ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމުގެ އިސްތިއުނާފު ޝަރީއަތް އަންނަ ބުރާސްފަތި ދުވަހު ބާއްވަން ނިންމައިފި އެވެ.
މި މައްސަލައިގެ އިސްތިއުނާފު އަޑުއެހުމެއް އަންނަ ބުރާސްފަތި ދުވަހު ބާއްވަން ނިންމާފައިވާކަން ރައީސް ޔާމީނުގެ ވަކީލުންގެ ޓީމުގައި އިސްކޮށް ހުންނަވާ ޑރ. މުހައްމަދު ޖަމީލު އަހުމަދު ވަނީ މިއަދު ވިދާޅުވެފަ އެވެ.
އެމްއެމްޕީއާރުސީގެ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދިނުމުގެ މުއާމަލާތުގައި ޔޫސުފް ނައީމްގެ އަތުން ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވާ ކަމަށް ކްރިމިނަލް ކޯޓުން ވަނީ ހުކުމްކޮށްފަ އެވެ.
އިސްތިއުނާފު މައްސަލާގައި މިހާތަނަށް ބޭއްވުނީ ހަތަރު އަޑުއެހުމެކެވެ. ފުރަތަމަ ދެ އަޑުއެހުމުގައި އޮތީ ޔޫސުފް ނައީމްގެ ފަރާތުން ހުށަހެޅި ނުކުތާތަކުގެ ބަހުސެވެ. އެ ބަހުސް ނިންމާލުމަށް ފަހު، ތިންވަނަ އަދި ހަތަރުވަނަ އަޑުއެހުމުގައި ގެންދިޔައީ ޔާމީން ހުށަހެޅި ނުކުތާތަކުގެ ބަހުސެވެ.
އިސްތިއުނާފު މައްސަލަ ބުރާސްފަތި ދުވަހު ބާއްވަން ނިންމާފައިވާއިރު, ވ. އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގައި އިއްވާފައިވާ 11 އަހަރުގެ ޖަލު ހުކުމާއި ފަސް މިލިއަން ޑޮލަރުގެ ޖޫރިމަނާގެ ހުކުމް ފަސްކޮށްދިނުމުގެ އަމުރަކަަށް ޔާމީންގެ ފަރާތުން ވަނީ އެދިފަ އެވެ.
ނަމަވެސް އެއީ އެ ކަމަކަށް އެދި ހުށަހަޅަން އޮންނަ އިޖުރާއަތުގެ ތެރެއިން، އޮންނަ ގޮތް ނޫން ކަމަށް ބުނެ ހައި ކޯޓުން އޭރު ޖަވާބު ދީފައިވާ ކަން އެނގިފައިވެ އެވެ.
ރިޔާސީ އިންތިހާބުގައި ވާދަކުރުމަށް ޔާމީނުގެ ޝަރުތު ހަމަނުވާ ކަމަށް ސުޕްރީމް ކޯޓުން އިއްޔެ ކަނޑައެޅި އިރު، ޝަރުތު ހަމަނުވި އެއް ސަބަބަކީ ޖޫރިމަނާ ނުދައްކާ އޮތުމުން ސާބިތު ދަރަންޏެއް އެމަނިކުފާނުގެ މައްޗަށް އޮތުމުންނެވެ. އޭރު ޔާމީން ވިދާޅުވަމުން ގެންދެވީ ވެސް ހައި ކޯޓުގައި މުޅި ހުކުމް ތަންފީޒުކޮށްދިނުމުގެ އަމުރެއް ނެރެދިނުމަށް އެދިފައިވާ ކަމަށެވެ.
ހުކުމް ތަންފީޒުކުރުން ފަސްކުރުމުގެ އަމުރެއް ނެރެދިނުމަށް އެދިފައިމިވަނީ، ކްރިމިނަލް ކޯޓުން ކުރި ހުކުމުގެ ދަށުން ހަ މަސް ދުވަހުގެ ތެރޭގައި ދައްކަން ޖެހޭ ފަސް މިލިއަން ޑޮލަރު ނުދައްކާ އޮތުމުން އެ ފައިސާ ހޯދުމަށް އެޓާނީ ޖެނެރަލްގެ އޮފީހުން ސިވިލް ކޯޓަށް މައްސަލައެއް ހުށަހަޅާފައިވަނިކޮށެވެ.
އަދި ޔާމީން ޖަލުގައި ހުންނަވާތީ، ޕީޕީއެމް/ޕީއެންސީގެ މުހިންމު ނިންމުންތައް ނިންމުމުގައި އެމަނިކުފާނާ މުއާމަލާތް ކުރުމުގައި ދަތިތަކެއް ކުރިމަތިވާތީ އިދިކޮޅު ދެ ޕާޓީ ހިމެނޭ ޖޮއިންޓް ސެނެޓުގެ ތެރޭގައި އެ ކަންބޮޑުވުންތައް ވެސް ބޮޑުވެފައިވާ ދަނޑިވަޅެއްގަ އެވެ.
