ރައްޔިތުންނަށް ހިދުމަތް ކުރަން ހުރި ފައިސާ ނިމިދިޔަ ސަރުކާރުން ހަރަދު ކުރީ ޕެޕާ ސްޕްރޭ އާއި މުގުރަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕޭނުގައި ބ އަތޮޅު ކަމަދުއަށް ވަޑައިގެން, ސަރުކާރުން ޓެކްސް ފައިސާ ބޭނުން ކުރާ ކަމަށް ބުނެ އިދިކޮޅުން ކުރާ ތުހުމަތަށް ރައްދު ދެއްވަމުން ރައީސް ވިދާޅުވީ ދައުލަތަށް ލިބޭ ފައިސާ ހަރަދު ކުރަން ވާނީ ރައްޔިތުންނަށް އެންމެ ފައިދާ ހުރި ގޮތަށް ނަމަވެސް ކުރިން ކަންތައް ކުރީ އެހެން ނޫން ކަމަށެވެ.
"ތެދެއް. ޓެކްސް ފައިސާއިން އެކަން މިކުރަނީ. އެއީ އެކަން ކުރަންޖެހޭ ގޮތް. ދައުލަތަށް ލިބޭ ފައިސާ ހަރަދު ކުރަން ވާނީ ރައްޔިތުންނަށް އެންމެ ފައިދާ ހުރި ގޮތަކަށް. ދައުލަތުގެ މުދާ ކުއްޔަށް ދީގެން ލިބޭ ފައިސާ ހަރަދު ކުރަން ޖެހޭނީ ރައްޔިތުންނަށް،" ރައީސް ވިދާޅުވި އެވެ.
އެހެން ވިދާޅުވެ އެމަނިކުފާނު ވަނީ, ކުރީ ސަރުކާރުގައި ވެރިކަން ކުރި ފަރާތްތަކުން, ދައުލަތުގެ ފައިސާއިން ރައްޔިތުންނަށް ހަރަދު ނުކުރެވުނީ ކީއްވެގެންތޯ ސުވާލު ކުރައްވާފަ އެވެ. ހުރިހާ ބާރަކާއި މަޖިލީހުގެ މެޖޯރިޓީއާއެކު, ފަސް އަހަރުގެ ފުރުސަތެއް އެ ސަރުކާރަށް ވެސް ލިބުނު ކަން ރައީސް ފާހަގަކުރެއްވި އެވެ.
"އެކަމަކު 2013-2018 އަށް ވެރިކަން ކުރި ފަރާތްތަކަށް އެކަން ނުކުރެވުނީ ކީއްވެގެންތޯ އަޅުގަނޑުމެން ސުވާލު ކޮށްލަން ޖެހޭ. ފަސް އަހަރުގެ ފުރުސަތެއް ރައްޔިތުން ދެއްވި ހުރިހާ ބާރަކާ އެކީގައި. މަޖިލީހުގެ ބޮޑު މެޖޯރިޓީއަކާ އެކީގައި. އެހެން ނަމަވެސް ނުކުރެވުނީ ކީއްވެގެންކަން އަޅުގަނޑުމެންނަށް ވަރަށް ސާފުކޮށް އެބަ އެނގޭ،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ކުރީގެ ރައީސް އަބްދުالله ޔާމީންގެ ސަރުކާރުގައި ރައްޔިތުންނަށް ހިދުމަތްކޮށް ނުދެެވުނީ ދައުލަތުގެ ފައިސާއަށް ހިޔާނާތްތެރިވެ, ބޮޑެތި ފަޅުތަކާއި ބޮޑެތި ރަށްތައް ކުއްޔަށް ދީގެން ދައުލަތުގެ އާމްދަނީއަށް, ބަޖެޓަށް ވައްދަންވީ ފައިސާ ގެއްލުވާލާ, އަމިއްލަ އެކައުންޓަށް ޖަމާ ކުރުމުންނެވެ.
"ފުރަތަމަ ކަމަކަށް ދައުލަތުގެ ފައިސާއަށް ހިޔާނާތްތެރިވީ, އިހުމާލުވީ. ބޮޑެތި ފަޅުތަކާއި ބޮޑެތި ރަށްތައް ކުއްޔަށް ދީގެން ދައުލަތުގެ އާމްދަނީއަށް, ބަޖެޓަށް ވައްދަންވީ ފައިސާ ގެއްލުވާލީ. އަމިއްލަ އެކައުންޓަށް ޖަމާކުރީ،" އޭގެ ސަބަބުން, ހަރަދު ކުރާނެ ފައިސާއެއް ދައުލަތުގައި ނެތްކަން ފާހަގަކުރައްވާ ރައީސް ވިދާޅުވި އެވެ.
ކަމަދޫ ބަނދަރު ބައްދަލުވުމުގައި ވާހަކަދައްކަވަމުން ރައީސް ވިދާޅުވީ ކުރިން ސަރުކާރަށް ލިބުނު އެއްޗެއް ވެއްޖިއްޔާ ހަރަދު ކުރަން ޖެހުނީ ޕެޕާ ސްޕްރޭ އާއި ރައްޔިތުން ޖަލުގައި ބައިތިއްބަން ކަމަށެވެ. އަދި ފުލުސް އޮފީހުގެ ބަޖެޓަށް ބަލައިފި ނަމަ, މުގުރާއި ޕެޕާ ސްޕްރޭއަށް ކޮށްފައި ހުރި ހަރަދު ފެންނާނެ ކަމަށް ވެސް އެމަނިކުފާނު ވިދާޅުވި އެވެ.
"ލިބުނު އެއްޗެއް ވެއްޖިއްޔާ ހަރަދު ކުރަން ޖެހުނީ ޕެޕާ ސްޕްރޭއާއި ރައްޔިތުން ޖަލުގައި ބައިތިއްބަން. އަމާންކަން ގެއްލިފައި އޮތީ. ގަދަބާރުން ވެރިކަން ކުރަން އުޅުނީ, ތިޔަ ބޭފުޅުން ފުލުސް އޮފީހުގެ ބަޖެޓަށް ބައްލަވާލީމަ އެނގިވަޑައިގަންނަވާނެ. އޭރު މުގުރަށާއި ޕެޕާ ސްޕްރޭއަށް ކޮށްފައި ހުރި ހަރަދު،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި މިއަދު ދެ ވަނަ ދައުރަކަށް ކުރިމަތިލުމުގެ ފުރުސަތު ލިބުނީ ސިޔާސީ ހަލަބޮލިކަމުގެ ތެރެއަށް ނުގޮސް, ސިޔާސީ ވާދަވެރިންނަށް ބަސް ބުނުމުގެ ހައްގު ދޫކޮށްލުމުން ކަމަށެވެ. އެމަނިކުފާނު ވިދާޅުވީ ރާއްޖޭގައި ޑިމޮކްރެޓިކް ވެރިކަމެއް ހިންގާ ކަމަށް ވަންޏާ އެ ފުރުސަތު އޮންނަން ޖެހޭނެ ކަމަށެވެ.
"ސިޔާސީ ވާދަވެރިންނަށް ބަސް ބުނުމުގެ ހައްގު ދޫކޮށްލީ އަޅުގަނޑުމެން. ފާޑުކިއަން ފުރުސަތު ދިނީ. ރާއްޖޭގައި ޑިމޮކްރެޓިކް ވެރިކަމެއް ހިންގާ ކަމަށް ވަންޏާ އެ ފުރުސަތު އޮންނަން ޖެހޭނެ،" އެމަނިކުފާނު ވިދާޅުވި އެވެ.
ރައީސް ވިދާޅުވީ ސިޔާސީ ހަލަބޮލި ކަމަށް ވަގުތު ހޭދަ ނުކުރައްވާ, އަމާޒު ބެހެއްޓެވީ ރައްޔިތުންނަށްވީ ވައުދުތައް ފުއްދަން ކަމަށެވެ. އަދި އެކަން މިއަދު ރާއްޖޭގެ އެކި ކަންކޮޅުތަކުން ފެންނަމުންދާ ކަމަށް ރައީސް ވިދާޅުވި އެވެ.
ރައީސް ސޯލިހުގެ އިތުރުން ރިޔާސީ އިންތިހާބުގައި ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި ޕީޕީއެމް/ޕީއެންސީގެ ޑރ. މުހައްމަދު މުއިއްޒާއި ދަ ޑިމޮކްރެޓްސްގެ އިލްޔާސް ލަބީބާއި އެމްއެންޕީގެ މުހައްމަދު ނާޒިމެވެ.
އޭގެ އިތުރުން ކުރީގެ ހޯމް މިނިސްޓަރު އުމަރު ނަސީރާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި ކުރީގެ ޑެޕިއުޓީ މިނިސްޓަރު ހަސަން ޒަމީލު ވެސް ރިޔާސީ ރޭހުގައި އަމިއްލަ ގޮތުން ވާދަ ކުރައްވަ އެވެ.
