ސެޕްޓެމްބަރު 9 ގައި ބާއްވާ ރިޔާސީ އިންތިހާބު ކާމިޔާބު ކުރެވިއްޖެ ނަމަ، ހައްޖު ކޯޕަރޭޝަން ހަރުދަނާކޮށް ހައްޖުގެ އަގު ހެޔޮކުރުމުގެ އިތުރުން، ފަސް އަހަރު ތެރޭގައި 1،000 ފަގީރުން ހިލޭ ހައްޖުގެ އަޅުކަމަށް ފޮނުވާނެ ކަމަށް، ޕީއެންސީގެ ރިޔާސީ ކެންޑިޑޭޓު މުހައްމަދު މުއިއްޒު މިރޭ ވައުދުވެވަޑައިގެންފި އެވެ.
މ. މުލަކުގައި ބޭއްވި ޖަލްސާގައި މުއިއްޒު ވިދާޅުވީ ހައްޖު ކޯޕަރޭޝަން ހިންގަނީ އެންމެ ރަނގަޅަކަށް ނޫން ކަމަށާއި އެ ކޯޕަރޭޝަންގެ ހިންގުމަށް ބަދަލު ގެންނަންޖެހޭ ކަމަށެވެ.
"ހައްޖު ފަންޑުން އިންވެސްޓުކޮށް ނަފާ ހޯދައި މާލީ ގޮތުން ވަރުގަދަ ކުންފުންޏަކަށް ހަދަންޖެހޭ. އޭރުން ހައްޖަށް ދާ އަގުތައް ކުޑަވެގެންދާނެ،" އޭނާ ވިދާޅުވި އެވެ.
ފުރަތަމަ އަހަރު ވެސް ހައްޖުގެ އަގު ކުޑަވެގެން ދާނެ ކަމަށް މުއިއްޒު ވިދާޅުވި އެވެ. ފަގީރުން ހިލޭ ހައްޖަށް ގެންދާއިރު، ފޯރުންތެރިކަން ދަށް މީހުންނަށް، ބަހާލައިގެން ހައްޖުގެ އަގު ދެއްކޭނެ ގޮތް ހަދާނެ ކަމަށް އޭނާ ވިދާޅުވި އެވެ.
މުއިއްޒުގެ ސިޔާސަތުގެ ތެރޭގައި މިހާރު އޮތް ޒަކާތު ފަންޑު ހަރުދަނާކޮށް ހިންގުމަށްޓަކައި، މޯލްޑިވްސް ޒަކާތު ހައުސްގެ ނަމުގައި ގާނޫނީ ހައިސިއްޔަތު ލިބޭ އޮފީހެއް އުފެއްދުން ހިމެނެ އެވެ.
"އޭރުން، އެކި ދާއިރާތަކަށް އިންވެސްޓްކޮށް ފައިދާ އިތުރުވެ، ޒަކާތު ފަންޑު ބޮޑުވެގެންދާނެ،" އޭނާ ވިދާޅުވި އެވެ،
މި ވައުދުގެ އިތުރުން މަސްވެރިކަމާއި ޗައިނާގެ ޓޫރިސްޓުން އިތުރު ކުރަން މުއިއްޒު ގެންގުޅުއްވާ ސިޔާސަތުގެ ބައެއް ހިއްސާ ކުރެއްވެވި އެވެ.
އޭނާ ވިދާޅުވީ ބޮޑު ކަންނެލީގެ އަގު ކިލޯއެއް 80ރ. އަދި އޭ ގްރޭޑުގެ ކަންނެލި ކިލޯއެއްގެ އެންމެ ދަށް އަގަކީ 100ރ. އަށް ކަނޑައަޅައި މަސްވެރިންނަށް ޑީސަލާއި ޕެޓްރޯލް ލިބޭ އަގު މިހާރަށް ވުރެ ދަށްކުރާނެ ކަމަށެވެ. ނަމަވެސް އެކަން ކުރާނެ ގޮތެއް އޭނާ ވިދާޅެއް ނުވެ އެވެ
މުލަކުގައި މިރޭ ބޭއްވި ޖަލްސާގައި މުއިއްޒު އާއި ޕީޕީއެމް/ ޕީއެންސީގެ އިސް ބައެއް ބޭފުޅުން. -- ފޮޓޯ: މިރާން ނާޝިމް/ އަދަދު
ޔާމީންގެ ވެރިކަމުގައި އަދި މި ވެރިކަމުގައި ވެސް މަސްވެރިންނަށް ހެޔޮ އަގުގައި ތެޔޮ ދޫކުރީ، މިފްކޯގެ މަރުކަޒުތަކުންނެވެ.
މުއިއްޒު ވިދާޅުވީ އޭނާގެ ވެރިކަމެއްގައި ޗައިނާގެ ފަތުރުވެރިން އިތުރުކުރަން މަތިންދާ ބޯޓެއް ކުއްޔަށް ގެނެސް، އައިލެންޑް އޭވިއޭޝަންގެ މެދުވެރިކޮށް ޗައިނާގެ މުހިންމު މަންޒިލުތަކުން ޓޫރިސްޓުން ގެންނާނެ ކަމަށެވެ.
"އޭރުން ޓޫރިޒަމް އިންޑަސްޓްރީ ވަރުގަދަވެ، ލިބޭ ނަފާ އިތުރުވެގެންދާނެ،" މުއިއްޒު ވިދާޅުވި އެވެ.
މ. އަތޮޅުގެ ރަށްތަކަށް ގިނަ ވައުދުތަކެއް
މުލައް
- މަގުތައް ތާރު އަޅައި ހެދުން
- ބަނދަރު ބޮޑުކުރުން
- ޖެޓީ ތަރައްގީ ކުރުން
- ސިއްހީ މަރުކަޒު ފެންވަރު ރަނގަޅު ކުރުން
- ޔޫތޫ ސެންޓަރު ބިނާކުރުން
- ރަށް ގިރުން ހުއްޓުވުމުގެ މަޝްރޫއު
ނާލާފުށި
- މުލި- ނާލާފުށި ކޯޒްވޭ އަކުން ގުޅާލުން (ރައީސް ސޯލިހުގެ ވެސް ވައުދެއް)
- 15 ހެކްޓަރުގެ ބިން ހިއްކުން
- ބަނދަރު ބޮޑުކުރުން.
ކޮޅުފުށީ
- އިމާރާތް ކުރަމުންދާ 100 ގޯތީގެ އަގު ދަށްކުރުން، އަދި މަހު ފީ ވެސް ދަށްކުރުން
- ރަށް ގިރުން ހުއްޓުވަން މަގެއް ހެދޭ މިންވަރަށް ހިއްކައިގެން ރިންގުރޯޑެއް، ތާރު އަޅައިގެން ހެދުން.
