ކުރިއަށް އޮތް ރިޔާސީ އިންތިހާބު ކާމިޔާބުކުރެވި އިތުރު ދައުރެއް ލިބިއްޖެނަމަ، ގދ. ގައްދޫއާ އިންވެގެން އޮންނަ ގދ. ގަން ގުޅުވާލާނެ ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންފި އެވެ.
ރައީސް މިފަދައިން ވިދާޅުވީ ހުވަދޫގައި ކުރިއަށް ގެންދަވާ ރިޔާސީ ކެމްޕޭނުގެ ތެރެއިން ގައްދޫގައި މިރޭ ބޭއްވި ޖަލްސާގައި ވާހަކަދައްކެވުމުގެ ތެރެއިން ދެވަނަ ދައުރަކަށް އެމަނިކުފާނު އެ ރަށަށް ވެވަޑައިގެންނަވާ ވައުދުތައް އިއުލާންކުރައްވަމުންނެވެ.
"މިރަށާއި ވަރަށް ކައިރީގައި މިއޮތް ގަމާއި ގައްދޫއާ، އިރާދަކުރެއްވިއްޔާ އަޅުގަނޑުމެން ގުޅާލަދޭނަން," ގައްދޫގެ ރައްޔިތުންގެ ޖޯޝާ ފޯރީގެ އަޑާއެކު ދެވަނަ ދައުރަކަށް ރައީސް ވައުދުވެވަޑައިގެންނެވި އެވެ.
މީގެ އިތުރުންވެސް ރައީސް ސޯލިހު ވަނީ ގައްދޫއަށް، އެމަނިކުފާނު ދެވަނަ ދައުރެއްގައި ގައްދޫއަށް ކޮށްދެއްވާނެ އެކި ކަންކަން ލިސްޓު ކުރެއްވި އެވެ. އެގޮތުން ގައްދޫގައި މިހާރު ކުރިއަށްދާ މަގުހެދުމުގެ މަޝްރޫއުގެ ދެވަނަ ފިޔަވަހީގެ ތެރެއިން އެ ރަށުގެ ހުރިހާ މަގުތަކެއް ތަރައްގީކުރައްވާނެ ކަމަށް ރައީސް ވިދާޅުވި އެވެ.
އަދި، ގައްދޫ އަށް އިތުރު 30 ހެކްޓަރުގެ ބިން ހިއްކާ އެ ބިމުގައި 100 ރޯހައުސް އެޅުމުގެ އިތުރުން ގައްދޫގައި ޕޮލިޓެކްނިކްގެ އާ އިމާރާތެއް އަޅުއްވާނެ ކަމަށްވެސް ރައީސް ވަނީ ގައްދޫގައި ހުންނަވާ ވިދާޅުވެފަ އެވެ.
ގައްދޫއަކީ ރައީސް ހުވަދޫއަށް ކުރައްވަމުން ގެންދަވާ ދަތުރުގެ ހަވަނަ މަންޒިލެވެ. މިއަދު އިރުއޮއްސުނު ވަގުތު ރައީސް ގައްދޫއަށް ވަޑައިގަތުމުން އެ ރަށުން ވަނީ އެމަނިކުފާނާއި އެމަނިކުފާނުގެ ކެމްޕޭން ޓީމަށް ހޫނު މަރުހަބާއެއް ދަންނަވާފަ އެވެ.
