ސެޕްޓެމްބަރުގައި އޮންނަ ރިޔާސީ އިންތިހާބުގައި ވާދަކުރާ ކެންޑިޑޭޓުންގެ މެނިފެސްޓޯއަކަށް ވާނީ ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ވާ ވައުދުތައް ނުވާނެ ކަމަށް ބުނުން ކަމަށް އެ ޕާޓީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މިރޭ ގައްދޫގައި ބޭއްވި ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ފެހި ގާނޫނު އަސާސީ ތަސްދީގު ކުރި ފަހުން ރާއްޖޭގައި ބޭއްވި ކޮންމެ އިންތިހާބެއްގައި ވެސް ރައްޔިތުންގެ ވޯޓު ލުމުގެ އޮއެވަރު ހުންނަނީ ވެރިކަން ވަކި މީހަކަށް ލިބުނަ ނުދޭން ކަމަށެވެ. އެހެން ނަމަވެސް, މިއަހަރުގެ އިންތިހާބުގައި ތަފާތެއް ފެނިވަޑައިގަންނަވާ ކަމަށް ރައީސް ވިދާޅުވި އެވެ.
"މީގެ ކުރިން ވެރިކަން ބަދަލުކުރަން ބޭނުން ނަމަ އެންމެން އަރަނީ އެއްކޮޅަކަށް އެ ނޫން ގޮތަކަށް ނުކުރެވޭނެ ކަމަށް ގަބޫލު ކުރެވޭ. ރިސްކެއް ނަގަން ބޭނުން ނުވޭ. މިފަހަރު ތަފާތު. ިފަހަރު ވެރިކަމުގަ ތިބި މީހުން ތިބީ ކޯލިޝަން ހަދައިގެން. ދެން އެހެން އެއްވެސް ބަޔަކާ ބަޔަކު ބައިވެރި ނުވޭ," އެ ތަފާތު ހިއްސާ ކުރައްވަމުން ރައީސް ވިދާޅުވި އެވެ.
މިރޭގެ ޖަލްސާގެ ތެރެއިން ރައީސް ސޯލިހު ކަރުދާހެއް ބައްލަވާލައްވަނީ. ވާދަވެރިންނަށް ބަހުގެ ހަމަލާތަކެއް އަމާޒު ކުރެއްވި, --- ފޮޓޯ: އަބްދުالله އިޔާން/އަދަދު
އެހެން ނަމަވެސް, ވަރަށް ސީރިއަސް ކަމާ އެކު އިންތިހާބުގައި ވާދަކުރާ ކެންޑިޑޭޓުން އެބަ ތިބި ކަމަށާއި އެހެން ނަމަވެސް އެ ބޭފުޅުން ވެސް ބޭނުން ވަނީ ވެރިކަން ކަމަށް ވިދާޅުވެ ވާދަވެރިންނަށް ބަހުގެ ހަމަލާތަކެއް ރައީސް އަމާޒު ކުރެއްވި އެވެ.
"ބޭނުން ވަނީ ވެރިކަން. ވެރިކަމުގަ ހުރި މީހާ ބަދަލުކުރާކަށް ނޫން. ވާދަކޮށްގެން ވެރިކަމަށް އަންނަން ބޭނުން ވަނީ. މިއީ 2008 އިން ފެށިގެން ބޭއްވި އިންތިހާބުތަކާ ތަފާތު އިންތިހާބެއްގެ ގޮތުގައި ފާހަގަވަނީ. ޑިމޮކްރަސީއަށް ފައްކާވަމުން އަންނަ މަންޒަރު މި ފެންނަނީ. އެކަމަށްޓަކައި ސިޔާސީ ޕާޓީތަކަށް ޝުކުރު ވެސް އަދާކުރަން," ރައީސް ސޯލިހު މިރޭގެ ޖަލްސާގައި ވިދާޅުވި އެވެ.
އެހެން ނަމަވެސް, ވާދަވެރިންގެ ސިޔާސަތުތަކެއް ނެތް ކަމަށާއި ޕާޓީތަކުން އަބަދުވެސް ބުނަމުންދަނީ އެމްޑީޕީން ވާ ވައުދުތައް ނުވާނެކަން ކަމަށް ރައީސް ވިދާޅުވި އެވެ.
"2018 ވަނަ އަހަރު ޖަޒީރާ ރާއްޖޭގެ މެނިފެސްޓޯއާ އެކީ ނުކުތީމާ އެ ބޭފުޅުންގެ މެނިފެސްޓޯއަކަށްވީ ބުނީ ނުވާނެއޭ. އަޅުގަނޑުމެން ވައުދުވީ ކޮންމެ ކަމެއް ބުނީ ނުވާނެ އޭ. މިފަހަރު ވެސް ވާދަވެރިންގެ މެނިފެސްޓޯއަކަށް ވާނީ އަޅުގަނޑުމެން ވީ ވައުދުތަކަކީ ނުކުރެވޭ ކަމަށް ބުނުން. އެހެން ނަމަވެސް މިއަދު ފަސް އަހަރު ފުރިގެންދާއިރު މި ތިބީ ވައުދުތަކުގެ ބޮޑު ބައި ކޮށްދީ ނިންމައިގެން," އެމަނިކުފާނު ވިދާޅުވި އެވެ.
ހާމަކަން ބޮޑު ޖަވާބުދާރިވާ ސަރުކާރެއް ހިންގުމަށް 2018 ގައި ވައުދުވި ކަމަށް ވިދާޅުވެ ރައީސް އެކަމަށް ބާރު ދެއްވީ ނަންބަރުންނެވެ.
"މަޖިލީހަށް ޖަވާބުދާރީވާން 321 ފަހަރު ވަޒީރުން މަޖިލީހަށް ގޮސްފި. ލިޔެފަ ފޮނުވާ ސުވާލުގެ އިތުރަށް ކޮންމެ ސުވާލެއް ކުރިޔަސް.... އެއަށް ޖަވާބު ދޭނެ. ކުރީގެ ސަރުކާރުގައި ފަސް އަހަރު ދުވަހުގެ ތެރޭ މަޖިލީހަށް ހާޒިރުވީ އެންމެ 58 ފަހަރު. މިއީ ދެ ސަރުކާރުގެ ތަފާތަކީ," ރައީސް ޔާމީންގެ ސަރުކާރާ އަޅާކިޔަމުން ރައީސް ވިދާޅުވި އެވެ.
ސިޔާސީ ބޭނުމުގައި އެއްވެސް މީހަކު ޖަލަށް ނުލާނެ ކަމުގެ ވައުދުވިން ކަމަށާއި 2018 ގެ އިންތިހާބު އައިއރިު ރާއްޖޭގެ ސިޔާސީ ލީޑަރުން ތިއްބެވީ ޖަލު ބަންދެއްގައި ނުވަތަ އަރުވާލެވިގެން ކަން ރައީސް ސޯލިހު ފާހަގަކުރެއްވި އެވެ. ނަމަވެސް, މިއަދު އެ ހާލަތު ނެތްކަން ފާހަގަކުރެއްވި އެވެ.
"މިއަދު ފަސް އަހަރުގެ ދައުރެއް މި ނިންމަނީ އެއިން އެއްވެސް ކަމެއް ނުކޮށް. ސިޔާސީ އެއްވެސް ލީޑަރެއް ސިޔާސީ ބަންދެއްގައި ނުހުންނާނެ. އެންމެ ކޯޓެއްގެ ފުރާޅުން ވެސް ޓިނު ނުނަގަން. ވެރިކަން ކުރެވިއްޖެ. ވޯޓު ލައްވާއިރު މިކަންކަމާ މެދު ވިސްނަވާ," ރައީސް އިލްތިމާސް ކުރެއްވި އެވެ.
ކުރިއަށް އޮތް އިންތިހާބު ބޮޑު ތަނުން ކާމިޔާބުވާ މަންޒަރު ކުރަމުންދާ ދަތުރުތަކުން ފެންނަމުންދާ ކަމަށް ރައީސް ވިދާޅުވި އެވެ.
