އިންތިހާބީ ދާއިރާތަކުގެ އާބާދީގެ ނިސްބަތުން ރައްޔިތުންގެ މަޖިލީހުގެ މެމްބަރުންގެ އަދަދު އިތުރުވާ ގޮތަށް މިހާރު އޮތް އޮތުން ބަދަލު ކުރަން ރައީސް އިބްރާހިމް މުހައްމަދު ސޯލިހުގެ ދެ ވަނަ ދައުރުގެ މެނިފެސްޓޯގައި ހިމަނައި، އެކަން އިއުލާނުކޮށްފި އެވެ.
ރައީސް ސޯލިހުގެ ދެ ވަނަ ދައުރެއް ހޯއްދަވަން ކުރައްވަމުން ގެންދަވާ ކެމްޕޭނުގައި ބ. ދަރަވަންދޫގައި މިރޭ ބޭއްވި ޖަލްސާގައި އިއުލާނު ކުރި "ހެޔޮވެރިކަން" މެނިފެސްޓޯގައި ދައުލަތުގެ ހިންގުން ވަރުގަދަކުރުމުގެ ސިޔާސަތުގެ ދަށުން ވަނީ މަޖިލީހުގެ މެންބަރުންގެ އަދަދު ހިފެހެއްޓުމަށް ގާނޫނު އަސާސީ އިސްލާހު ކުރުން ހިމަނައިފަ އެވެ. އަދި މަޖިލީސް އެކުލެވިގެންވާ ގޮތަށް ގެންނަންޖެހޭ ބަދަލުތައް ގެނައުމަށް ވެސް ހިމަނާފައި ވެއެވެ.
މިހާރު ހިނގަމުންދާ ރައްޔިތުންގެ މަޖިލީހުގައި ތިއްބަވަނީ 87 މެމްބަރުންނެވެ. ނަމަވެސް 2024 ގައި ހޮވާ މަޖިލީހަށް ހަ ގޮނޑިއެއް އިތުރު ކުރުމަށް އިލެކްޝަންސް ކޮމިޝަނުން ނިންމުމާއެކު, ދެން އިންތިހާބު ކުރާ މަޖިލީހުގެ ޖުމްލަ ގޮނޑީގެ އަދަދު 93 އަށް އަރާނެ އެވެ.
އެންމެ ފަހުން 2019 ގައި ހޮވި 19 ވަނަ ރައްޔިތުންގެ މަޖިލީހުގެ އިންތިހާބުގެ ކުރިންވެސް، 18 ވަނަ މަޖިލީހުގައި ތިބި ޖުމްލަ 85 މެންބަރުންގެ އަދަދަށް ދެ ގޮނޑި އިތުރުކުރި އެވެ.
މަޖިލީހުގެ މެމްބަރުން އިތުރުވުމުގެ މާލީ ބުރައަށް ބަލާއިރު، އިތުރުވާ ކޮންމެ މެމްބަރެއްގެ މުސާރައާއި އިނާޔަތްތަކަށް އެކަނި އަހަރަކު ގާތްގަނޑަކަށް އެއް މިލިއަން ރުފިޔާ ބަޖެޓުން ހަރަދުވެ އެވެ. އެއީ ފަސް އަހަރުގެ ދައުރަކަށް މިހާރު ތިބި 85 މެންބަރުންނަށް ބަލާނަމަ 425 މިލިއަން ރުފިޔާ އެވެ. އެއީ އަދި މަޖިލީހުގެ އިދާރީ މުވައްޒަފުންގެ މުސާރައާއި، ހިންގުމުގެ ހަރަދު ނުލަ އެވެ.
އެމްޑީޕީގެ އިތުރުން, އަލަށް އުފައްދާފައިވާ ދަ ޑިމޮކްރެޓްސް އިން ވެސް ވަނީ މަޖިލީސް އެކުލެވިގެންވާ ގޮތް ބަދަލު ކުރުމުގެ ސިޔާސަތެއް ނެރެފަ އެވެ. އެ ސިޔާސަތުގައި މަޖިލީހަށް ގެންނަން ހުށަހަޅާފައިވާ ބަދަލާއެކު ތިއްބަވާނީ ޖުމުލަ 76 މެމްބަރުންނެވެ.
މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމް ވެސް މި އިސްލާހު މަޖިލީހަށް ހުށަހެޅުއްވި ނަމަވެސް އެކަމަށް މަޖިލީހުން ތާއިދެއް ލިބިފައެއް ނުވެ އެވެ.
