ފަނޑިޔާރުންނާއި ޖުޑިޝަރީގެ މުވައްޒަފުންނަށް އެކޮމޮޑޭޝަން ހަމަޖައްސަން އެމްޑީޕީ މެނިފެސްޓޯގައި ހިމަނައިފި

ފަނޑިޔާރުންނާއި ޖުޑިޝަރީގައި މަސައްކަތް ކުރާ މުވައްޒަފުންނަށް އެކޮމޮޑޭޭޝަން ހަމަޖައްސަން ވެރިކަން ހިންގާ އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހުގެ މެނިފެސްޓޯގައި ހިމަނައިފި އެވެ.

މިރޭ އެ ޕާޓީން އިފުތިތާހު ކުރި "ހެޔޮވެރިކަން" މެނިފެސްޓޯގައި "އަދުލު އިންސާފު ގާއިމްކުރުމުގެ ނިޒާމު ފުރިހަމަ ކުރުން" މި ސުރުހީގެ ދަށުން އޮތް ބައިގައި ބުނެފައި ވަނީ އެކޮމޮޑޭޝަން ހަމަޖައްސައިދޭނީ ރަށްވެހިވެފައިވާ ނޫން ރަށެއްގައި މަސައްކަތް ކުރާ މުވައްޒަފުންނަށް ކަމަށެވެ.

އޭގެ އިތުރުން ވެސް ޖުޑިޝަރީ ހިންގުމާ ގުޅޭ އެހެން ގިނަ ބަދަލުތަކެއް ގެންނަން ވެސް މެނިފެސްޓޯގައި އެބަ އޮތެވެ. އެގޮތުން، ވިޔަފާރިތަކުގެ އިތުރުން އާންމުންނަށް ބޭންކްރަޕްޓްސީ އިއުލާނު ކުރެވޭ ގޮތަށް ހެދުމަށް ވަނީ ވައުދުވެފަ އެވެ.

އަދުލު އިންސާފު ގާއިމްކުރުމުގެ ނިޒާމު ފުރިހަމަ ކުރުމާ ބައެއް ވައުދުތައް'

• ކޯޓުތަކަށް ހުށަހެޅޭ މައްސަލަތައް ހަލުވިކަމާއިއެކު ކުރިޔަށް ގެންދެވޭނެ އިންތިޒާމު ފަހިކޮށްދިނުމަށްޓަކައި، ކޯޓުތަކަށް ބޭނުންވާ ޖާގައާ ޒަމާނީ ވަސީލަތްތައް ގާއިމުކުރުން.
• ކޯޓުތަކުން ހިދުމަތް ހޯދާ ފަރާތްތަކަށް ލުއިފަސޭހަ ކޮށްދިނުމަށް، ގުޅިފައިވާ ޑިޖިޓަލް ވިއުގައެއްގެ ތެރެއިން ކޯޓުތަކަށް މައްސަލަ ހުށަހެޅުމާއި، މައްސަލައިގެ ލިޔުންތަކާއި އިދާރީ ކަންކަން ފުރިހަމަކުރެވޭނޭ ނިޒާމެއް ގާއިމުކުރުން.
• ކޯޓުތަކުގެ މަސައްކަތްތައް އަވަސްކުރުމަށްޓަކައި، ސްޕީޗް ޓު ޓެކްސްޓް ޓޫލްސް، ރެފެރެންސިންގ ޓޫލްސް ފަދަ އެސިސްޓިވް ޓޫލްސް ބޭނުންކުރުމަށް އަރޓިފިޝަލް އިންޓެލިޖެންސް (AI) އަށް އިންވެސްޓްކުރުން.
• ފަނޑިޔާރުންނާއި، ޖުޑީޝަރީގައި މަސައްކަތްކުރާ މުވައްޒަފުންގެ ފެންވަރު މަތިކުރުމަށްޓަކައި، ޖުޑީޝަލް އެކަޑެމީއަކީ، ފަނޑިޔާރުންނާއި، ޖުޑީޝަރީގެ މުވައްޒަފުންގެ ގާބިލުކަމާއި، މަސައްކަތުގެ ހުނަރު އަދާހަމަކޮށް ހިފެހެއްޓުމަށް ދެމެހެއްޓެނިވި ގޮތެއްގައި ތަމްރީނު ޕްރޮގްރާމުތައް ރާވާ ހިންގާ މަރުކަޒަކަށް ހެދުމަށް ބޭނުންވާ ވަސީލަތްތައް ގާއިމް ކުރުން.

އަނިޔާ ލިބޭ ފަރާތްތަކުން ބޭނުންވާ ނަމަ ކޯޓުތަކުގައި އެމީހުންގެ ބަސް އިއްވޭނެ ގޮތް ފަހިކޮށްދިނުމާއި ކޯޓު މެދުވެރިވެގެން މައްސަލަތައް ހައްލު ކުރުމަށް މީޑިއޭޝަން ތައާރަފު ކުރުމާއި ކޯޓުތަކުގެ މަސައްކަތަށް އާޓިފިޝަލް އިންޓެލިޖެންސް ބޭނުން ކުރެވޭނެ ގޮތް ހަދާނެ ކަމަށް ވެސް އެ މެނިފެސްޓޯގައި ލިޔެފައިވެ އެވެ.

މެނިފެސްޓޯގައި ހިމެނޭ ފާހަގަކޮށްލެވޭ އަނެއްކަމަކީ، ޖަލަށްލުމުގެ ބަދަލުގައި ރިހެބިލިޓޭޓް ކުރެވޭނެ ގޮތަށް އަލްޓަނޭޓިވް ސެންޓެންސިން ތައާރަފު ކުރުމާއި ކޯޓުތަކުގެ މަސައްކަތްތައް ޑިޖިޓަލް ކުރުމެވެ.

ޖުޑީޝަލް އެކަޑަމީ އާއި ކޯޓުތަކަށް ބޭނުންވާ ވަސީލަތްތައް ހަމަކޮށް ފުރިހަމަ ކުރުން ވެސް މެނިފެސްޓޯގައި ހިމަނާފައިވެ އެވެ.