ސެޕްޓެމްބަރު، 9 ގައި އޮންނަ ރިޔާސީ އިންތިހާބުގައި ވާދަކުރުމަށް ވެރިކަން ކުރާ، އެމްޑީޕީ އާއި ރިޔާސީ ރޭހުގައި އަލަށް ވާދަ ކުރާ، އެމްއެންޕީން ހުށަހެޅި ކެންޑިޑެސީ ފޯމުތަކުގެ ޝަރުތު ހަމަވާކަމަށް ކަނޑައަޅައި އެ ޕާޓީތަކުގެ ކެންޑިޑޭޓުން އިލެކްޝަންސް ކޮމިޝަނުން ގަބޫލުކޮށްފި އެވެ.
އިލެކްޝަންސް ކޮމިޝަނުގެ ނައިބު ރައީސް، އިސްމާއިލް ހަބީބް މިރޭ ވިދާޅުވީ، އެމްއެންޕީއާއި އެމްޑީޕީގެ ކެންޑިޑެސީ ފޯމު ބަލައިގަންނަން އޭގައިވާ މައުލޫމާތާއި އެއްކޮށް ހުށަހެޅި ލިޔެކިޔުންތައް ބަލައި ޗެކު ކުރުމަށްފަހު ގާނޫނޫގައި އޮންނަ ގޮތުގެ މަތީން ކަމަށެވެ.
ރިޔާސީ އިންތިހާބަށް ކުރިމަތިލުމުގެ މުއްދަތު މާދަމާއަށް ހަމަވާއިރު، ތިން ޕާޓީއަކުން މިއަދު ވަނީ އިލެކްޝަންސްއަށް ކެންޑިޑެސީ ފޯމު ހުށަހަޅައިފަ އެވެ.
އެމްޑީޕީގެ ފަރާތުން ކެންޑިޑޭޓެއްގެ ގޮތުގައި ހުށަހެޅީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެވެ. ރަނިން މޭޓެއްގެ ގޮތުގައި ހުށަހެޅީ ހިތަދޫ އުތުރު ދާއިރާގެ މެމްބަރު، މުހައްމަދު އަސްލަމް އެވެ. އެމްއެންޕީގެ ކެންޑިޑޭޓެއްގެ ގޮތުގައި ހުށަހެޅީ ދަގެނތި ދާއިރާގެ މެމްބަރު، މުހައްމަދު ނާޒިމް އެވެ. ރަނިންމޭޓެއްގެ ގޮތުގައި ހުށަހެޅީ ޑރ. އަހުމަދު އަދީލް ނަސީރު އެވެ.
ކުރީގެ ރައީސް ނަޝީދު އިސްވެ ހުންނަވައި އުފެއްދެވި ދަ ޑިމޮކްރެޓްސް އިން ކެންޑިޑޭޓެއްގެ ގޮތުގައި ހުށަހެޅީ، ހުޅުދޫ ދާއިރާގެ މެމްބަރު، އިލްޔާސް ލަބީބެވެ. ރަނިންމޭޓެއްގެ ގޮތުގައި ހުށަހެޅުއްވީ އެސްޓީއޯގެ ކުރީގެ މެނޭޖިން ޑިރެކްޓަރު، ހުސެއިން އަމްރު އެވެ.
މިއަދު ހުށަހެޅި ތިން ޕާޓީގެ ތެރެއިން ދެ ޕާޓީއެއްގެ ކެންޑިޑެސީ އިލެކްޝަނުން ގަބޫލުކޮށްފައި ވާއިރު، ދަ ޑިމޮކްރެޓްސް އިން ހުށަހަޅާފައިވާ ފޯމުގެ މަސައްކަތް އެއްކޮށް ނިމިފައި ނުވާ ކަމަށް ހަބީބު ވިދާޅުވި އެވެ.
"އެ ޕާޓީގެ ފޯމުގައި ބައެއް މައުލޫމާތު މަދުވާތީ ލަސްވަނީ، އެކަމަކު މާދަމާއަށް އެ ފޯމު ވެސް އެއްކޮށް ނިންމާލެވޭނެ ކަމަށް މި ބަލަނީ،" ހަބީބު ވިދާޅުވި އެވެ.
ރިޔާސީ އިންތިހާބުގައި ވާދަ ކުރުމަށް އެންމެ ފުރަތަމަ ފޯމު ހުށަހެޅީ އިދިކޮޅު ޕީޕީއެމުންނެވެ. ނަމަވެސް އެ ޕާޓީގެ ކެންޑިޑޭޓު، އަބްދުﷲ ޔާމީނުގެ ޝަރުތު ހަމަނުވާ ކަމަށް ބަލައި އިލެކްޝަންސް އިން ވަނީ އެ ފޯމު ބަލައިނުގަންނަން ނިންމައިފަ އެވެ. އެ މައްސަލަ ޕީޕީއެމުން ސުޕްރީމު ކޯޓަށް ވެއްދުމުން އެ ކޯޓުން ވެސް ވަނީ އެ ނިންމުން ރަނގަޅު ކަމަށް މިއަދު ހުކުމް ކޮށްފަ އެވެ.
އެ ހުކުމާ ގުޅިގެން ރިޔާސީ އިންތިހާބާ މެދު އަމަލު ކުރާނެ ގޮތެއް އަދި އެ ޕާޓީން ނިންމާފައެއް ނުވެ އެވެ. އެހެނަސް އެޕާޓީގައި ދެން ހިމެނޭ ޕީއެންސީން ވަނީ އެ ޕާޓީގެ ސެނެޓުން މިދިޔަ ބުރާސްފަތު ދުވަހު ކަނޑައެޅި ކެންޑިޑޭޓުގެ ފޯމު މާދަމާ ހުށަހަޅަން ނިންމައިފަ އެވެ.
ގާސިމް އިބްރާހިމްގެ ޖުމްހޫރީ ޕާޓީން ވެސް ވަނީ އެ ޕާޓީގެ ކެންޑިޑެސީ ފޯމު މާދަމާ އިލެކްޝަންސްއަށް ހުށަހަޅަން ނިންމައިފަ އެވެ. އެ ޕާޓީގެ ފޯމު ހުށަހެޅުމަށް ނިންމާފައި ވަނީ މާދަމާ ހެނދުނު 11:00 ގަ އެވެ.
