައްކަވަމުން ގާސިމް ވިދާޅުވީ މީގެ ކުރިން އޭނާ އެ ރަށަށް އައުމުން މަރުހަބާ ކިޔަން އާއިލާގެ ގިނަ ބަޔަކު ނުކުންނަ ކަމަށެވެ.
"މިއީ އަޅުގަނޑު އުފަން ރަށް، އަޅުގަނޑުގެ މަންމަގެ ރަށް، މީގެ ކުރިން، އަޅުގަނޑު މި ރަށަށް އައިމަ، ސިޔާސީ ގޮތުން އަޅުގަނޑަށް ތާއީދުކުރިޔަސް، ނުކުރިޔަސް، ގިނަ ބަޔަކު ނުކުމޭ،" ގާސިމް ވިދާޅުވި އެވެ.
ރައްޔިތުންގެ މަޖިލީހުގައި އދ. މާމިގިލި ދާއިރާ ތަމްސީލްކުރައްވާ މެމްބަރު ގާސިމް ވިދާޅުވީ، އާއިލާ ބައެއް މީހުން ކައިރިން އޮޅުން ފިލުވިއިރު ވެގެން އުޅޭ ކަމަކީ ސަރުކާރުން ވަޒީފާ ދީފައި ނުނުކުތުމަށް އެންގީ ކަމަށެވެ.
ސަރުކާރު ހިއްސާވާ ކުންފުނިތަކުގައި ސިޔާސީ ބޭނުމަށް ވަޒީފާތައް އިތުރުކޮށްފައިވާ ކަމަށް ދެކެވޭ ވާހަކަ ގާސިމް ވެސް މިއަދު ދެއްކެވި އެވެ. އެގޮތުން، ވަރަށް ގިނަ ރަށްރަށުގައި ރައީސް އިބްރާހިމް މުހައްމަދު ސޯލިހު ދެ ވަނަ ދައުރަކަށް ހޮވެން ވޯޓު ހޯދަން ސަރުކާރު ކުންފުނިތަކުގެ ވަޒީފާ ދީފައިވާ ކަމަށް ތުހުމަތު ކުރެއްވި އެވެ.
ގާސިމް ދެން ތުހުމަތުކުރެއްވީ ރައީސް ސޯލިހު އިންޑިއާއާ އޮންނަ ގާތް ގުޅުމަކީ، އިންޑިއާގެ ނުފޫޒު ރާއްޖޭގައި ގަދަކުރުމަށް ރައީސް ސޯލިހު ޖާގަ ދޭތީ އޮންނަ ގުޅުމެއް ކަމަށެވެ. ރައީސް ސޯލިހު އިތުރު ދައުރަކަށް ހޮވުމަށް އެމަނިކުފާނަށް ވުރެ ބޮޑަށް އިންޑިއާއިން ބޭނުންވާ ކަމަށެވެ.
"ދެވަނަ ދައުރެއް ބޭނުންވީމާ ކޮންމެ މީހަކު ވެސް ހަރަދު މި ކޮށްލަނީ އިންތިހާއަށް، ހަލާލެއް ހަރާމެއް ބަލަނީއެއް ނޫން، ކޮންމެ ފަހަރަކު ވެސް މި ފެންނަނީ މި މަންޒަރު،" ވިލާ ކުންފުނީގެ ވެރިޔާ ގާސިމް ވިދާޅުވި އެވެ.
މަލްޓި ޕާޓީ ޑިމޮކްރެސީގެ އަސާސްތަކުގެ މައްޗަށް 2008 ގައި ފެހި ގާނޫނު އަސާސީއަށް އަމަލުކުރަން ފެށި ފަހުން ކުރެވުނު އެކި ތަޖުރިބާތައް ހިއްސާކުރެއްވުމަށް ފަހު ގާސިމް ވިދާޅުވީ އެމަނިކުފާނަށް މިހާރު ފެނިވަޑައިގަންނަވަނީ ގާނޫނު އަސާސީގައި ދެވަނަ ދައުރެއް ނުހޯދޭ ގޮތަށް ބަޔާން ކުރުމަށް ކަމަށެވެ.
"މިހާރު މި އޮންނަނީ ފަސް އަހަރު، ހަތް އަހަރަށް ދިގުކޮށްގެން ވިޔަސް، އެއް ދައުރު ކަމަށް ކޮންމެ މީހަކަށް ވެސް ލިބޭނީ ބުނެފިއްޔަކާއެއް، ދެން އޭނާ އަންނާކަށެއް ގާނޫނާ ހިލާފު މަސައްކަތްތަކެއް ކުރުމުގެ ބޭނުމެއް ނެތްތާ،" ގާނޫނު އަސާސީ އެކުލަވާލި ޚާއްސަ މަޖިލީހުގެ ރައީސްކަން ކުރެއްވި ގާސިމް ވިދާޅުވި އެވެ.
titledesc
މި ސަރުކާރަކީ ގާސިމްގެ ދައުރު އޮވެގެން ގެނެސް މިދިޔަ ފަސް އަހަރު އޭނާގެ ދައުރު އޮވެގެން ހިނގި ސަރުކާރެއް ކަމަށް އެއްބަސްވާ ކަމަށް އޭނާ ވިދާޅުވި އެވެ.
ނަމަވެސް ދިވެހި ދައުލަތުގެ މިނިވަން ކަމަށް އަސަރުކުރާ ގޮތަށް އިންޑިއާއަށް ކަންކަން ހަމަޖައްސައިދީ، އިންޑިއާ ސިފައިން ރާއްޖޭގައި ބަހައްޓާ ކަމަށް ގާސިމް ތުހުމަތުކުރެއްވި އެވެ. އެ ކަންކަން އެނގުނީ ވަރަށް ފަހުން ކަމަށް ވެސް މިއަދު އޭނާ ވިދާޅުވި އެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި އިންޑިއާއާ ގުޅުން ގޯސްވެ ޗައިނާއާ ގުޅުން ބަދަހިކުރި އެވެ. ރައީސް ސޯލިހު ވެރިކަމަށް ހަވާލުވެވަޑައިގަތް ފަހުން އަނެއްކާ ވެސް ޚާރިޖީ ސިޔާސަތު ބައްޓަންކުރީ އިންޑިއާއަށް އިސްކަންދޭ ގޮތަށެވެ.
މި ސަރުކާރުން ހިންގާ އުމްރާނީ ތަރައްގީގެ ބޮޑު ގިނަ މަޝްރޫއުތަކަކީ އިންޑިއާގެ ލޯނުތައް މެދުވެރިކޮށް ފަންޑުކޮށްފައިވާ މަޝްރޫއުތަކެވެ. އަދި އިންޑިއާއިން ގިނަ އަސްކަރީ އެހީތައް ވެސް މި ސަރުކާރުން ދަނީ ހޯދަމުންނެވެ.
އިންޑިއާގެ އަސްކަރީ ބޭސްއެއް ރާއްޖޭގައި ގާއިމުކުރަން މަސައްކަތް ކުރާ ކަމަށާއި ރާއްޖޭގައި އިންޑިއާ ސިފައިން ގާއިމުވެ ތިބި ކަމަށް އިދިކޮޅު ޕީޕީއެމް/ޕީއެންސީން ތުހުމަތު ކުރަމުން ދިޔަ އެވެ. މި ފަހުން ރައީސް ސޯލިހު ވަނީ ރާއްޖޭގައި ބޭރުގެ ސިފައިން ނުތިބޭނެ ކަމަށް ވިދާޅުވެފަ އެވެ.
ސަރުކާރުން ބުނާ ގޮތުގައި، އިންޑިއާއިން އަސްކަރީ އެހީ ހޯދުމަށް ސަރުކާރުން ގެންގުޅޭ ސިޔާސަތުގެ ބޭނުމަކީ ޓެރަރިޒަމާއި މަސްތުވާތަކެތި ޓްރެފިކް ކުރުމާ ދެކޮޅު ބޮޑެތި އޮޕަރޭޝަންތަކަށް ރާއްޖޭގެ އަސްކަރީ ގާބިލްކަން އިތުރު ކުރުމެވެ.
