މަތީ ތައުލީމު މިހާރަށް ވުރެ ފަސޭހަކުރުމުގެ ބޮޑެތި ވައުދުތަކަކާ އެކު އެމްޑީޕީގެ މެނިފެސްޓޯ މިރޭ ލޯންޗްކޮށްފި އެވެ.
އެމްޑީޕީގެ މެނިފެސްޓޯ ލޯންޗް ކުރީ ، ކުރިއަށް އޮތް ރިޔާސީ އިންތިހާބަށް އެމްޑީޕީގެ ރިޔާސީ ކެންޑިޑޭޓްގެ ހައިސިއްޔަތުން ރައީސް އިބްރާހީމް މުހައްމަދު ސޯލިހު ކުރައްވާ ކެމްޕޭނުގައި ދ. ކުޑަހުވަދޫގައި މިރޭ ބޭއްވި ޖަލްސާގަ އެވެ.
އެ މެނިސްޓޯގައި ހިމެނޭ އެއް ވައުދު ކަމަށްވާ "އުފެއްދުންތެރި ފުދުންތެރި ޖީލު" ގެ ބައިގައި ހިމެނޭ އެއް ވައުދަކީ "ފެންވަރު ރަނގަޅު މަތީ ތައުލީމާއި ތަމްރީނު"ގެ ވައުދެވެ. އެ ބައިގައި ހިމެނޭ އެއް ވައުދަކީ މަތީ ތައުލީމާއި ތަމްރީނަށް ދޫކުރާ ލޯނު އެހީގެ އުސޫލު މުރާޖައާކޮށް، ކަނޑައެޅޭ މިންގަނޑެއްގެ ތެރެއިން ލޯނު ދައްކަން އޮންނަ މިންވަރެއް މައާފުކުރުމެވެ. ލޯނު އަނބުރާ ދައްކަން ލިބޭ ގްރޭސް ޕީރިއަޑް އިތުރުކުރުމަކީ ވެސް ވައުދެކެވެ.
ލޯނު ފުރުސަތުގެ ދަށުން ކިޔަވަން ފުރުސަތު ދޭއިރު ރާއްޖޭގައި މިހާރު ޕްރޮފެޝަނަލީ ހަރަކާތްތެރިވާ ބިދޭސީން ތިބި ދާއިރާތަކާއި އަދަދަށް ބަލާ، އެ ދާއިރާތަކުން ކިޔެވުމަށް ފުރުސަތުދޭން ވެސް މެނިފެސްޓޯގައި ވައުދު ވެފައި ވެ އެވެ.
މަތީ ތައުލީމާ ގުޅޭ ބައެއް ބޮޑެތި ވައުދުތައް
- ޒަމާނީ އީ-ލަރނިންގް ނިޒާމުތައް ގާއިމުކުރުމަށް ހިތްވަރުދީ، އީ-ލަރނިންގް ނިޒާމުގެ ފެންވަރު އެކަށައެޅި، އީ-ލަރނިންގް މެދުވެރިކޮށް ކިޔެވޭނެ ދާއިރާތަކާއި ހިފަހައްޓަންޖެހޭ މިންގަނޑުތައް ކަނޑައަޅުން.
- މަތީ ތައުލީމާއި ތަމްރީނުގެ ސިޔާސަތަކީ އެޑިއުކޭޝަނަލް ޓުއަރިޒަމްއަށް ފަހިވާގޮތަށް ބައްޓަންކޮށްފައިވާ ސިޔާސަތަކަށްހެދުން
- ދުނިޔޭގެ ނަން މަޝްހޫރު ހޮސްޕިޓަލިޓީ ސްކޫލެއްގެ ކެމްޕަސް ރާއްޖޭގައި ގާއިމްކުރުން.
- ރާއްޖެއިން ބޭރުން ކުދިން ކިޔަވަން ރާއްޖެއައުމަށް ބާރުއެޅުމުގެ ގޮތުން ސްޓޫޑަންޓް ވިސާ ތައާރަފްކުރުން.
- މާލެ ސަރަހައްދުގައާއި އާބާދީ ބޮޑެތި ސަރަހައްދުތަކުގައި އިތުރު ދަނާލުތައް ގާއިމުކޮށް މަތީ ތައުލީމާއި ތަމްރީނު ޕްރޮގްރާމްތަކުގައި ބައިވެރިވުން އިތުރުކުރުން.
- ހިލޭ ޑިގްރީ ޕްރޮގްރާމް ފުޅާކޮށް ސެޓްފިކެޓް 1 އިންފެށިގެން ޑިގްރީއާ ހަމައަށް ހިލޭ ކިޔެވޭގޮތް ހެދުން
- ސަނަދު ނެތް ފަރާތްތަކުގެ ތަޖުރިބާއަށް ސަނަދު ހޯދައިދޭ ނިޒާމު (ޓްރޭޑް ޓެސްޓިންގް) ފުޅާކޮށް، އަޕްސްކިލިންގް/ރީ-ސްކިލިންގް ފުރުސަތުތަކާއެކު ސެޓިފައިޑް ޕްރޮފެޝަނަލްސް ތައާރަފްކުރުން
ހުނަރު ތަރައްގީކުރެވޭނެ ހަބްތައް ރާއްޖޭގެ އެކި ސަރަހައްދުތަކުގައި ގާއިމުކުރަން ވެސް އެ މެނިފެސްޓޯގައި ވައުދެއްގެ ގޮތުގައި ހިމަނާފައި އެބަ އޮތެވެ. ރާއްޖޭގެ އައި.ސީ.ޓީ ދާއިރާގެ ހުނަރުވެރިންނާއި އެހެނިހެން އުފެއްދުންތެރިން ރާއްޖޭގައި ތިބެގެން އެފަރާތްތަކުގެ އުފެއްދުންތެރިކަން ބޭރުގެ ބާޒާރަށްނެރެ، މާރކެޓްކޮށް، ކުރިއެރުވޭނެ މާހައުލެއް ގާއިމުކުރުމަކީ ވެސް ވައުދެކެވެ.
ފުޅާ ދާއިރާއެއްގައި ގިނަ ދާއިރާތަކެއް ހިމަނައިގެން އެކުލަވައިލި އެ މެނިފެސްޓޯގައި މި ދައުރުގައި ހާސިލުކުރެވުނުކަމަށް އެމްޑީޕީން ދެކޭ ގިނަ ކަންތައްތަކެއްގެ މައުލޫމާތު ވެސް ހިމަނާފައި އެބަ ހުއްޓެވެ.
"މަތީ ތައުލީމާއި ތަމްރީނުގެ ގާނޫނެއް ފުރަތަމަ ފަހަރަށް ވުޖޫދުވެގެންއައީ މި ސަރުކާރުގައެވެ. ހަމަމިއާއެކު، މަތީ ތައުލީމާއި ތަމްރީނަށް އެއްމެ ބޮޑު ހޭދައެއްވެސް ކޮށްފައިވަނީ މި ސަރުކާރުންނެވެ. މީގެ ތެރޭގައި ލޯނު އެޑްމިނިސްޓްރޭޓިވް ޗާޖް ފަސް އިންސައްތައިން އެއް އިންސައްތައަށް ކުޑަކުރުމާއި، 3000 ވުރެ ގިނަ ދަރިވަރުންނަށް ލޯނު ފުރުސަތު ހޯދައިދިނުން ހިމެނެއެވެ،" މަތީ ތައުލީމާއި ތަމްރީނުގެ ދާއިރާއިން ހާސިލުކުރެވުނު ކަންތައް ތައް ތަފްސީލު ކުރަމުން އެ މެނިފެސްޓޯގައި ބުނެފައި ވެ އެވެ.
ސަރުކާރުން އެންމެ ބޮޑު އިސްކަމެއްދީގެން ތައާރަފުކުރި ހިލޭ ޑިގްރީ ޕްރޮގްރާމުން 18،000 އަށްވުރެ ގިނަ ކުދިންނަށް ޑިގްރީ ފެންވަރަށް ކިޔެވުމަށް ފުރުސަތު ހޯދައިދެވިއްޖެ ކަމަށާއި އޭގެ ތެރެއިން 7،000 އަށްވުރެ ގިނަ ކުދިން މިހާރުވަނީ ހިލޭ ޑިގްރީ ޕްރޮގްރާމުން ދަސްވެނިވެފައި ކަމަށް ވެސް ބުންޏެވެ.
