ކުރިއަށް އޮތް ރިޔާސީ އިންތިހާބުގައި ކުރީގެ ބަންޑާރަ ނައިބު ދިޔާނާ ސައީދު އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހަށް ތާއިދު ކުރައްވައި، އެ މަނިކުފާނުގެ ކެތްތެރިކަމާއި ކޮވިޑުގެ ހާލަތު ކޮންޓްރޯލް ކުރެއްވި ގޮތަށް ތައުރީފު ކުރައްވައިފި އެވެ.
މާލޭގައި ހުރި އެމްޑީޕީގެ ސޯސަން ޖަގަހައިގައި ވާހަކަ ދައްކަވަމުން ދިޔާނާ ވިދާޅުވީ ރައީސް ސޯލިހަކީ ކެތްތެރި އަދި ހުރިހާ ވިސްނުމެއްގެ މީހުންނާ ގުޅޭ ވެރިއެއް ކަމަށެވެ.
ކުރިން ރައީސް ސޯލިހަށް ފާޑުވިދާޅުވެ، އަދި އެމްޑީޕީގެ ރިޔާސީ ޕްރައިމަރީގައި ކުރީގެ ރައީސް މުހައްމަދު ނަޝީދަށް ކެމްޕޭނުކޮށް ދެއްވި ދިޔާނާ، ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ރައީސް ސޯލިހަށް ތާއިދު ކުރައްވަން ނިންމެވީ މައިގަނޑު ތިން ސަބަބެއް އޮވެގެން ކަމަށް، ހުކުރު ދުވަހުގެ ރޭގެ ޖަގަހަ ޖަލްސާގައި އޭނާ ވިދާޅުވި އެވެ.
ފުރަތަމަ ސަބަބީ ރައީސް ސޯލިހުގެ ރަނިންމޭޓަކަށް އައްޑުއަށް ނިސްބަތްވާ، ރައްޔިތުންގެ މަޖިލީހުގެ މެޖޯރިޓީ ލީޑަރު މުހައްމަދު އަސްލަމް ހަމަޖެއްސެވުމެވެ. ދިޔާނާ ގަބޫލު ކުރައްވަނީ އަސްލަމަށް ވުރެ ބޮޑަށް އައްޑުއަށް ހެޔޮ އެދޭނެ މީހަކު މި ރާއްޖޭގައި ނެތް ކަމަށެވެ.
ސޯސަން ޖަގަހައިގައި ދިޔާނާ އާއި އަސްލަމް. -- ފޮޓޯ: އެމްޑީޕީ
ދެވަނަ ސަބަބަކަށް ދިޔާނާ ފާހަގަކުރެއްވީ އިންތިހާބުގައި ވާދަ ކުރައްވާ ކެންޑިޑޭޓުންގެ ތެރެއިން ރައީސް ސޯލިހަށްވުރެ ވަކި ގާބިލު ބޭފުޅަކު ނެތުމެވެ. ރައީސް ސޯލިހަކީ ކެތްތެރި, ހުރިހާ މިޒާޖެއްގެ, ވިސްނުމެއްގެ, އަދި ފަލްސަފާއެއްގެ މީހުންނާއެކު މަސައްކަތް ކުރެއްވޭފަދަ ބޭފުޅެއް ކަމަށް ދިޔާނާ ވިދާޅުވި އެވެ.
"ރައީސް ސޯލިހުގެ ކެތްތެރިކަމުގެ ވަރަށް ބޮޑު ހެއްކެއް އެއްވެސް ކޯލިޝަން ސަރުކާރެއް ވެރިކަން ނިމުނުއިރު ކޯލިޝަން ދެމެހެއްޓިފައި ނެތް، އިބްރާހިމް މުހައްމަދު ސޯލިހުގެ ވެރިކަން ފިޔަވައި" އައްޑޫ ބަހުރުވައިން ދިޔާނާ ވިދާޅުވި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ރާއްޖެ ތަޖުރިބާކުރި ފަދަ އަނިޔާވެރިކަމާއި, ބިރުވެރިކަން މި ވެރިކަމުގައި ފެނިގެން ނުދާކަން ވެސް އޭނާ ފާހަގަކުރެއްވި އެވެ.
ފަހު ސަބަބެއްގެ ގޮތުގައި ދިޔާނާ ފާހަގަ ކުރެއްވީ ރައީސް ސޯލިހު ކޮވިޑު މެނޭޖުކުރެއްވި ގޮތާއި, އެ ހާލަތުގައި ރައްޔިތުންނަށް ވީ ގިނަ ވައުދުތައް ފުއްދެވުމެވެ. އޭނާ ވިދާޅުވީ ކޮވިޑާ ހެދި ރައީސް ސޯލިހަށް ވެރިކަން ކުރައްވަން ފުރިހަމަ ފަސް އަހަރު ލިބިވަޑައިނުގަންނަވާ ކަމަށެވެ.
ސޯސަން ޖަގަހައިގައި ބޭއްވި ބައްދަލުވުމުގައި ރައީސް ސޯލިހުގެ ރަނިންމޭޓު އަސްލަމް ވެސް ބައިވެރިވެވަޑައިގަތެވެ.
