އިދިކޮޅު ޕީއެންސީގެ ވެރިކަމެއްގައި ހުޅުމާލެ މިހާރު ހިންގަމުން އަންނަ އާބަންކޯ ކުންފުނީގެ އަތުގައި އޮތް ބާރުތައް އަތުލައި، ހުޅުމާލެ ހިންގުމުގެ އިދާރީ ހުރިހާ ބާރެއް މާލެ ސިޓީ ކައުންސިލަށް ދެއްވާނެ ކަމަށް އެ ޕާޓީގެ ރިޔާސީ ކެންޑިޑޭޓު އަދި މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ރިޔާސީ އިންތިހާބަށް ހުށަހަޅުއްވާ މެނިފެސްޓޯ އިއުލާންކުރައްވަން މިރޭ ހުޅުމާލޭގައި ބޭއްވި އިވެންޓުގައި މުއިއްޒު ވިދާޅުވީ، ގާނޫނު އަސާސީ މާނަކުރާ ގޮތުން މާލެއަކީ މާލެ، ވިލިމާލެ އަދި ހުޅުމާލެ ކަަމަށެވެ. ނަމަވެސް ހުޅުމާލެ ހިންގަނީ ކުންފުންޏަކުން ކަމަށާއި އެ ކުންފުނިން ރައްޔިތުންނާ ދޭތެރޭގައި ނުވިސްނާ ކަމަށްވެސް ވިދާޅުވި އެވެ.
"މުނިސިޕަލް ހިދުމަތް ދިނުމުގައި ކުންފުނިން އަޅައެއް ނުލާ، ރައްޔިތުންނާ ދޭތެރޭގައި ކުންފުނިން ކަންކުރަމުންދަނީ ވިޔަފާރި އުސޫލުން ބޭނުންވާ ގޮތަށް، އެހެން ނަމަވެސް ގާނޫނު ބުނަނީ މިއީ މާލެއޭ، މިއީ މާލެ! މިއީކިއްޔެއް އާބަންކޯގެ މިލްކެއް ނޫން، މިއީ މާލޭ ރައްޔިތުންގެ މިލްކެއް!"
މުއިއްޒު އިތުރަށް ވިދާޅުވީ ހުޅުމާލެ ބަލަހައްޓަން ޖެހޭނީ އެތަނުގެ ކައުންސިލުން ކަމަށާއި އެއީ މާލެ ސިޓީ ކައުންސިލް ކަމަށެވެ.
"އެހެންވީމާ، ހުޅުމާލޭގެ މުނިސިޕަލް ހުރިހާ ހިދުމަތެއް ބެލެހެއްޓުން، މާލެ ސިޓީ ކައުންސިލާ، މިތަނުގެ އެކަމަށް ބޭނުންވާ ބަޖެޓާ ރިސޯސަސްއާ އެއްކޮށް އިރާދަކުރެއްވިއްޔާ ހަވާލުކުރާނަން" މޭޔަރު ކަމުގައިވެސް ހުޅުމާލެ ހިންގެވުން ހޯއްދެވުމަށް މަސައްކަތްތަކެއް ކުރެއްވި މުއިއްޒު ވިދާޅުވި އެވެ.
އޭގެ އިތުރުން، މާލެ ސިޓީ ކައުންސިލްގެ ބަހާނުލާ ހުޅުމާލެއިން ބިން ވިއްކުން ނުވަތަ ކުއްޔަށްދިނުމުގެ އެއްވެސް ހަރަކާތެއް އޭނާގެ ވެރިކަމުގައި ނުހިންގޭނެ ކަމަށްވެސް މުއިއްޒު ވިދާޅުވި އެވެ.
މުއިއްޒު މިފަދައިން ވިދާޅުވެފައިމިވަނީ ބިންވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހިން މިހާރު ހިއްކާފައިވާ ބިމާއި އިތުރަށް ބިން ހިއްކައިގެން ގޯތި ދިނުމަށް ނިންމާފައި ވަނިކޮށެވެ. އެ ނިންމުމަށް އިދިކޮޅުން ދަނީ ވަރަށް ބޮޑަށް ފާޑުކިޔަމުންނެވެ.
