ރައީސް އަބްދުالله ޔާމީންގެ ވެރިކަމުގައި ދަރުމަވަންތަ ހޮސްޕިޓަލު އިމާރާތްކުރީ ހުށަހެޅުނު އަގުތަކަށް ވުރެ މާ ބޮޑުކޮށް ކަމަށާއި އޭރު ހައުސިން މިނިސްޓަރަކަށް ހުންނެވި ޑރ. މުހައްމަދު މުއިއްޒު ގެކޮޅު އިމާރާތް ކުރެއްވީީ މަގާމުގެ ނުފޫޒު ބޭނުން ކުރައްވައިގެން ކަމުގެ ތުހުމަތު ޖުމްހޫރީ ޕާޓީގެ ލީޑަރު ގާސިމް އިބްރާހިމް މިއަދު ކުރައްވަފި އެވެ.
ޔާމީނުގެ ސަރުކާރުގައި ޖޭޕީ ވެސް އެންމެ ފުރަތަމަ ހިމެނުނެވެ. ޑރ. މުހައްމަދު ވަހީދުގެ ވެރިކަމުގައި ވެސް ހައުސިން މިނިސްޓަރަކަށް ހުންނެވި މުއިއްޒުއަށް ޔާމީނުގެ ވެރިކަމުގައި ވެސް އެ ޕޯޓްފޯލިއޯ ހަވާލުކުރި އެވެ. މިއަދު ނ. މަގޫދޫގައި ވާހަކަ ދައްކަވަމުން ގާސިމް ވަނީ މަގާމުގެ ނުފޫޒު ބޭނުން ކުރައްވައިގެން މުއިއްޒުގެ ގެކޮޅު "15 ބުރިއަށް" އުފުލާފައިވާ ކަމަށް ވިދާޅުވެފަ އެވެ.
"ޕީއެންސީން ނެރެފަ ހުރި ކެންޑިޑޭޓު, އެއީ ކުރީގެ ސަރުކާރުގެ ކޮން މަގާމެއްގައި ހުރި ކާކުތޯ. އޭރު ސަރުކާރަށް ވަޑައިގެންނެވި އިރު އަތްޕުޅުގައި އޮތީ ކޯއްޗެއްތޯ. ކިހާވަރެއްތޯ. ދެން އަޅުގަނޑުމެންނަށް މިހާރު ފެންނަނީ 15 ބުރިއަށް ގެ އަޅުއްވައިގެން މާލެ އުޅުއްވާ މަންޒަރު... ހިންގެވި ޕްރޮޖެކްޓެއްގެ ސައިޑުން ނަގާލި ކޮޅުދާއްޔަށް ނެގި އެތިކޮޅަކުންނޭ އެކަންކަން ނިމިފައި ވަނީ," މުއިއްޒުގެ ގެކޮޅު އިމާރާތްކުރެއްވި ގޮތާއި ގުޅޭ ގޮތުން ވާހަކަ ދައްކަވަމުން ގާސިމް ވިދާޅުވި އެވެ.
މުއިއްޒުގެ ގެ ކަމަށްވާ މ. ދިމްޔާތާ ގުޅޭ ގޮތުން ކުރެވޭ ތުހުމަތުތައް އޭނާ ދޮގުކުރައްވަ އެވެ. މީގެކުރިން މުއިއްޒު ވިދާޅުވެފައިވާ ގޮތުގައި އެއީ އޭނާގެ އަމިއްލަ ފައިސާ އާއި ބޭންކުން ލޯނެއް ނަގައިގެން ހަދާފައިވާ ގެއެކެވެ
ދަރުމަވަންތަ ހޮސްޕިޓަލް
ދަރުމަވަންތަ ހޮސްޕިޓަލް ހަވާލުކުރީ 100 މިލިއަން ބޮޑުކޮށް
އޭގެ އިތުރުން ދަރުމަވަންތަ ހޮސްޕިޓަލް ވެސް ޔާމީނުގެ ސަރުކާރުން ހަވާލުކުރީ އެކަން ކުރެވެން އޮތް ވަރަަށް ވުރެ މާ އަގުބޮޑުކޮށް ކަމަށް ގާސިމް ތުހުމަތު ކުރެއްވި އެވެ. އޭރު ސަރުކާރުގެ ހުރިހާ ބޮޑެތި މަޝްރޫއުތަކެއް ވިލަރެސް ކުރަމުންދިޔައީ މުއިއްޒުގެ ބެލުމުގެ ދަށުން ހައުސިން މިނިސްޓްރީންނެވެ.
"އެ ހޮސްޕިޓަލް އެޅިއިރު ސިންގަޕޫރުގެ ޓެންޑަރަށް ހުޅުވާލީމާ ދެ ކުންފުންޏަކުން ލި ކޯޓޭޝަން އޮތް މާލިއްޔަތު ކޮމިޓީގައި. އަޅުގަނޑުމެންނަށް, ރައްޔިތުންގެ މަޖިލީހަށް ނާންގާ. ގާނޫނުގައި އޮންނަ ގޮތުން މަޖިލީހުން ހުއްދަ ދިނީމަ ކުރެވޭނީ ވެސް. ނާންގާ 150 މިލިއަން ޑޮލަރަށް ހަވާލުކުރާ ކުންފުންޏަކާ ހަވާލުކުރީ," 18 ވަނަ މަޖިލީހުގައި މާލިއްޔަތު ކޮމިޓީގެ މެމްބަރުކަން ކުރެއްވި ގާސިމް ވިދާޅުވި އެވެ.
ދެ ހަފުތާއެއްހާ ދުވަސް ފަހުން ރައްޔިތުންގެ މަޖިލީހަށް އޭގެ ލިޔެކިޔުންތައް ލިބުނުއިރު 50 އަކަށް މިލިއަން ޑޮލަރަށް އެ ހޮސްޕިޓަލް އެޅުމަށް ކުންފުންޏަކުން ޕްރޮޕޯސަލް ހުށަހެޅިކަން އެނގުނު ކަމަށް ގާސިމް ވިދާޅުވި އެވެ.
"ހޮސްޕިޓަލް އިމާރާތްކުރި ކުންފުންޏަށް ވުރެ މާ ޓްރެކް ރެކޯޑް ރަނގަޅު މާ ޑައިނަމިކްކޮށް މާ ގިނަ މަސައްކަތްތަކެއް ކޮށްފައި ކުންފުންޏަކުން ހުށަހަޅާފައި އޮތް 50 މިލިއަން ޑޮލަރަށް އޮތް ޕްރޮޕޯސަލެއް ހުށަހަޅާފައި އޮއްވައި އެއަށް ނުދީ 150 މިލިއަން ޑޮލަރަށް އޮތް ޕާޓީއަށް ދިނީ," ގާސިމް ތުހުމަތު ކުރެއްވި އެވެ.
"ބަލަ ލޯނު ނަގައިގެންނޭ އެކަން ކުރީ. ހެޔޮވާނީ ކިހިނެއްތޯ. 100 މިލިއަން ޑޮލަރު ކޮންތާކަށް ތޯ ވަނީ,"
މި މަސައްކަތް ޔާމީނުގެ ސަރުކާރުން ކުރިއަށް ގެންދިޔައީ ސިންގަޕޫރުގެ ޝެންހުއާ ކުންފުންޏާ ހަވާލުކޮށްގެން 140 މިލިއަން ޑޮލަރު (2.1 ބިލިއަން ރުފިޔާ) ހަރަދުކޮށްގެންނެވެ. އެއީ ހަމައެކަނި އިމާރާތުގެ އަގެވެ. އެ އިމާރާތަށް ބޭނުންވާ ސާމާނު އޭގެ ތެރޭގައި ނުހިމެނެ އެވެ.
ގާސިމް ވަނީ އޭނާ ފަދަ ގައުމީ ހިދުމަތްތަކެއް ކުރައްވާފައި އެކަކު ވެސް މިފަހަރުގެ އިންތިހާބުގައި ވާދަނުކުރާ ކަމަށް ވިދާޅުވެފަ އެވެ. އަދި, އޭނާގެ މުޅި ހަޔާތުގައި ކުރި މަސައްކަތް ހަލާކުވާތަން ދެކެން ބޭނުން ނުވާތީ ވާދަކުރީ ކަމަށް ވިދާޅުވި އެވެ.
ގާސިމް ވަނީ މީގެ ކުރިން ދެ ފަހަރު ރިޔާސީ އިންތިހާބުގައި ވެސް ވާދަކުރައްވައިފަ އެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. އަދި 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ
ދެ އިންތިހާބުގައި ވެސް ދެ ވަަނަ ބުރަށް ދެވޭ ވަރަށް ގާސިމަށް ވޯޓު ނުލިބުނު ނަމަވެސް އެ ދެ ފަހަރު ވެސް އިންތިހާބު ކާމިޔާބުކުރީ ގާސިމްގެ ތާއީދު އޮތް ކެންޑިޑޭޓެވެ. އަދި ދެވަނަ ބުރުގައި، އެ ދެ އަހަރު ވެސް، ގާސިމް ތާއީދު ކުރެއްވީ ފުރަތަމަ ބުރުގައި ދެވަނައަށް އެންމެ ގިނަ ވޯޓު ލިބުނު ކެންޑިޑޭޓަށެވެ.
ރައީސް މުހައްމަދު ނަޝީދާއި ރައީސް އަބްދުﷲ ޔާމީން ވެސް ސަރުކާރު އެކުލަވާލީ ޖޭޕީއަށް ހިއްސާއެއްދޭ ގޮތަށެވެ.
އެންމެ ފަހުން 2018 ގެ ރިޔާސީ އިންތިހާބު އޮތް އިރު، ގާސިމް ހިމެނޭހެން އޭރުގެ އިދިކޮޅު ހުރިހާ ލީޑަރުން ތިބީ ޖަލު ހުކުމެއްގައި ނުވަތަ ހުކުމެއް ނެތި ބަންދުގަ އެވެ. އެހެންވެ ގާސިމްގެ ޖޭޕީގެ އިތުރަށް އެމްއާރުއެމާއި އަދާލަތު ޕާޓީން ތާއީދުކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށެވެ.
