ދެވަނަ ބުރަކަށް ގޮސް ކޯލިޝަނެއް ހަދައިގެން ބައި އަޅަން ނޫޅެ އެމްޑީޕީ ހިމެނޭ ކޯލިޝަނާ ގުޅުމަށް ރައީސް އިބްރާހިމް މުހައްމަދު ސޯލިހު އެމަނިކުފާނުގެ ބައެއް ވާދަވެރިންނަށް ދައުވަތު ދެއްވައިފި އެވެ.
ރިޔާސީ އިންތިހާބުގެ ކެމްޕޭނުގައި ބ. ކެންދުއަށް ވަޑައިގެން ބޭއްވެވި ޖަލްސާގައި ރައީސް ވިދާޅުވީ ރިޔާސީ އިންތިހާބަށް ނިކުމެ ތިބި ކެންޑިޑޭޓުންގެ ތެރެއިން ސީރިއަސްކޮށް މަސައްކަތް މަސައްކަތް ކުރަނީ މަދު ކެންޑިޑޭޓުން ކަމަށެވެ. އަދި ދެން ތިބި ކެންޑިޑޭޓުން މަސައްކަތް ކުރަނީ އިންތިހާބު ދެވަނަ ބުރަކަށް ގެންދިއުމަށް ކަމަށެވެ.
ބެލެވޭ ގޮތުގައި އެމަނިކުފާނު އެ އިޝާރާތްކުރެއްވީ ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހީމަށެވެ. އެހެން ނަމަވެސް ރައީސް ވަކި ބޭފުޅެއްގެ ނަން ވިދާޅެއް ނުވެ އެވެ.
ބައެއް ކެންޑިޑޭޓުން މަސައްކަތް ކުރައްވަނީ ދެވަނަ ބުރުގައި ކޯލިޝަން ހަދައިގެން, ސަރުކާރު ތެރެއިން ވަޒީފާތައް ހޯދަން ކަމަށް ތުހުމަތު ކުރައްވައި ރައީސް ވިދާޅުވީ, އެކަން ނުވާތަން ފެނުމުން ބައެއް ބޭފުޅުން ވަރަށް ކޯފާ އިސްވެވަޑައިގަންނަވާ ކަމަށެވެ.
އެމަނިކުފާނަށް ރަށްރަށުގައި އޮތް ތާއީދަށް އިޝާރާތް ކުރައްވާ ރައީސް ވިދާޅުވީ ހުރިހާ ކެންޑިޑޭޓުން ވެސް އެކަމާ ވިސްނަން އެދިވަޑައިގަންނަވާ ކަމަށެވެ. އެ މޭރުމުން ވާހަކަދައްކަވަމުން އެމަނިކުފާނު ވަނީ ޅެން ބައިތަކުން ކެންޑިޑޭޓުންނަށް އިލްތިމާސެއް ކުރައްވާފަ އެވެ.
"ޖަންގަލީގައި ވޭ މަގުތައް އެކިގޮތަށް އެކި ގޮތްގޮތަށް. އަންތަރީހަށް ނުމެއަރައި, ވިސްނުން އިހަށް އިސްކުރޭ"
ރައީސް ވިދާޅުވީ މި އިންތިހާބު އޮތީ ފުރަތަމަ ބުރުން ނިމިފައި ކަމަށާއި, އޭގައި ޝައްކު ކުރާނެ ޖާގައެއް ނެތް ކަމަށެވެ. އެހެން ވިދާޅުވެ, ރައީސް ވަނީ ވާދަވެރިންނަށް އެމަނިކުފާނާ ގުޅިވަޑައިގެންނެވުމަށް ދައުވަތު ދެއްވާފަ އެވެ.
"ދެން ވެސް ކުރައްވަންވީ ކަމަކީ ވިސްނުން އިސްކުރައްވާ އަޅުގަނޑުމެންނާ އެއްކޮޅަށް އެ ހުރިހާ ބޭފުޅުން އަރައި ވަޑައިގަންނަވަންވީ. އެ ބޭފުޅުންނަށް ފައިދާ ހުރި ގޮތަކީ ވެސް އެއީ. އެ ޕާޓީތަކަށް ވެސް ފައިދާ ހުރި ގޮތަކީ އެއީ" ރައީސް ސޯލިހު ވިދާޅުވި އެވެ.
ވާދަވެރި ކެންޑިޑޭޓުންނަށް ރައީސް އިލްތިމާސް ކުރެއްވީ ދެވަނަ ބުރަކަށް އިންތިހާބު ގެންގޮސްގެން ބައިނަގަން ނޫޅުމަށެވެ. އަދި އެކަން ކުރުމުގެ ފުރުސަތެއް ރައްޔިތުން ނުދޭނެ ކަމަށް ވެސް ރައީސް ވިދާޅުވި އެވެ. ދެވަނަ ބުރެއްގައި ކޯލިޝަން ހަދައިގެން އުފެދުނު ކޮންމެ ސަރުކާރަކަށް ވީ ގޮތް ރައްޔިތުންނަށް އެނގޭނެ ކަމަށް ވެސް އެމަނިކުފާނު ވިދާޅުވި އެވެ.
"2008ގަ ވެސް ވީ އެހެން. ފުރަތަމަ ބުރުގައި ވަކިވަކިން ގޮސް ކާމިޔާބު ނުވީމައި, ދެވަނަ ބުރުގަ ކޯލިޝަނެއް ހެދީ. އެ ކުޑަކުޑަ ވަގުތުކޮޅެއްގެ ތެރޭގައި ނުލިބޭ ރަނގަޅު މަޝްވަރާއެއް ކުރާކަށެއް. ދެން ޖެހޭނީ އެއްޗެއްގައި ސޮއިކޮށްގެން ސަރުކާރެއް ފޯމް ކުރަން." ދެވަނަ ބުރުގައި އުފައްދާ ކޯލިޝަން މާ ގިނަ ދުވަހެއް ނުވެ ނިމިގެންދާކަން ފާހަގަ ކުރައްވާ ރައީސް ވިދާޅުވި އެވެ.
އެމަނިކުފާނު ވިދާޅުވީ 2008ގައި އުފެއްދި ކޯލިޝަން 21 ދުވަސް ނުވަނީސް ރޫޅިގެން ދިޔަ ކަމަށާއި, 2013ގައި ވެސް އެކުލަވާލި ކޯލިޝަން 6 މަސް ދުވަސް ނުވަނީސް ރޫޅިގެން ދިޔަ ކަމަށެވެ. އެމަނިކުފާނު ވިދާޅުވި ގޮތުގައި 2018ގައި ފުރަތަމަ ބުރުގައި ކޯލިޝަން ހަދައިގެން ނިކުތީ ކުރީ އިންތިހާބުތަކުގެ ތަޖުރިބާގެ އަލީގައި ކަމަށެވެ.
"ފުރަތަމަ ދުވަހު އިންތިހާބަށް ނިކުތް އިރުވެސް އެނގޭ އަޅުގަނޑުމެންގެ ތެރޭގައި ސިޔާސީ ހިޔާލު ތަފާތުވުން އެބަހުރިކަން. އެހެން ނަމަވެސް މަޝްވަރާ ކޮށްގެން ކަންތައް ނިންމޭނެކަން." ރައްޔިތުންނަށް ހިދުމަތް ކުރުމުގައި ފަސް އަހަރު ދެމިއޮވެވުނީ މަޝްވަރާއާއެކުކަން ފާހަގަކުރައްވާ ރައީސް ވިދާޅުވި އެވެ.
ރައީސް ވިދާޅުވި ގޮތުގައި 2023ގެ އިންތިހާބުގައި އެކަނި ނިކުމެ ވަޑައިގެންނެވި ނަމަ ދެވަނަ ބުރަކަށް ދިއުމަކީ ގާތް ކަމެކެވެ. އެމަނިކުފާނު ވިދާޅުވީ މިހާރު އެކުލަވާލާފައިވާ ކޯލިޝަނާއެކު އިންތިހާބު ބޮޑުތަނުން ކާމިޔާބު ކުރައްވާ, ރައްޔިތުން އެދޭ ތަރައްގީ ގެނެސްދެއްވާނެ ކަމަށެވެ.
"ގައުމެއް ހިންގާއިރު މަޝްވަރާއަކީ މުހިންމު އެއްޗެއް. ތިމާ އަމިއްލައަށް ފެންނަ ގޮތް އެއީ ހަމައެކަނި ގޮތް ކަމަށް ބަލައިގެން ނުހިންގޭނެ. ކޮންމެ ދެ މީހަކީ ތަފާތު ހިޔާލުގެ ބައެއް. ބޭނުންތައް ތަފާތު ވޭ. އެ އަޑު އަހަން ޖެހޭ." ވެރިކަން ކުރުމުގައި މަޝްވަރާގެ މުހިންމު ކަން ފާހަގަކުރައްވަމުން ރައީސް ވިދާޅުވި އެވެ.
ރައީސް ވިދާޅުވީ މި ސަރުކާރުގެ ހުރިހާ ކަމެއް ވެސް ނިންމަމުން ދިޔައީ ލަފައާއި މަޝްވަރާގެ އަލީގައި ކަމަށެވެ. އެގޮތުން, މިނިމަމް ވޭޖާއި ސާވިސް ޗާޖު ކަނޑައެޅުމާއި, ސްކޫލު ޗުއްޓީ ބަދަލު ކުރުން ފަދަ ރައްޔިތުންނާ ގުޅުންހުރި ކަންކަން ނިންމެވީ އެތައް ދުވަހެއްގެ މަޝްވަރާއަކާއެކު ކަމަށް ރައީސް ވިދާޅުވި އެވެ.
