ސެޕްޓެމްބަރު 9 ގައި ބާއްވާ ރިޔާސީ އިންތިހާބުގެ ކެމްޕޭނުގައި އެމްޑީޕީގެ ކެންޑިޑޭޓު, ރައީސް އިބްރާހިމް މުހައްމަދު ސޯލިހު 100 އަށް ވުރެ ގިނަ ރަށަށް ޒިޔާރަތް ކުރައްވައިފި އެވެ.
ހުރިހާ ރަށަށް ދަތުރު ކުރެއްވުމަށް ރައީސް ސޯލިހުގެ ކެމްޕޭން ޓީމުން ވަނީ އަމާޒު ހިފައިފަ އެވެ. މިދިޔަ ޖުލައި 9 ވަނަ ދުވަހު ރައީސް ސޯލިހުގެ ކެމްޕޭން ފެއްޓެވީ ށ އަތޮޅު ކޮމަންޑޫންނެވެ. އެ މަނިކުފާނުގެ ކެމްޕޭނުގެ 100 ވަނަ ރަށެއްގެ ގޮތުގައި ވަޑައިގެންނެވީ އިއްޔެ ބ އަތޮޅު ކެންދު އަށެވެ.
މިހާތަނަށް ރައީސް ސޯލިހު ވަނީ ހއ, ށ, ނ, ވ, މ, ދ, ގއ ހުރިހާ ރަށަކަށް ވަޑައިގެންފަ އެވެ. އއ. ހިމަންދު އާއި ގދ. ތިނަދޫ ފިޔަވައި އެ ދެ އަތޮޅުގެ ހުރިހާ ރަށަކަށް ވެސް ވަޑައިގެންނެވި އެވެ. ހދ. ހަނިމާދު އާއި, ކ. ގުޅި, ގުރައިދޫ އަދި މާފުއްޓަށްޓަށް ވަޑައިގަތެވެ. އަދި ފުވައްމުލަކު ސިޓީ އަށް ވެސް އެ މަނިކުފާނު ވަޑައިގަތެވެ.
ރައީސް ސޯލިހު ކެމްޕޭނުގައި ގއ އަތޮޅުގައި; އެމަނިކުފާނު ވަނީ ކެމްޕޭނުގައި 100 ރަށަށް ވަޑައިގެންފައި -- ފޮޓޯ: އިޔާން/ އަދަދު
މިހާރު ބ އަތޮޅަށް ކުރައްވަމުން ގެންދަވާ ދަތުރުގައި މިއަދު ހެނދުނު ކުޑަރިކިލަށް ވަޑައިގަންނަވާނެ އެވެ. އެއީ އެ މަނިކުފާނުގެ 102 ވަނަ ރަށެވެ. އެއަށް ފަހު ދެން ވަޑައިގަންނަވާނީ ރ. އަތޮޅަށެވެ.
ސިއްހަތު ތަން ނުދިނުމުގެ ސަބަބުން ދަތުރެއް މެދުކަނޑާލަން ޖެހުނުއިރު, މޫސުން ތަން ނުދިނުމުގެ ސަބަބުން ވެސް ރައީސް ސޯލިހުގެ ދަތުރެއް އެއް ދުވަސް ފަސް ކުރަން ޖެހުނެވެ. އެމަނިކުފާނުގެ ކެމްޕޭން ތަރުޖަމާނު މާރިޔާ އަހުމަދު ދީދީ ވިދާޅުވީ ސިއްހަތު ތަންނުދިނުން ފަދަ ކަމެއް ދިމާވެގެން ހުއްޓުން ނާރާ ނަމަ ހުރިހާ ރަށަކަށް ވަޑައިގަންނަވާނެ އެވެ.
ރައީސް ސޯލިހު ކެމްޕޭނުގައި ގއ. ދާންދޫގައި; އެމަނިކުފާނު ވަނީ ކެމްޕޭނުގައި 100 ރަށަށް ދަތުރުކުރައްވާފައި -- ފޮޓޯ: އިޔާން/ އަދަދު
ރާއްޖޭގައި އޮންނަނީ މީހުން ދިރިއުޅޭ ޖުމްލަ 187 ރަށެވެ. ކެމްޕޭނުގައި ކުރިއަށް އޮތް 16 ދުވަސް ތެރޭގައި އެ މަނިކުފާނު 80 އަށް ވުރެ ގިނަ ރަށަށް ވަޑައިގަންނަވަންޖެހޭނެ އެވެ.
ރައީސް ސޯލިހު ފިޔަވައި ރާއްޖޭގެ ހުރިހާ ރަށަކަށް ދަތުރުކުރައްވަން އެހެން ކެންޑިޑޭޓަކު ވިދާޅުވެފައެއް ނެތެވެ.
ރައީސް ސޯލިހުގެ އިތުރުން ސިޔާސީ ޕާޓީތަކުން ރިޔާސީ އިންތިހާބުގައި ވާދަ ކުރައްވަނީ ޕީޕީއެމް ޕީއެންސީގެ މުހައްމަދު މުއިއްޒާއި ޖުމްހޫރީ ޕާޓީގެ ގާސިމް އިބްރާހިމާއި ޑިމޮކްރެޓްސްގެ އިލްޔާސް ލަބީބާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން، ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި އުމަރު ނަސީރާއި ހަސަން ޒަމީލް އަމިއްލަ ގޮތުން ވާދަކުރައްވަ އެވެ.
