ރާއްޖެ ޓްރާންސްޕޯޓް ލިންކް (އާރުޓީއެލް) ފެރީގެ ހިދުމަތް އައްޑޫ ސިޓީގައި ފެށުމަށް ތައްޔާރުވަމުން އަންނަ ކަމަށް އެމްޓީސީސީން ބުނެފި އެވެ.
އެމްޓީސީސީގެ މީޑިއާ އޮފިޝަލަކު މިއަދު "އަދަދު" ނޫހަށް މައުލޫމާތު ދެމުން ވިދާޅުވީ، އައްޑޫ ސިޓީގައި އާރްޓީއެލް ފެރީގެ ހިދުމަތް ފެށުމުގެ ގޮތުން ވާޏް ޖެހޭ ތައްޔާރީތައް އެ ކުންފުނިން ވަމުން އަންނަ ކަމަށެވެ. އަދި, އާރްޓީއެލް ފެރީގެ ހިދުމަތާއި ބެހޭ މައުލޫމަތު ދިނުމުގެ ސެޝަނެއް ވެސް އެ ކުންފުނިން އައްޑޫގައި ބާއްވާފައިވާ ކަމަށް ވިދާޅުވި އެވެ.
ފެރީގެ ހިދުމަތް ފެށުމަށްޓަކައި ތާރީހެއް ޕްލޭނިން މިނިސްޓްރީން ކަނޑައެޅުމާ އެކު އެ ހިދުމަތް ފެށިގެންދާނެ ކަމުގައި ވެސް މީޑިއާ އޮފިޝަލު ފާހަގަކުރެއްވި އެވެ.
"މިނިސްޓްރީން ކަނޑައަޅާނެ ހިދުމަތް ފަށާނެ ތާރީހެއް. އަޅުގަނޑުމެން މިދަނީ ތައްޔާރުވަމުން،" އެމްޓީސީސީގެ މީޑިއާ އޮފިޝަލް ވިދާޅުވި އެވެ.
އާރްޓިއެލް ފެރީގެ ހިދުމަތް މިހާރު ފަށާފައި ވަނީ އެންމެ ރާއްޖޭގެ އެންމެ އުތުރުން ހއ. އަދި ހދ. އަތޮޅާއި ށ. އަތޮޅާއި ޅ. އަތޮޅުގެ އިތުރުން ދެކުނުން ގއ. އަދި ގދ. އަތޮޅުގަ އެވެ. މި މަޝްރުއޫގެ ފުރަތަމަ ފިޔަވަހީގެ މަސައްކަތް ސަރުކާރުން އެމްޓީސީސީއާ ހަވާލުކޮށްފައި ވަނީ 2021 ވަނަ އަހަރުގެ ޖެނުއަރީ މަހު އެވެ.
