އިދިކޮޅު ޕީޕީއެމް/ޕީއެންސީގެ ރިޔާސީ ޓިކެޓު މާލޭގެ މޭޔަރު ޑރ. މުހައްމަދު މުއިއްޒު ހޯއްދެވީ އޮޅުވާލައިގެން ކަމަށް ބުނާ ވާހަކައަށް ރައްޔިތުން ވަރަށް ބޮޑަށް ވިސްނަންޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރިޔާސީ ކެމްޕޭނުގައި މިއަދު ތ. ވިލުފުށްޓަށް ވަޑައިގެން، ރިޔާސީ ޓިކެޓުގެ މައްސަލާގައި ޕީޕީއެމް ދޫކޮށް ޖުމްހުރީ ޕާޓީއާ ގުޅިވަޑައިގެންނެވި ކުރީގެ ރައީސް ޑރ. މުހައްމަދު ވަހީދު ޖޭޕީގެ ކެމްޕޭނުގެ ތެރެއިން މުއިއްޒަށް ކުރެއްވި ތުހުމަތުތައް ތަކުރާރު ކުރައްވާ ރައީސް ވިދާޅުވީ އެކަންކަމާ ރައްޔިތުން ވިސްނަންޖެހޭ ކަމަށެވެ.
"ވިދާޅުވީ، ބަލަ މިތަނުން އެބަފެނޭހެއްޔޭ އެ [ޕީއެންސީގެ] ކުލަ، ނެތެއްނޫންހެއްޔޭ ފެންނާކަށް، ދިދައެއްވެސް އެއްޗެއް ނެތެއްނޫންހެއްޔޭ އެ ކުރިމަތިލައްވައިގެން އުޅޭ ޕާޓީގެ، އޮޅުވާލައިގެން ހޯދައިގެން އުޅޭ ޓިކެޓެކޭ، އޮޅުވާލައިގެން ޓިކެޓު ހޯދި މީހަކަށް ވެރިކަން ލިބިއްޖިއްޔާ ދެން ވެރިކަން ކުރާނީ ކިހިނެއް ހެއްޔޭ," ރައީސް ވިދާޅުވި އެވެ.
ރައީސް ވިދާޅުވީ އިދިކޮޅު ޓިކެޓު ހޯދުމަށް ކުރީގެ ރައީސް ވަހީދު ހުންނެވީ ވަރަށް ބޮޑަށް ތައްޔާރުވެގެން ކަމަށެވެ.
"އެހެން ނަމަވެސް އޭގެ ތެރެއަށް އެހެން ބަޔަކު ވަދެ ނުވެސް ދަންނަ ކުޑަކުޑަ ޕާޓީއަކުން ނިކުމެގެން ޓިކެޓު އޮޅުވާލައިގެން ހޯދި ވާހަކަ ވަރަށް ތަފުސީލުކޮށް ފޯރީގަ ޖޯޝާއެކީގަ ވިދާޅުވީ، އަޅުގަނޑު ހިތުން ވަރަށް ފުންކޮށް ތިބޭފުޅުން އެކަންކަމާ ދޭތެރޭގަ ވިސްނަންވާނެ،" އެމަނިކުފާނު ވިދާޅުވި އެވެ.
އެގޮތުން، ވަހީދު އާއި މުއިއްޒަކީ މި ފަހަކާ ޖެހެންދެން އެކުގައި މަސައްކަތް ކުރެއްވި ބޭފުޅުން ކަމަށާއި ވަހީދުގެ ވާހަކަ އަޑުއަހާ ރައްޔިތުން ނަމަނަމަ ގޯސް ނުހެއްދެވުމަށް ރައީސް ނަސޭހަތްތެރިވި އެވެ.
އިދިކޮޅު ކޯލިޝަނުގެ މައިނޯރިޓީ ޕާޓީ، ޕީއެންސީން ރިޔާސީ އިންތިހާބަށް ނުކުންނާނެ ކެންޑިޑޭޓެއްގެ ގޮތުގައި ޑރ. މުއިއްޒު ކަނޑައެޅީ އެ ކޯލިޝަނުގެ ރިޔާސީ ޓިކެޓު އަރުވާފައިވާ، ކުރީގެ ރައީސް ޔާމީންއަށް އިންތިހާބުގައި ވާދަ ނުކުރެއްވޭ ހާލަތެއް ކުރިމަތިވެއްޖެ ނަމަ އެވެ.
އެ ނިންމުން އެގޮތަށް ނިންމާފައި އޮއްވައި ދިވެހިރާއްޖޭގެ ސުޕްރީމް ކޯޓުން ވަނީ މަނީ ލޯންޑަރިންގެ ކުށް ސާބިތުވެ، 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ، އަބްދުﷲ ޔާމީންގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަނުން ނިންމީ ރަަނގަށް ކަމަށް ހުކުމްކުރި އެވެ.
އެއާއެކު ޔާމީން ވަނީ އިންތިހާބު ބޮއިކޮޓު ކުރުމަށް ޕީޕީއެމްގެ ލީޑަޝިޕަށް ލަފާ ދެއްވައިފަ އެވެ. އެ އެންގެވުމާ މެދު މަޝްވަރާ ކުރުމަށް މިއަދު ބޭއްވި އިދިކޮޅުގެ ޖޮއިންޓު ސެނެޓު ބައްދަލުވުން ހޫނުވެފަ އެޕީޕީއެމްގެ މައި އޮފީސް ހުންނަ އިމާރާތުގެ ތެރޭގައި މާރަމާރީ ވެސް ހިންގި އެވެ.
ނަމަވެސް ފަހުން ސެނެޓުން ނިންމީ އިންތިހާބު ބޮއިކޮޓު ކުރުމުގެ ބަދަލުގައި މުއިއްޒަށް ރިޔާސީ ރޭހުގައި ވާދަކުރުމުގެ ފުރުސަތު ދިނުމަށެވެ. އެއަށްފަހު ޔާމީނުވެސް ވަނީ ގޮތްދޫކުރައްވާ މުއިއްޒަށް ތާއީދު ކުރައްވާފަ އެވެ.
