ވެރިކަން ކާމިޔާބު ކުރީ ކުށްކުރާ ގްރޫޕުގެ ތަކުގެ އެހީ އާއި މަދަދުގައި ނޫން ކަމަށާއި އަމާން ކަމާއި ހަމަޖެހުން ގާއިމު ކުރެވޭނީ ގޭންގުތަކާ ގުޅުން ނެތް ސަރުކާރަކަށް ކަމަށް، ދެ ވަނަ ދައުރެއް ހޯއްދަވަން ކެމްޕޭނު ކުރައްވަމުން ގެންދަވާ އެމްޑީޕީ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ކެމްޕޭނުގައި އއ. މާޅޮހުގައި މިއަދު ހަވީރު ވާހަކަ ދައްކަވަމުން އެ މަނިކުފާނު ވިދާޅުވީ ހަގީގަތުގައި ގޭންގު ކުށް އިތުރު ވަނީ އެކަން ކުރަން ތިބޭ މީހުންނާއި ސިޔާސީ މީހުންނާ އޮންނަ ގުޅުމެއްގެ ސަބަބުން ކަމަށެވެ.
"އެއީ ޝައްކެއް އޮތް ކަމެއް ނޫން. ބާރު ލިބޭ، އެ މީހުންނަށް ބާރު ލިބޭ ކަންތައްތަކެއް ވެރިކަމުގެ ފަރާތުގައި ތިބޭ ބައެއްގެ ފަރާތުން އެ މަދަދު ލިބޭތީ. އެހެން ނަމަ އެކަމެއް ނުވާނެ،" ރައީސް ވިދާޅުވި އެވެ.
ރިޔާސީ އިންތިހާބު ބޯމަތިވެފައިވާއިރު، ސިޔާސީ ބައެއް ވާދަވެރިންނާއި ކުށްކުރާ ގްރޫޕްތަކާ ގުޅުން އޮންނަ ކަމަށް ތުހުމަތުކުރެ އެވެ.
"ސިޔާސީ ކަންކަމާއި ކުރިމަތިލާއިރު މި އުޅޭ ގްރޫޕުތައް ހުރިހާ އެންމެންނާ ވެސް އެޕްރޯޗުކުރޭ. އެހެން ނަމަވެސް 2018 ގައި ވެރިކަމަށް އައީ, އެއިން އެއްވެސް ބައެއްގެ އެހީތެރިކަމަކާ ނުލައި," ރައީސް ވިދާޅުވި އެވެ.
"އެހެންވެ ވޭތުވެދިޔަ ފަސް އަހަރު ހަމަޖެހުން ގާއިމު ކުރެވުނީ،"
ކުށް ކުރާ ކުދިންނަށް ދިރިއުޅުމެއް ހޯދައިދޭން ޖެހޭ ކަމަށް ރައީސް ވިދާޅުވި އެވެ. ދިރިއުޅެން މަސައްކަތް ކުރާނެ ގޮތްތަކެއް އެފަދަ ކުދިންނަށް ހޯދައިދިނުމަކީ ސަރުކާރެއްގެ ޒިންމާއެއް ކަމަށް އެމަނިކުފާނު ވިދާޅުވި އެވެ.
"އާއިލާއެއްގައި ތިބޭ ކުދިން އެހެން މަގުމައްޗަށް ވީއްލިގެން ދިޔުމަކީ ކަންބޮޑުވާން ޖެހޭ ކަމެއް. އަޅުގަނޑުމެންގެ މެނިފެސްޓޯގެ ސިޔާސަތުގައި އަމާން މުޖުތަމައުއެއްގެ ތަފްސީލުތައް ހާމަކޮށްދޭނަން. އޭގެ ތެރޭގައި މަގުމަތީގައި ގޮތެއް ނެތިފައި ތިބި ޒުވާނުންނަށް ގޮތެއް ހޯދައިދޭން މަސައްކަތްތައް ރޭވިފައި ހުރި ގޮތް ވަރަށް ތަފްސީލުކޮށް ކިޔައިދޭނެ," ރައީސް ވިދާޅުވި އެވެ.
ރައީސް ވިދާޅުވީ ހޯމް މިނިސްޓްރީ އާއި ފުލުހުންގެ ތަފާސްހިސާބުތަކަށް ބަލާއިރު މިދިޔަ ފަސް އަހަރަކީ އެންމެ ކުށް މަދު ފަސް އަހަރު ކަމަށެވެ. އޭގެ ކުރީ ފަސް އަހަރުގައި މާލޭގެ މަގުމަތީ ހާލަތު އޮތީ މީހުން މެރުމުގެ ސަބަބުން ފުލުހުންނާއި ސިފައިން ނެރެން ޖެހޭ ހާލަތުގައި ކަމަށް އެމަނިކުފާނު ވިދާޅުވި އެވެ.
"ދިވެހި ކޮންމެ މީހަކު ބޭނުންވަނީ ހަމަޖެހޭ މުޖުތަމައުއެއްގައި އުޅެން. އުފާވެރި ދިރިއުޅުމެއް އުޅެން. އެ އުފާވެރި ދިރިއުޅުން ހޯދުމަށްޓަކައި ކުރަން ޖެހޭ ބައިވަރު ކަންކަން އެބަހުރި. އެންމެ ފުރަތަމަ ކަމަކީ ހަމަޖެހޭ މުޖުތަމައުއެއް ގާއިމުކުރުން. ކުރިއާ އަޅާބަލާއިރު އެކަމަށް އަޅުގަނޑުމެންނަށް ރަނގަޅު މަސައްކަތްތަކެއް ކުރެވިއްޖެ," ރައީސް މިއަދު މާޅޮހުގައި ވިދާޅުވި އެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވަނީ ދެވަނަ ދައުރަކަށް އިންތިހާބުވެވަޑައިގެންފިނަމަ މާޅޮހަށް ކޮށްދެއްވާނެ ކަންކަން ލިސްޓު ކުރައްވާފަ އެވެ. އޭގެ ތެރޭގައި ހިމެނެނީ,
- ސްކޫލުގެ އިމާރާތް އެޅުން
- ބަނދަރު ބޮޑުކޮށް ނިންމުން
- ލޯކަލް ބީޗަކާއި ދޯނި އެހެލާނެ ތަނެއް ގާއިމުކުރުން
- ރޯހައުސް ޕްރޮޖެކްޓެއް ހިންގުން
- ބޮޑު ހުކުރު މިސްކިތެއް އެޅުން
- ހޭންޑްބޯލް އަދި ވޮލީ ކޯޓު ގާއިމުކުރުން
- ސިއްހީ މަރުކަޒު ބޮޑުކޮށް އިތުރު ހިދުމަތްތަކާ އެކު 24 ގަޑިއިރަށް ބަދަލުކުރުން
- ޕިކްނިކް ދެވޭނެ ރަށެއް ހޯދައިދިނުން
- ގެސްޓުންނަށް ހާއްސަކޮށްގެން ގާއިމުކުރުން
- އައިސްޕްލާންޓު ބެހެއްޓުން
