އިސްލާމިކް ފައިނޭންސްގެ ސަރަހައްދީ ހަބަކަށް ރާއްޖެ ބަދަލުކުރުމުގެ ވައުދާއެކު އެކާވީސް ވަނަ ގަރުނަށް ފަހި މާލީ ބަދަލުތަކެއް ގެނައުމުގެ ގިނަ ސިޔާސަތުތަކެއް އެމްޑީޕީގެ މެނިފެސްޓޯގައި ހިމަނައިފި އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި، އެމްޑީޕީގެ ޓިކެޓުގައި ވާދަ ކުރައްވާ ރައީސް ސޯލިހުގެ ދެ ވަނަ ދައުރެއް ކާމިޔާބު ކުރެއްވުމަށް އާންމުކޮށްފައިވާ މެނިފެސްޓޯގެ ފަސް ވަނަ ބައި ކަމުގައިވާ އިގުތިސޯދީ ސިޔާސަތުތައް ހާމަކުރީ، މިރޭ ޒުވާނުންގެ މަރުކަޒުގައި ބޭއްވި ހާއްސަ އިވެންޓުގަ އެވެ.
އިސްލާމިކް ފައިނޭންސް އިތުރަށް ފުޅާކުރުމަށް ގައުމީ މާސްޓަ ޕްލޭނެއް އެކުލަވާލައި، ރާއްޖެއަކީ އިސްލާމިކް ފައިނޭންޝަލް ހަބަކަށް ހެދުމަށް އިސްލާމިކް ފައިނޭންސަށް ހާއްސަ ރީޖަނަލް ފައިނޭންޝަލް ސެންޓަރެއް ގާއިމުކުރަން މެނިފެސްޓޯގައި ވެ އެވެ.
އިސްލާމިކް ފައިނޭންސް ޕްރޮޑަކްޓްތައް ފޯރުކޮށްދިނުމުގައި ހަރަކާތްތެރިވާ ފަރާތްތަކާއި، އިތުރަށް މިދާއިރާއަށް އިންވެސްޓްކުރުމުގެ ޝައުގުވެރިކަން ހުރި ފަރާތްތަކަށް އިތުބާރު ހޯދައިދިނުމުގެ ގޮތުން، އިސްލާމިކް ފައިނޭންސާ ގުޅުން ހުރި ހާއްސަ ގާނޫނީ އޮނިގަނޑެއް އެކުލަވާލައި ތަންފީޒުކުރަން ވެސް ކަނޑައަޅާފައިވެ އެވެ.
"ރާއްޖޭގެ ފައިނޭންޝަލް ސެކްޓަ ކުރިއެރުވުމަށްޓަކައި ކުރާ މަސައްކަތްތަކުގައި އިސްލާމިކް ފައިނޭންސަށް އިސްކަންދީ، ބޭންކިންގ، އިންޝޫރަންސް، އަދި ޕެންޝަން ފަންޑް ފަދަ ދާއިރާތަކަށް ކޮންވެންޝަނަލް ފައިނޭންސަށް ވުރެ ފަހިކޮށް ފަސޭހައިން އިސްލާމިކް ފައިނޭންސަށް އެކްސެސް ލިބޭނެ މާލީ ނިޒާމެއް ގާއިމުކުރާނެ،" މެނިފެސްޓޯގައި ބުނެފައިވެ އެވެ.
ފައިނޭންޝަލް ލިޓްރަސީ އިތުރުކޮށް، އިސްލާމިކް ފައިނޭންސް ދާއިރާ އިތުރަށް ފުޅާކުރުމަށްޓަކައި ބޭނުންވާނެ އިންސާނީ ވަސީލަތް ތަރައްގީކުރުމަކީ ވެސް ރައީސް ސޯލިހުގެ ވައުދެކެވެ. އަދި ޒަކާތާބެހޭ ގާނޫނެއް އެކުލަވާލައި، ޒަކާތް ފަންޑުން އިންވެސްޓްކުރެވޭނެ ޝަރީއާ ކޮމްޕްލަޔަންޓް އިންވެސްޓްމަންޓް ޕްރޮޑަކްޓްތައް ފަހިކޮށް، އޭގެއިން ނަފާ ހޯދައި ފަންޑު އިތުރުކުރުމަކީ ވެސް ވައުދެކެވެ.
ވަގުފްގެ ނިޒާމެއް އެކުލަވާލައި ބައިނަލްއަގްވާމީ ވަގުފް ފަންޑުތަކުން ރާއްޖޭގެ ވަގުފްތަކަށް އިންވެސްޓްކުރާނެ ނިޒާމެއް ގާއިމު ކުރުމާއި އިސްލާމިކް ވެންޗަ ކެޕިޓަލް ފަންޑެއް މެދުވެރިކޮށް ރާއްޖޭގެ ވިޔަފާރިތައް ފުޅާކުރުމަށް ބޭނުންވާ ކެޕިޓަލް ފޯރުކޮށްދިނުމަކީ ވެސް ރައީސް ސޯލިހުގެ ވައުދެކެވެ.
އިތުރު މާލީ ބަދަލުތައް
- އިސްލާމިކް ފައިނޭންސް ކޯޕަރޭޝަން އުފެއްދުން
- ހައްގުވެރި ފަރާތްތަކަށް ސަބްސިޑީ ކަށަވަރުކުރުން
- 2024 ވަނަ އަހަރު އާސަންދަ ނިޒާމުގެ ކަވަރޭޖް ބަދަލުކުރުން.
- މޯލްޑިވިއަންއާއެކު މެޑިކަލް އިވެކުވޭޝަން ހިދުމަތް ފޯރޮކޮށްދިނުމަށް ޚާއްސަ އެއާ އެމްބިއުލާންސް ތައާރަފުކުރުން
- ބަޖެޓް ޑެފިސިޓް ކުޑަކޮށް ޖީޑީޕީގެ ނިސްބަތުން ދަރަނީގެ މިންވަރު 80 ޕަސެންޓަށް ކުޑަކުރުން
- ބޭރު ފައިސާ ރާއްޖެއިން ބޭރަށް ލީކުވާ މިންވަރު މަދުކުރުން.
- ރާއްޖޭގެ އިގުތިސާދު ޑީޑޮލަރައިޒްކޮށް، ވިޔަފާރީގެގޮތުން ގުޅިފައިވާ ގައުމުތަކާ އެކީ ކުރާ ވިޔަފާރީގެ މުއާމަލާތްތައް އެގައުމެއްގެ ފައިސާއިން ކުރާގޮތަށް ހަމަޖެއްސުން
- އެކްސްޗޭނ ރޭޓް ޕްރެޝަރު ކުޑަކުރުމުގެ ގޮތުން، ރިނުވަބަލް އެނަރޖީ، ޑިޖިޓަލް އިންފްރާސްޓްރަކްޗަ، ސްޕެޝަލައިޒް ހެލްތްކެއަ، އަދި އެގްރިކަލްޗަ ފަދަ ދާއިރާތަކަށް އިންވެސްޓްކުރުން
- ދައުލަތުގެ ދަރަނީގެ ސްޓޮކްގެ ރިސްކް ކުޑަކުރުމުގެ ގޮތުން އެވްރެޖް މެޗުރިޓީ މިހާރަށް ވުރެ އިތުރުކޮށް، ހެޔޮ އަގުގައި ދައުލަތުގެ ދަރަނި ފައިނޭންސްކުރުން
- މާލީ ދާއިރާގެ އެކިއެކި ހަރަކާތްތައް ކުރިއަށް ނެރެން ފައިނޭންޝަލް އިދާރާތަކަށް މިހާރު ހުރި ގޮންޖެހުންތައް ނައްތާލާނެ. މި ދާއިރާގެ ހިދުމަތްތައް ލިބިގަތުމަށް ރައްޔިތުންނާއި ވިޔަފާރިތަކުން ދައްކާ ފީތަކާއި އެހެނިހެން ޙަރަދުތައް ކުޑަކުރުމަށް މިހާރު ހުރި ގާނޫނުތަކާއި ގަވާއިދުތައް އިސްލާހުކޮށް، ކަސްޓަމަރުންނަށް ޗާޖުކުރާ އިންޓްރެސްޓާއި ފީތައް ސާފުކޮށް އެނގޭނެހެން ކަށަވަރު ކުރާނެ.
- ބޭންކްތަކުން ނަގާ ލޯނު ނުދެއްކޭ ހާލަތްތަކުގައި އޯވަޑިއު ޕީނަލް އިންޓްރެސްޓް ނަގާ ގޮތާއި އަދަދު މުރާޖައާކޮށް، ގާނޫނެއްގެ ދަށުން ސާފުވާނެ ގޮތަށް ބަޔާންކޮށް، އަހަރެއްގެ މައްޗަށް 1 ޕަސެންޓަށްވުރެ އިތުރުނުވުމާއި އެކު ކެޕްކުރުން
- ދިވެހިރާއްޖޭގެ ޕެންޝަނާ ބެހޭ ގާނޫނަށް ބައިނަލްއަގްވާމީ ބެސްޓް ޕްރެކްޓިސްތަކާ އެއްގޮތަށް ބަދަލުގެނެސް، އިންވެސްޓްކުރުމުގައި ހުރި ހުރަސްތައް ނައްތާލާ، ދިވެހިރާއްޖޭގެ ރިޓަޔަރމަންޓް ޕެންޝަން ސްކީމްގެ ބައިވެރިންނަށް އެކަށީގެންވާ ނަފާ ލިބޭނެ ގޮތްތައް ހޯދައިދޭނެ. މާލީ ދާއިރާއާ ގުޅުންހުރި މައްސަލަތައް ކޯޓުތަކުގައި ދިގުލައިގެން ނުގޮސް، ސްޕެޝަލައިޒް ކޯޓްތައް ނުވަތަ ޓްރައިބިއުނަލްތައް މެދުވެރިކޮށް، ހައްލުކުރެވޭނެ ނިޒާމެއް ގާއިމުކުރުން
- ބޭރުގެ ބޭންކުތަކާއި އިންވެސްޓްމަންޓް ބޭންކުތަކަށް ދިވެހިރާއްޖޭގައި ހިންގުމަށް ފަހިވާގޮތަށް ގާނޫނާއި ގަވާއިދުތައް އިސްލާހުކޮށް، ދިވެހި ވިޔަފާރިތަކުގެ ކުރިއެރުވުމަށް ފައިނޭންސިންގ ފޯރުކޮށްދިނުން.
- ކްރައުޑް ފަންޑިންގް، ޕީ-ޓު-ޕީ ލެންޑިންގ، އަދި ފިންޓެކާ ގުޅުންހުރި އިނޮވޭޝަންތަކަށް ޖާގަދިނުމުގެ ގޮތުން ޓްރާންސްޕޭރޭންޓް ސޭންޑްބޮކްސް ރެގިއުލޭޓަރީ ރެޖީމްތަކަކަށް ގާނޫނީ ގޮތުން ފަހިކޮށްދިނުން.
