އެއާޕޯޓަކާއި މަސްފެކްޓްރީއެއް ހިންގާ ގއ.ކޫއްޑޫ އެއަތޮޅުގެ ވެރިރަށް ވިލިނގިއްުޔާ ބްރިޖަކުން ގުޅައިލަން ސަރުކާރުން ވައުދުވިތާ އަހަރުތަކެއް ފަހުން، އެ މަޝްރޫއުއު ހިންގާނީތޯ ނުވަތަ ނޫންތޯ ވިސްނައި އަލުން މަަޝްވަރާކުރަން ރައީސް އިބްރާހީމް މުހައްމަދު ސޯލިހު މިރޭ އެދިވަޑައިގެންފި އެވެ.
ވިލިނގިލި-ކޫއްޑޫ ބްރިޖް އެޅުމަށް ޓަކައި ހަދަން ޖެހޭ ޓެކްނިކަލް އަދި ފައިނޭންޝަލް ފީސިބިލިޓީ ސާވޭ ހަދަން ސަރުކާރުން މިދިޔަ ޖެނުއަރީ މަހު އެމްޓީސީސީއާ ހަވާލުކުރި އެވެ. އެކާވީސް މިލިޔަން ރުފިޔާގެ އަގަަކަށް އެ މަސައްކަތް ހަވާލުކުރީ ޖުލައިމަހުގެ ތެރޭގައި ނިންމާ ގޮތަށެވެ.
ސެޕްޓެމްބަރު ނުވައެއްގައި ބާއްވާ ރިޔާސީ އިންތިހާބަށް ކެމްޕޭންކުރަން އެމްޑީޕީން މިރޭ ވިލިނގިލީގައި ބޭއްވި ޖަލްސާގައި އެޕާޓީގެ ރިޔާސީ ކެންޑިޑޭޓްގެ ހައިސިއްޔަތުން ވާހަކަފުޅު ދަައްކަވަމުން ރައީސް ސޯލިހު ވިދާޅުވީ އެ މަޝްރޫއުގެ ދިރާސާ މިހާރު އޮތީ ނިމިފައި ކަމަށާއި އެ މަޝްރޫއު އޮތީ ކުރިއަށް ދިއުމުގެ މަރުހަލާގައި ކަމަށެވެ.
"އެކަމަކު އަޅުގަނޑު ތިޔަ ބޭފުޅުންނަށް ދަންނަވައިލަން ބޭނުން ވަނީ އަދި ހިންގަވާށޭ މިއާ ދޭތެރޭގައި ވިސްނައިލައްވަން. މިއަށް ވުރެ ރަނގަޅަށް ، މުޅި ވިލިނގިއްޔަށް ތަރައްގީ ގެނެވޭނެ ޕްރޮޖެކްޓްތަކެއް، ޕްރޮޕޯސަލް ތަކެއް އަޅުގަނޑުމެންގެ އަތުގައި އެބަހުރި. އަޅުގަނޑު މީގައި ގޮތެއް ނިންމަން ގަސްދުކުރަނީ ތިޔަ ބޭފުޅުންނާ އަދި މަޝްވަރާކޮށްފައި،" ރައީސް ވިދާޅުވި އެވެ.
އެމަނިކުފާނު ވިދާޅުވީ ކުރު މުއްދަތެއްގެ ތެރޭގައި އެކަމާ މަޝްވަރާކޮށް ގޮތެއް ނިންމަވާނެ ކަަމަށެވެ.
އެހެން ނަމަވެސް އެ މަޝްރޫއުގެ ވާހަކަައަށް ވަޑައިގެންނެވި އިރު ރައީސް ވިދާޅުވީ އެއީ ވިލިނގިލީގެ ރައްޔިތުން ވަރަށް ބޮޑަށް އެެދޭ މަޝްރޫއެއް ކަމަށެވެ. އެއީ ސަރުކާރުން ވީ ވައުދެއް ކަން ވެސް ފާހަގަކުރެއްވި އެވެ.
"އަޅުގަނޑުމެން ވީ އެއް ވައުދު އެބަ އޮތް އަދިވެސް. ވިލިނގިލީގެ ރައްޔިތުން ވަރަށް ބޮޑަށް އެދޭ ކަމެއް. އެއީ ކޫއްޑުއާ ވިލިނގިލި ބްރިޖުން ގުޅައިލުން. އެއަކަށް އަމަލީ ސިފައެއް ނާދޭ. ބުރަ ބޮޑު މަސައްކަތެއް އެއީ،" ރައީސް ވިދާޅުވި އެވެ.
ބްރިޖް އެޅުމުގެ މަޝްރޫއާ މެދު އަލުން ވިސްނަން އެދިވަޑައިގެންނެވުމާ އެކު ރައީސް ދެއްވީ އެރަށުގައި ހިންގަވަން ގަސްދުކުރައްވާ އެހެން ބައެއް މަޝްރޫއުތަކުގެ ލިސްޓެކެވެ.
