ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަކުރައްވާ ބައެއް ބޭފުޅުންނަކީ ކާމިޔާބުނުވާނެކަން އެނގިވަޑައިގަންނަވާ ހާލު، ވޯޓް ބައިބައިކުރައްވަން ކުރިމަތިލެއްވި ބޭފުޅުންތަކެއް ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސޯލިހު ސިފަކުރައްވައިފި އެވެ.
ރިޔާސީ އިންތިހާބަށް ކުރާ ކެމްޕެއިނުގައި އެމްޑީޕީން ގދ. ހޯޑެއްދޫގައި މިއަދު ބޭއްވި ޖަލްސާގައި ރައީސް ވިދާޅުވީ އެފަދަ ބައެއް ބޭފުޅުންގެ މާބޮޑު ތަސައްވުރެއް ނެތް ކަމަށާއި ރިޔާސީ އިންތިހާބުގައި ވާދަކުރައްވަނީ ނަމެއްގައި ކަމަށެވެ. އެފަދަ ބައެއް ބޭފުޅުންގެ ހަމަ އެކަނި މަގުސަދަކީ ބަޔަަކަށް ލިބެން އޮތް ފަސޭހައަކަށް ހުރަސް އެޅުން ކަމަށް ވެސް އެމަނިކުފާނު ވިދާޅުވި އެވެ.
"ކަނޑައެޅިގެން ތިމާމެންނަށް ވެރިކަމަކަށް ނާދެވޭނެކަން އެނގޭ އިރުގައި އެއަށް [ތަރައްގީއަށް] ހުރަސް އެޅުމަށް މަސައްކަތްކުރަމުން އެ ދަނީ،" ރައީސް ވިދާޅުވި އެވެ.
ރައީސްގެ ވާހަކަފުޅުގައި ސީދާ ވަކި ސިޔާސީ ޕާޓީއެއްގެ ނަން ވިދާޅު ނުވިޔަސް، އެ ދައްކަވަނީ އެމްޑީޕީގައި އިސްކޮށް ތިއްބެވުމަށް ފަހު ވަކިވެވަޑައިގެންނެވި ބޭފުޅުން އުފެއްދެވި ދަ ޑިމޮކްރެޓްސްގެ ވާހަކަ ކަން އެނގެ އެވެ. އެއީ "އެމީހުންގެ މާބޮޑު ވިޝަނެއް ނެތް" ކަމަށާއި ހަމަ އެކަނި މަގުސަދަކީ އެމްޑީޕީއާ އުފެދުނު ހިޔާލުތަފާތުވުން ތަކާ ހެދި، އުފެދުނު ހިޔާލުތަފާތުވުން ތަކުގައި ބަޔަކަަށް ލިބެން އޮތް ފަސޭހައަކަށް ހުރަސް އެޅުން ކަމަށް ވިދާޅުވީމަ އެވެ.
"ނަމެއްގައި ކުރިމަތިލައިގެން ތިއްބެވި ބޭފުޅުން އެބަ ތިއްބި. ވޯޓްތައް ބައިބައިކޮށްލުމަށް ޓަކައި. އެމީހުންގެ މާބޮޑު ވިޝަން އެއް ނެތް. ހަމަ އެކަނި މަގުސަދަކީ އެ އައި ހިޔާލުތަފާތުވުން ތަކުގައި، ސިޔާސީ ހިޔާލުތަފާތުވުން ތަކުގައި ބަޔަކަށް ލިބެން އޮތް ފަސޭހައަކަށް ހުރަސް އެޅުން،" ރައީސް ވިދާޅުވި އެވެ.
އެ ވާހަކަފުޅާ ގުޅުވައި ރައީސް މުހާތަބުކުރެއްވީ އެމްޑީޕީން ވަކިވި މީހުންނަށެވެ. އެމީހުން އަލުން ވިސްނައި، ކުރިއަށް އޮތް ރިޔާސީ އިންތިހާބުގައި އެމްޑީޕީއަށް ވޯޓްދޭން އެމަނިކުފާނު އެދިވަޑައިގެންނެވި އެވެ.
އެމްޑީޕީއާ ހިޔާލުތަފާތުވެ، ދަ ޑިމޮކްރެޓްސްގެ ނަމުގައި އާ ޕާޓީއެއް އުފެއްދެވީ ރައްޔިތުންގެ މަޖިލީހުގެ ރައީސް މުހައްމަަދު ނަޝީދު އިސްކޮށް ހުންނަވައިގެންނެވެ. އެ ޕާޓީގެ ރިޔާސީ ކެންޑިޑޭޓަކީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
