ރައީސް އިބްރާހިމް މުހައްމަދު ސޯލިހުގެ ކެމްޕެއިން ލޯންޗުގެ މިސްރާބު ބ. އަތޮޅާ ދިމާއަށް ސަމުގާ ބެހެއްޓުމާއެކު، މުޅި ސޯޝަލް މީޑިއާގައި ދައުރުވީ އޭދަފުށީގެ ކެމްޕެއިން ފޯރީގެ ފޮޓޯތަކެވެ. ރަށްރަށުގައި ސިޔާސީ ފޯރި ކުޑަވަމުން ދިޔަ ނަމަވެސް އޭދަފުށީގައި އެ ފޯރި ވަރަށް ގަދަކަން އެރަށުގެ މަލަމަތިން ފެންނަން ހުއްޓެވެ.
އޭދަފުށީ ބަނދަރުގައި ހުރި ހަޓުގައި މައި ދެޕާޓީގެ ކުލަތަކުން ދަމާފައިވާ ފޮތިތަކަކީ ގިނަ ބަޔެއްގެ ލޮލުގައި އަޅައިގަތް ކަމެކެވެ. އޭދަފުށީގައި، ދިދަ ފަތިތައް ދެމުމުގައި ދެ ޕާޓީގެ ސަޕޯޓަރުން ވާދައެއްގައި އުޅުނުކަން ފޮޓޯތަކުންނާއި ވީޑިއޯތަކުން ފެނުނެވެ. މިފަހަރުގެ ކެމްޕެއިނުގައި އެކި ރަށްރަށުގައި އިދިކޮޅުން މުޒާހަރާތައް ވެސް ކޮށްފައި ވާތީ އޭދަފުށި ކަހަަލަ ސިޔާސީ ފޯރި ގަދަ ރަށަކުން އެކަން އިތުރަށް ފެންނާނެ ކަމަށް ހީކުރެވުނެވެ.
އޭދަފުށީ ބަނދަރުގައި ހުރި ހަޓްގައި ދެޕާޓީގެ ދިދަ ދަމާފައި. ފޮޓޯ: އޭދަފުށި ޓައިމްސް
އެކަމަކު ރައީސް ސޯލިހު މިއަދު މެންދުރުފަހު ވަޑައިގަތް ވަގުތު އެފަދަ އެއްވެސް ކަމެއް މި ރަށުގައި ނެތެވެ.
މަލްޓި-ޕާޓީ ޑިމޮކްރެސީ ރާއްޖެއަށް ތައާރަފުވި ފަހުން އޭދަފުއްޓަކީ އަބަދުވެސް އެމްޑީޕީއާ ވާދަވެރި ޕާޓީއަށް މެޖޯރިޓީ އޮންނަ ރަށެކެވެ. ކުރިން ޑީއާރުޕީ، އަދި މިހާރު ޕީޕީއެމަށެވެ. ނަމަވެސް އެހެން ރަށްރަށުން ފެނުނު ޕީޕީއެމްގެ ލީޑަރު، ކުރީގެ ރައީސް އަބްދުﷲ ޔާމީން މިނިވަން ކުރަން ގޮވާލައި ގެންދާ އިހުތިޖާޖު ވެސް ނުފެނެ އެވެ. ނުރުހުން ފާޅުކޮށް ލިޔެފައިވާ ބެނާއެއް ވެސް ނެތެވެ.
ރައީސް ސޯލިހު ވަޑައިގަންނަވާތީ، ބަނދަރު ސަރަހައްދުގައި ފޮޓޯ ނަގަން ހުރި އޭދަފުށި ޓައިމްސްގެ ނޫސްވެރިޔާ ތޯރިގު ބުނީ އެ ރަށަކީ ސިޔާސީ ފޯރި ބޮޑުވިޔަސް ވަރަށް ގުޅިގެން އެއްބައިވަންތަކަމާ އެކީ މީހުން ދިރިއުޅޭ ރަށެއް ކަމަށެވެ. އެއްވެސް ޒާތެއްގެ ހަމަނުޖެހުމަށް ހިންގަން ބޭނުން ނުވާތީ ދެ ޕާޓީގެ ސަޕޯޓަރުން ވެސް އެއްބަސްވީ އެ ކަމަށް ކަމަށެވެ.
"އެމްޑީޕީ ޖަގަހައިގައި ބައެއް ގަޑީގައި ތިބޭނެ ޕީޕީއެމްގެ ސަޕޯޓަރުން، ހަމަ އެ ގޮތަށް ޕީޕީއެމް ޖަގަހައިގައި ވާހަކަ ދައްކަން ދެ ޕާޓީގެ ސަޕޯޓަރުން ވެސް އުޅޭނެ، ވަރަށް އެކީގައި ދެ ޕާޓީ ސަޕޯޓަރުން އުޅޭނީ،" ރަޖިސްޓްރީގައި ގާތްގަނޑަށް 3000 އެއްހާ މީހުން، އަދި ރަށުގައި ގާތްގަނޑަކަށް 2000 އެއްހާ މީހުން އުޅޭ އޭދަފުށި ތޯރިގު ސިފަކޮށްދިނެވެ.
އަޑުއުފުލުމުގެ އެއްވެސް ހަރަކާތެއް ނެތުމުން، އެ ކަމާ ގުޅޭ ގޮތުން ސުވާލުކުރުން އޭދަފުށި ކައުންސިލްގެ ނައިބު ރައީސް އަލީ ޝަފީގު ވިދާޅުވީ ރިޔާސީ ކެންޑިޑޭޓުންގެ ރަސްމީ ކެމްޕެއިންގެ ހަރަކާތްތައް ފެށި، އިލެކްޝަންސް ކޮމިޝަންގެ ސުލޫކީ ގައިޑްލައިނެއް ވެސް އޮތުމުން އެ ކަމަށް އިހުތިރާމު ކުރަން ބޭނުންވާތީ އެއްވެސް އިހުތިޖާޖެއް ނުރޭވީ ކަމަށެވެ.
"ކުރީ ރެޔަކު ބޭއްވިން، ޕީޕީއެމްގެ ބައްދަލުވުމެއް، މި ރަށު ޕީޕީއެމްގެ އިސް ހަރަކާތްތެރިން، އަޅުގަނޑުމެން ނިންމީ އެއްވެސް ހަރަކާތެއް ނުބޭއްވުމަށް، އެއީ އަޅުގަނޑު ވެސް ގަބޫލުކުރާ ގޮތް، ކޮންމެ މީހަކަށް ވެސް މިނިވަންކަމާ އެކު ކެމްޕެއިން ކުރެވެން ވާނޭ،" ރަށުގައި ހިންގާ ޕީޕީއެމްގެ ހަރަކާތްތަކުގެ އިސް ސަފުގައި އުޅޭ ޝަފީގު ވިދާޅުވި އެވެ.
މީގެ ކުރިން ކ. ގުރައިދޫއަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވަޑައިގެންނެވި ވަގުތު ހިނގި ހަމަނުޖެހުމަށް އިޝާރާތް ކުރައްވައި ޝަފީގު ވިދާޅުވީ އެފަދަ ކަމެއް ހިނގަން އޭދަފުށީގެ އެއްވެސް މީހަކު ބޭނުން ނުވާ ކަމަށެވެ.
"އަދި އަޅުގަނޑުމެންގެ ކެންޑިޑޭޓު މުއިއްޒު ވެސް މި ރަށަށް ވަޑައިގަންނަވަން އެބަ އޮތް، އަޅުގަނޑުމެން ބޭނުމެއް ނުވާނެ ދޯ، އަނެއްކާ އެ ދުވަހު، ވާދަވެރި ސަޕޯޓަރުން ނުކުމެ އަޑުގަދަކޮށް ހައިޖާނުގަނޑެއް ހަދާކަށް،" ޝަފީގު ވިދާޅުވި އެވެ.
އޭދަފުށިން ދެއްކީ ނަމޫނާއެކެވެ. ކައުންސިލްގެ ނައިބު ރައީސް ޝަފީގު ވެސް ވިދާޅުވީ ޕީޕީއެމްގެ ސަޕޯޓަރުންގެ ނިންމުން ބިނާ ވަނީ ވެސް އެހެން ރަަށްރަށަށް ނަމޫނާއެއް ދެއްކުމަށެވެ.
"އަޅުގަނޑުމެން އެންމެން މިއީ އެއް ބަޔެއް ދޯ، އެ ބޭފުޅުން (އެމްޑީޕީ ސަޕޯޓަރުން) ތެރޭގައި ވެސް އެ ތިބީ ދިވެހީން، އަޅުގަނޑުމެންގެ (ޕީޕީއެމްގެ ސަޕޯޓަރުން) ތެރޭގައި ވެސް މި ތިބީ ދިވެހީން، ފުލުހުންގެ ތެރޭގައި ވެސް އެ ތިބީ ދިވެހީން ދޯ،" ޝަފީގު ވިދާޅުވި އެވެ.
އޭދަފުށި ކައުންސިލްގެ އިލްތިމާސްއަކީ ކޮންމެ ރިޔާސީ ކެންޑިޑޭޓެއް ވެސް އެ ރަށަށް އައުމުން އެ ސުލްހަވެރިކަން ރަށުގައި ބޭއްވުމަށެވެ. މިއަދު އޭދަފުށި މީހުން ދެއްކި ނަމޫނާއިން ރަށުގެ އެންމެން ވެސް ފަހުރުވެރިވާނެ ކަން، ރަށު މީހުންގެ ވާހަކަތަކުން އެނގެ އެވެ.
