ރާއްޖެ އަށް ކުރިމަތިވެފައިވާ އެންމެ ބޮޑު އެއް މައްސަލަ ކަމުގައިވާ، ބޯހިޔާވަހިކަމުގެ މައްސަލަ އަށް ހައްލެއް ހޯދައި ދިނުމަށްޓަކައި ގެދޮރު އިމާރާތް ކުރަން ލޯނު ދޫކުރާނެ ހާއްސަ ބޭންކެއް ގާއިމުކޮށް، ދޫކުރާ ލޯނުގެ އިންޓަރެސްޓު ހަ ޕަސެންޓަށް ވުރެ އިތުރު ވިޔަ ނުދޭނެ ކަމަށް، ރައީސް އިބްރާހިމް މުހައްމަދު ސޯލިހުގެ "އުފާވެރި ދިރިއުޅުން" ސިޔާސަތުގައި ކަނޑައަޅުއްވައި އިއުލާނު ކުރައްވައިފި އެވެ.

ރިޔާސީ ދެ ވަނަ ދައުރެއް ހޯއްދެވުމަށްޓަކައި ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ވާދަ ކުރައްވާ ރައީސް ސޯލިހު އިއުލާނު ކުރެއްވި ފުރަތަމަ ސިޔާސަތުގައި ބޯހިޔާވަހިކަމުގެ މައްސަލަ ހައްލުކުރަން މުހިންމު ކަންތައްތަކެއް ހިމެނެ އެވެ. އޭގެ ތެރޭގައި މިހާރު އިއުލާނުކޮށްފައިވާ ގެދޮރުވެރިޔާ ލޯނުގެ އުސޫލު މުރާޖައާކޮށް ލޯނު ދޫކުރެވޭ އަދަދު އެއް މިލިއަން ރުފިޔާއަށް އިތުރުކޮށް، ލުއިފަސޭހަ ނިޒާމަކުން ލޯނު ލިބޭނެ މަގު ތަނަވަސް ކުރަން ކަނޑައަޅާފައިވެ އެވެ.

ސިޔާސަތުތައް

• ގެދޮރުވެރިކުރުވުމާއި ބިންވެރިކުރުމުގެ ސިޔާސަތު މުޅި ރާއްޖެއަށް ފުޅާކުރުމަށް ބިން ދަތި ރަށްރަށުގައި ބިން އިތުރުކުރެވޭނެ.
• ބިން ދަތި ރަށްރަށުގައި ހައުސިންގް ޔުނިޓްތައް ގާއިމުކުރާނެ.
• ފުދުންތެރިކަން ކުޑަ ފަރާތްތަކަށް އިސްކަންދީގެން ކައުންސިލް ހައުސިންގް ތައާރަފްކުރާނެ.
• ހައުސިންގް ފައިނޭންސް ފޯރުކޮށްދިނުމަށް ހާއްސަ ބޭންކެއް ގާއިމުކޮށް، ދިރިއުޅުމުގެ ބޭނުމަށް ފުރަތަމަ ފަހަރަށް ބޯހިޔާވަހިކަމެއް ހޯދުމަށް ނެގޭ ލޯނުގެ އިންޓަރަސްޓް 6 އިންސައްތައަށްވުރެ ގިނަ ނުވާނެހެން، 10 ޕަސަންޓް އިކުއިޓީގައި ފޯރުކޮށްދޭނެ.
• ގެދޮރުވެރިޔާ ލޯނުގެ އުސޫލު މުރާޖައާކޮށް ލޯނު ދޫކުރެވޭ އަދަދު 1 މިލިއަން ރުފިޔާއަށް އިތުރުކޮށް، ލުއިފަސޭހަ ނިޒާމަކުން ލޯނު ލިބޭނެމަގު ތަނަވަސްކުރާނެ.
• އަތޮޅުތެރޭގައި ހުހަށް ހުންނަ ގޯތިގެދޮރު، އެ ތަންތަނުގެ ވެރިފަރާތުން ބޭނުންވާނަމަ، އެ ތަންތަނުން ނަފާ ލިބޭނެ ގޮތް ފަހިކުރާނެ.
• ރިއަލް އެސްޓޭޓް މާކެޓް ރެގިއުލޭޓްކޮށް، ކަނޑައެޅޭ މިންގަނޑަށް ރިއަލް އެސްޓޭޓް ޑިވެލޮޕް ކުރާ ފަރާތްތައް ސަރުކާރުން ސެޓިފައިކޮށް، ބޯހިޔާވަހިކަން ގަންނަ ފަރާތްތަކުގެ ރައްކާތެރިކަން ކަށަވަރުކުރާނެ.

އަންނަ ދައުރުގައި ހައުސިން ލޯނަށް ބޮޑު ލުޔެއް ގެނައުމަށް ކަނޑައެޅިއިރު، މި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހުޅުމާލެ، ގުޅިފަޅު އަދި ގިރާވަރުން 6،200 ގޯތި މާލޭ ރައްޔިތުންނަށް ދޫކުރަން ވަނީ ނިންމައިފަ އެވެ. އެ ގޯތިތައް ލިބޭ ފަރާތްތަކުގެ ވަގުތީ ލިސްޓު ވަނީ އިއުލާނުކޮށްފަ އެވެ. އަދި މި ސަރުކާރުގެ ފްލެޓުތައް ލިބޭ ފަރާތްތަކުގެ ވަގުތީ ލިސްޓު މާދަމާ އިއުލާނު ކުރަން ވަނީ ނިންމައިފަ އެވެ.

މި ސަރުކާރުން ހުޅުމާލޭގައި މިހާރު އިމާރާތް ކުރަމުންދާ 4،000 ހައުސިން ޔުނިޓުގެ އިތުރުން، އިތުރު 4،000 ޔުނިޓު ބިނާކުރަން ދާދި ފަހުން ވަނީ ބަޔަކާ ހަވާލުކޮށްފަ އެވެ.