އިދިކޮޅު ޕާޓީތަކުން ދޮގު ފެތުރުމާއި ނަފުރަތު އުފެއްދުމާއި ހަމަނުޖެހުން ހިންގުމަކީ ސިޔާސީ ހަރަކާތް ހިންގުން ނޫން ކަމަށް އެމްޑީޕީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހުގެ ރަނިން މޭޓު ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެއްޖެ އެވެ.
ރިޔާސީ ކެމްޕޭނުގައި އެމްޑީޕީ ކޯލިޝަނުން ހުވަދޫ އަށް ކުރަމުންދާ ދަތުރުގައި ރޭ ގއ. ވިލިނގިލީގައި ބޭއްވި ޖަލްސާގައި ވާހަކަ ދައްކަވަމުން އަސްލަމް ވަނީ އިދިކޮޅަށް ފާޑުވިދާޅުވެ، އޮގަސްޓު 2008, ގައި އުފަންކުރި ފެހި ގާނޫނު އަސާސީން ލިބިދޭ އަސާސީ ހައްގުތަކާއި ޑިމޮކްރެސީގެ ޕްލެޓްފޯމުތައް ބޭނުންކުރެވޭނީ އެންމެ ރަނގަޅުގޮތުގައިތޯ ސުވާލު އުފައްދަވާފަ އެވެ.
"އަޅުގަނޑަކީ ގިނަ ސިޔާސީ ޕާޓީ ހިމެނޭ ސިސްޓަމަށް ތާއީދުކުރާ މީހެއް، ނަމަވެސް ތާއީދު ނުކުރެވެނީ ސިޔާސީ ކަމެއްގެ ގޮތުގައި ތަންތަނުގައި ރޯކުރުމާއި މީހުންނަށް އަނިޔާކުރުމާއި ދޮގު ބަސް ބުނުމާއި ގީބަ ބުނުމަށް.. އެއީ ކޮށްގެން ވާނެ ކަންކަމެއް ނޫން" އެމްޑީޕީގެ ޕީޖީ ގްރޫޕުގެ ލީޑަރުގެ މަގާމުގައިވެސް ހުންނެވި އަސްލަމް ވިދާޅުވި އެވެ.
އަސްލަމް މިހެން ވިދާޅުވެފައި މިވަނީ އެމްޑީޕީ އާއި ގުޅިފައިވާ ޕާޓީތަކުގެ ކެމްޕޭން ޓީމުން އިއްޔެ ވިލިގިއްޔަށް އައުމުން، އެ ރަށުގެ އިދިކޮޅު ފަރާތްތަކުން ހަމަނުޖެހުން އުފައްދަން މަސައްކަތް ކޮށްފައިވާ ވަގުތެއްގަ އެވެ. އެ ހަމަނުޖެހުންތަކުގެ ތެރެއިން ފުލުހުންނަށް ހަމަލާދިން ދެ މީހަކު ވަނީ ހައްޔަރުކޮށްފަ އެވެ.
މިސާލު ނަންގަވަމުން އަސްލަމް އިތުރަށް ވިދާޅުވީ، އެފަދަ ސިޔާސީ ހަރަކާތްތަކުގެ ތެރެއިން އެންމެ ބޮޑަށް ހިތާމަކުރަން ޖެހެނީ ޅަދަރިން ގޭގައި ބައިތިއްބައިގެން އެ ކުދިންގެ ކުރިމަތީގައި މައިންބަފައިން ސިޔާސީ ހަރަކާތުގެ ގޮތުގައި 'ލަވާ ހަޅޭއް' ކަމަށެވެ.
މިއަދު ވިލިނގިލީގައި އިދިކޮޅުން ކުރި މުޒާހަރާގެ ތެރެއިން : އެ މުޒާހަރާގެ ތެރެއިން ފުލުހުންނަށް ހަމަލާދިން - ފޮޓޯ: އަބްދުﷲ އިޔާން / އަދަދު
"އަޅުގަނޑުމެން އުފާވެރި އަމާން ރާއްޖޭގެ މެނިފެސްޓޯގައި އަޅުގަނޑުމެން މި ހުށަހަޅާ ހުރިހާ ކަމަކަށް، މި އަމާންކަމަށް މި އުފާވެރިކަމަށް ގައުމު ގެންދެވޭނީ ކިހިނެއްބާއޭ އަޅުގަނޑުމެންގެ ދަރިންގެ ކުރިމަތީގައި ދަރިން ބައިވެރިކޮށްގެން ދޮގު ހެދުމާއި ގީބަ ބުނުމާއި މީހުންނަށް ހަޖޫ ޖެހުން [ފަދަ ކަންކަން ކުރަންޏާ]" އަސްލަމް ވިދާޅުވި އެވެ.
މި މިސާލުތައް ނެންގެވުމުގެ ކުރިން އަސްލަމް ވަނީ އަސާސީ މިނިވަންކަމަށް، އެންމެ ފުރަތަމަ 1932 ގައި އުފެއްދި ގާނުން ފެށިގެން 1965 ގައި މިނިވަންކަން ލިބި 2008 ގައި އުފަންވި ފެހި ގާނޫނު އަސާސީއާ ހަމައަށް ދިވެހި ކުރި ދަތުރުގެ އުސްއަލިތަކަށް ނަޒަރު ހިންގަވާލައްވާފަ އެވެ.
އޭނާ ސުވާލު އުފެއްދެވީ، އެ ބޮޑު މަސައްކަތުންް، އެ ގިނަ ދުވަހުން ކުރި މަސައްކަތުގެ ނަތީޖާ ދިވެހިން، ހާއްސަކޮށް އިދިކޮޅު ސިޔާސީ ފަރާތްތަކުން ހިފަނީ އެންމެ އެދެވޭ ގޮތުގައި ކަމާ މެދުގަ އެވެ.
