ގދ. ރަތަފަންދޫއަށް ދިމާވެފައިވާ ބިމުގެ ދަތި ކަމަށް ހައްލެއްގެ ގޮތުން އެ ރަށާ ކައިރީގައި އެއް ފަޅެއްގައި އޮންނަ ކެރެއްދޫއާ ގުޅާލާނެ ކަމަށް އެމްޑީޕީގެ ރިޔާސީ ކެންޑިޑޭޓު ރައީސް އިބްރާހީމް މުހައްމަދު ސޯލިހު ވައުދުވެވަޑައިގެންފި އެވެ.
ގދ. އަތޮޅަށް ކުރައްވަމުން ގެންދަވާ ކެމްޕޭން ދަތުރުފުޅުގައި ރައީސް ސޯލިހު އާއި އެމަނިކުފާނުގެ ރަނިން މޭޓް މުހައްމަދު އަސްލަމް މިއަދު ވަނީ ރަތަފަންދޫއަށް ވަޑައިގެން އެ ރަށުގައި ތިއްބެވި ސަޕޯޓަރުންނާއި ބައްދަލުކުރައްވާފަ އެވެ.
އެ ބައްދަލުކުރެއްވުމުގައި އެ ރަށުގެ ކައުންސިލް ރައީސް ވެސް ފާހަގަކުރެއްވި މައިގަނޑު ކަންބޮޑުވުމަކީ ބިމުގެ ދަތިކަމެވެ.
"ކައުންސިލުގެ ރައީސް ވިދާޅުވި ބިން ހުރި ވާހަކަ. ހިނގާލާފަ ދެވޭ ހިސާބުގައި އޮތް ކެރެއްދޫގެ ވާހަކަ. އިރާދުކުރެއްވިއްޔާ ބިން ބޮޑު ކުރުމަށްޓަކައި މި ރަށާއި ކެރެއްދޫ އަޅުގަނޑުމުން ގުޅާލާނަން," ރައީސްގެ ވާހަކަފުޅުގައި ވިދާޅުވި އެވެ.
އޭގެ އިތުރުން ވެސް އެ ރަށަށް ގިނަ ވައުދުތަކެއް ރައީސް ވެވަޑައިގެންނެވި އެވެ.
"ވަށައިގެން އޮންނަ ލިންކް ރޯޑާއި ބޮޑު ދެ މަގުގައި ޒަމާނީ ފެންވަރަށް މަގުތައް ހަދައި ތާރު އަޅާނެ. އޭގެ އިތުރުން ޔޫތު ސެންޓަރަކާއި އެ ރަށުގައި އާ ސިއްހީ މަރުކަޒެއް އެޅުމަށް ވެސް ވައުދުވި. އަދި މަލްޓި ޕާޕަސް ހޯލުގެ ވައުދު ވެސް ވަޑައިގެންނެވި. ރަތަފަންދޫގެ ބަނދަރު ތަރައްގީކޮށް އެންމެ ޒަމާނީ ހިދުމަތްތައް ލިބޭނެ ގޮތް," ދެވަނަ ދައުރެއްގައި ކުރައްވާނެ ކަންކަން ލިސްޓު ކުރައްވަމުން ރައީސް ވައުދުވެވަޑައިގެންނިވި އެވެ.
ރައީސް ސޯލިހު ވިދާޅުވި ގޮތުގައި މި ސަރުކާރުގެ ވައުދުތަކުގެ ތެރެއިން 90 ޕަސެންޓު ވަނީ ފުއްދިފައި ނުވަތަ ނިންމުމުގެ މަރުހަލާގަ އެވެ. އަދި, މިއިން ޒަމާނަކު ވެސް ކުދި ރަށްތަކަށް އަޅާނުލާ މިންވަރަށް މި ސަރުކާރުން އަހަންމިއްޔަތުކަން ދީފައިވާ ކަމަށް ވެސް އެމަނިކުފާނު ވިދާޅުވި އެވެ.
