އާބަންކޯ އަތުން ހުޅުމާލޭގެ މުނިސިޕަލް ހިދުމަތްތައް އަތުލައި މާލެ ސިޓީ ކައުންސިލުގެ ދަށަށް ބަދަލު ކުރިއަސް އެތަނުގައި މަސައްކަތްކުރާ މުވައްޒަފެއްގެ ވަޒީފާ ގެއްލި، މުސާރަ ކުޑަވުން ކަހަލަ ކަމެއް ނުހިނގާނެ ކަމަށް އިދިކޮޅު ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރިޔާސީ އިންތިހާބަށް ހުށަހެޅުއްވި މެނިފެސްޓޯގައި މުއިއްޒު ވަނީ ހުޅުމާލޭގެ މުނިސިޕަލް ހުރިހާ ހިދުމަތެއް ބެލެހެއްޓުން މާލެ ސިޓީ ކައުންސިލާ ހަވާލުކުރަން ހިމަނާފަ އެވެ. އެގޮތުން އިދިކޮޅުގެ މެނިފެސްޓޯގައި ހުށަހަޅާފައި ވަނީ، މިކަން ކުރަން ބޭނުންވާ ބަޖެޓާއި ވަސީލަތްތައް އާބަންކޯއިން ހޯދައިގެން ސިޓީ ކައުންސިލުން އެ މަސައްކަތްތައް ކުރާ ގޮތަށެވެ.
ނަމަވެސް، ސަރުކާރާއި އާބަންކޯގެ ވެރިން އޭނާ ދެއްކެވި ވާހަކަ އޮޅުވާލައިގެން އެ ކުންފުނީގެ މުވައްޒަފުންނަށް ވަޒީފާގެ ބިރު ދައްކަމުން ގެންދާ ކަމަށް، ށ. ކަނޑިތީމުގައި ބޭއްވި ކެމްޕެއިން ޖަލްސާގައި މުއިއްޒު ތުހުމަތުކުރެއްވި އެވެ.
"[އާބަންކޯއަކީ] ގާތްގަނޑަކަށް ހާހެއްހާ މުވައްޒަފުން އުޅޭ ތަނެއް އެއީ. އެ މުވައްޒަފުންނަށް ބިރު ދައްކަނީ ސަރުކާރުން. ތިބޭފުޅުން، މުނިސިޕަލް ޑިޕާޓްމަންޓުގައި އުޅޭ 500 އެއްހާ މުވައްޒަފުން ކައުންސިލަށް ބަދަލުކުރަންށޭ އެ އުޅޭނީ. ބަދަލުކުރީމައި މިހާރު ތި ލިބޭ ބޮޑު މުސާރައެއް ނުލިބޭނެޔޭ. ވަޒީފާ ގެއްލޭނެޔޭ. މަގުމަތި ވާނެޔޭ." އޭނާ ވިދާޅުވި އެވެ.
މިހެން ބަޔަކު 'ދޮގު' ވާހަކަ ފެތުރި ނަމަވެސް އެއްވެސް މީހަކަށް ވަޒީފާގެ ބިރެއް ނެތް ކަމުގެ ޔަގީންކަން މުއިއްޒު ދެއްވި އެވެ. އަދި 'ރިސޯސަސް' އޭނާ ބޭނުންކުރެއްވީ މުނިސިޕަލް ހިދުމަތްތައް ދިނުމަށް ބޭނުންވާ މެޝީނަރީ އާއި އާލާތްތަކަށް ކަމަށާއި، ވަޒީފާ އަދާކުރާ ތަން އިހުތިޔާރު ކުރުމުގެ ހައްގު ކޮންމެ މުވައްޒަފަކަށް ވެސް އޮންނާނެ ކަމަށް އޭނާ ވިދާޅުވި އެވެ.
"އަޅުގަނޑުމެންނަށް ބަޖެޓު ބަދަލުވީމައި އެ ބަދަލުވާން ބޭނުންވާ މުވައްޒަފުން ބަދަލުކޮށްފަ، ދެން އިތުރަށް ބޭނުންވާ މުވައްޒަފުން އެ ބަޖެޓު ތެރެއިން އަޅުގަނޑުމެން އިއުލާންކޮށްގެން ނަގާނަމޭ. އެއްވެސް މީހެއްގެ ވަޒީފާއެއް ނުގެއްލޭނެ. އަދި މުސާރައެއް ވެސް ކުޑައެއް ނުވާނެ," މުއިއްޒު ވިދާޅުވި އެވެ.
މުނިސިޕަލް ހިދުމަތްތައް ބަދަލުކުރުމުގެ އިތުރުން، ޕީޕީއެމް/ޕީއެންސީގެ ސަރުކާރެއްގައި މާލެ ސިޓީ ކައުންސިލްގެ ބަހާނުލާ ހުޅުމާލެއިން ބިން ވިއްކުން ނުވަތަ ކުއްޔަށްދިނުމުގެ އެއްވެސް ހަރަކާތެއް ނުހިންގޭނެ ކަމަށް ވެސް އިދިކޮޅުގެ މެނިފެސްޓޯގައި ވަނީ ހިމަނާފަ އެވެ.
މާލެ ސިޓީގެ މޭޔަރު ކަމާ ހަވާލުވެޑައިގަތުމަށް ފަހު ވެސް މުއިއްޒު ވަނީ ހުޅުމާލޭގެ މުނިސިޕަލް ހިދުމަތްތައް ސިޓީ ކައުންސިލުގެ ދަށަށް މަސައްކަތް ކުރައްވާފަ އެވެ. އޭރު އުފެދުނު މައްސަލަގަނޑުގެ ތެރެއިން މާލެ ސިޓީ ކައުންސިލުން ހުޅުމާލޭގެ ރަޖިސްޓްރީ ވެސް ބާތިލުކުރި އެވެ.
އެ ނިންމުން ބާތިލުކުރީ އާބަންކޯއިން ސިވިލް ކޯޓަށް މައްސަލަ ހުށަހެޅުމުންނެވެ. ސިޓީ ކައުންސިލުން ހައިކޯޓުގައި މި ނިންމުން އިސްތިއުނާފު ކުރުމުން އެ ކޯޓުން ވަނީ ދަށު ކޯޓުގެ ނިންމުން ދަމަހައްޓާފަ އެވެ.
