ދައުލަތުގެ މުވައްޒަފުންނަށް ރަމަޟާން މަހުގެ ފަހު ދިހައިގެ ދުވަސްތަކު ގޭގައި ތިބެ ވަޒީފާ ހަދާ ކުރުމުގެ އުސޫލެއް ކަނޑައަޅަން ރައީސް އިބްރާހިމް މުހައްމަދު ސޯލިހު ވައުދުވެ ވަޑައިގެންފި އެވެ.
ރަމަޟާން މަހު ދީނީ އަޅުކަންތަކަށް ދިވެހިން ވަރަށް ހާއްސަ ސަމާލުކަމެއްދެ އެވެ. އެހެންވެ، ކޮންމެ ރަމަޟާން މަހެއްގައި ވެސް އޮފީސްތައް ހުޅުވާ ވަގުތު ފަސްކޮށް، މަސައްކަތުގެ ރަސްމީ ވަގުތު ކުޑަކުރެ އެވެ. ނަމަވެސް ގޭގައި ތިބެ ވަޒީފާގެ ޒިންމާ އަދާކުރެވޭނެ އުސޫލެއް މީގެ ކުރިން ނެތެވެ.
ބައެއް އޮފީސްތަކުގެ މަސައްކަތްތައް ގޭގައި ތިބެ އޮންލައިންކޮށް ކުރަން ފެށީ، ކޮވިޑު-19 ގެ ފުރަބަންދުގަ އެވެ.
"ރޯދަ މަހުގެ ފަހު 10 ދުވަހަކީ ގިނަ ބަޔަކު ރޭ އަޅުކަމުގައި މަޝްއޫލުވެގެންއުޅޭ ދުވަސްވަރުކަމަށްވާތީއާއި މުވައްޒަފުންނަށް ލުއި ފަސޭހަކުރުމަށްޓަކައި، މި ދުވަސްތަކުގައި ސަރުކާރުގެ މުވައްޒަފުން 'ވޯކް ފްރޮމް ހޯމް' މޮޑަލިޓީއިން މަސައްކަތްކުރާގޮތަށް ކަނޑައަޅާނެ،" މެނިފެސްޓޯގައި ލިޔެފައިވެ އެވެ.
ރައީސް ސޯލިހުގެ ދެ ވަނަ ދައުރެއް ހޯއްދަވަން ކުރައްވަމުން ގެންދަވާ ކެމްޕޭނުގައި ބ. ދަރަވަންދޫގައި މިރޭ ބޭއްވި ޖަލްސާގައި އިއުލާނު ކުރި "ހެޔޮވެރިކަން" މެނިފެސްޓޯގައި ދައުލަތުގެ ހިންގުން ވަރުގަދަ ކުރުމުގެ ވައުދުގެ ދަށުން މުވައްޒަފުންނާ ގުޅުންހުރި މުހިންމު ކަންތައްތަކެއް އެކުލަވާލާފައިވެ އެވެ. އެއީ؛
- ފްލެކްސިބަލް އަދި ރިމޯޓް ވޯކިން އުސޫލުން މަސައްކަތް ކުރެވޭނެ ގޮތް ހެދުން
- ހުރިހާ އިދާރާތަކަށް ޕޭ ހާމަނައިޒްކުރުން
- ވަޒީފާއާ ބެހޭ ގާނޫނު ޒަމާނީ ކުރުން
- ޒަމާނީ ސިވިލް ސާވިސްއެއް އުފެއްދުން
- ދައުލަތުގެ އިދާރާތަކުން ފޯރުކޮށްދޭ ހިދުމަތުގެ ފެންވަރު ވަޒަންކުރެވޭނެ ނިޒާމެއް ގާއިމުކުރުން
މި ސަރުކާރުން ވަނީ ނިމިގެން މިދާ ދައުރުގެ ތެރޭގައި ޕޭ ހާމަނައިޒޭޝަންގެ ދަށުން, ތައުލީމީ ދާއިރާއާއި, މަތީ ތައުލީމީ ދާއިރާގެ އިތުރުން ސިއްހީ ދާއިރާގެ މުވައްޒަފުންގެ މުސާރައަށް ހެޔޮ ބަދަލެއް ގެނެސްދީފަ އެވެ. އަދި ރައީސް ސޯލިހު ދެ ވަނަ ދައުރަކަށް އިންތިހާބުވެވަޑައިގެންފި ނަމަ އަންނަ ޖެނުއަރީ މަހުން ފެށިގެން ދައުލަތުގެ 44,281 މުވައްޒަފުންގެ މުސާރަ އެންމެ ދަށްވެގެން 40 ޕަސެންޓުން ބޮޑުކުރަން ވަނީ ވިދާޅުވެފަ އެވެ.
މިރޭ އިއުލާނު ކުރި ހެޔޮވެރިކަން ސިޔާސަތުގައި، 2008 ވަޒީފާއާބެހޭ ގާނޫނު އިސްލާހު ކުރުމަށް ވެސް ކަނޑައަޅާފައިވެ އެވެ. ނަމަވެސް އޭގެ ތަފުސީލްތަކެއް އަދި ހާމައެއް ނުކުރެ އެވެ.
"ވަޒީފާއާބެހޭ ޤާނޫނަކީ ވަޒީފާއަދާކުރާ ފަރާތްތަކާއި ވަޒީފާދޭ ފަރާތްތަކުގެ ހައްޤުތައް ފުރިހަމަގޮތުގައި ހޯދައިދޭ، ހިންގުމުގެ ނިޒާމުތަކަށް އައިސްފައިވާ ކުރިއެރުންތައް އެކުލެވޭ، ފްލެކްސިބަލް އަސާސްތަކެއްގެ މައްޗަށް ބައްޓަންކުރެވިފައިވާ ގާނޫނެއްގެ ގޮތަށް ބަދަލުކުރުމަށްޓަކައި ގާނޫނު އިސްލާހުކުރާނެ،" މެނިފެސްޓޯގައިވެ އެވެ.
ދައުލަތުގެ ހިންގުން ވަރުގަދަ ކުރަން އިތުރު ކަންކަން ވެސް މެނިފެސްޓޯގައި ހިމަނާފައިވެ އެވެ. އެއީ؛
ދައުލަތުގެ ހިންގުން ވަރުގަދަކުރުން
- ދައުލަތުގެ ހުރިހާ އިދާރާއަކުން އާންމުންނަށް ދޭ ހިދުމަތްތައް "ވަންގަވް" ނިޒާމު މެދުވެރިކޮށް ލިބޭނެ ގޮތް ހަދާނެ.
- ރައްޔިތުންގެ މަޖިލީހުގެ މެމްބަރުންގެ އަދަދު ކޮންމެ ފަސް އަހަރަކުން އިތުރު ނުވާނެ ގޮތް ހެދުން
- ސިވިލް ސާވިސް އަށް ގާނޫނީ އިސްލާހުތައް ގެނައުން
- ދައުލަތުގެ މުއައްސަސާތަކުގެ ފަރަގުތައް ނައްތާލައި، އޮޕަރޭޝަނަލް މިނިވަންކަމާއެކު ދައުލަތުގެ މުއައްސަސާތައް ހިންގޭނެ ޒަމާނީ އޮނިގަނޑެއް ގާއިމްކުރުމަށްޓަކައި، ޕަބްލިކް ސާވިސެއް ގާއިމުކުރުން
- މަސައްކަތުގެ ބާވަތުންނާއި، މެދުވެރިވާ ހާއްސަ ހާލަތްތަކުގެ ސަބަބުން، އާންމު އުސޫލުން މަސައްކަތަށް ހާޒިރުވުމަކާނުލާ ފްލެކްސިބަލް އަދި ރިމޯޓް ވޯރކިންގްގެ އުސޫލުން ދައުލަތުގެ އިދާރާތަކުގައި މަސައްކަތް ކުރެވޭނޭ ގޮތް ހަމަޖައްސައިދިނުމަށް ކަމާބެހޭ ގާނޫނުތަކަށް އިސްލާހުގެންނާނެ.
- ދައުލަތުގެ މުސާރަތައް އެއްހަމަ ކުރުން
- މިނިވަން މުއައްސަސާތަކުގެ ތެރެއިން އިހްތިސާސް ފުށުއަރާ ނުވަތަ އެއް މަސައްކަތްތައް ކުރާ މުއައްސަސާތައް ދެނެގަނެ، އެތަންތަނުގެ އިހްތިސާސް މުރާޖައާކޮށް، އެތަންތަނުގެ މަގުސަދު ހާސިލްވާނެ އުސޫލަކުން އެތަންތަން ހިންގުމަށް ބޭނުންވާ ބަދަލުތައް ގެންނާނެ.
- ރައްޔިތުންގެ ބައިވެރިވުން ހިމެނޭ ގޮތަށް ދައުލަތުގެ އިދާރާތަކުން ފޯރުކޮށްދޭ ހިދުމަތުގެ ފެންވަރު ވަޒަންކުރެވޭނެ ނިޒާމެއް ގާއިމްކުރާނެ.
