ކުރިއަށް އޮތް ރިޔާސީ އިންތިހާބު ބޮއިކޮޓް ކުރަން އިދިކޮޅު ޕީޕީއެމްގެ ލީޑަރު އަބްދުﷲ ޔާމީން ދެއްވި ހިޔާލު މިއަދު ޕާޓީގެ ސެނެޓުން ފާސްނުވުމުން ވެސް އިންތިހާބުގައި ބައިވެރިނުވާން އެމަނިކުފާނު ދެ ވަނަ ފަހަރަށް މިރޭ ޕާޓީއަށް އަންގަވައިފި އެވެ.
"އަދަދު" އަށް އެނގިފައިވާ ގޮތުގައި އިންޔިހާބު ބޮއިކޮޓް ކުރަން ދެ ވަނަ ފަހަރަށް ޔާމީން ޕާޓީއަށް އެންގެވީ އަަނބިކަނބަލުން ފާތިމަތު އިބްރާހިމަށް މާފުށީ ޖަލުގައި ހުންނަވައި ގުޅުއްވައިގެނެވެ.
ޔާމީންގެ ފޯން ކޯލާއެކު، އިންތިހާބު ބޮއިކޮޓް ކުރަން ޕީޕީއެމްގެ ލީޑާޝިޕުން މިވަގުތު ބައްދަލުވެއް ބާއްވަމުންދާ ކަމަށް ވެސް މި ނޫހަށް އެނގިފައިވެ އެވެ.
އިންތިހާބު ބޮއިކޮޓް ކުރަން ޔާމީން ހިޔާލު ދެއްވުމުން މިއަދު ބޭއްވި ސެނެޓު ބައްދަލުވުމުގައި އެކަން ފާސްނުވީ ޖަލްސާ ހޫނުވެ، ހަމަނުޖެހުން ހިނގައިދިޔަ ފަހުންނެވެ. އިންތިހާބު ބޮއިކޮޓް ކުރަން ލިބުނީ 45 ވޯޓެވެ. އިންތިހާބުގައި ބައިވެރިވާން 67 ވޯޓު ލިބުނެވެ.
"ރައީސް ދެއްވި ހުށަހެޅުއްވުމަށް މަޝްވަރާ ކުރުމަށްފަހު ރައީސް [ޔާމީން] މިނިވަން ކުރެވެން އަންނަނީ އިންތިހާބުގައި ވާދަކޮށްގެން ކަމަށް ފެންނާތީ، އެގޮތަށް ރައީސް އަށް ލަފާ އަރުވަން ސެނެޓުން ނިންމައިފި. އަދި ރައީސްގެ ހައްގުގައި ކުރަން ޖެހުނު ކޮންމެ ކަމެއް ކުރުމަށް ވެސް ސެނެޓު އެއްކޮށް އިއްތިފާގުވޭ،" ޕާޓީގެ ފަރާތުން މިއަދު ބުންޏެެވެ.
ޔާމީންއަށް ވާދަ ނުކުރެއްވޭ ހާލަތަކަށް ވިސްނައި މިދިޔަ ބުރާސްފަތި ދުވަހު ޕީޕީއެމްގެ ސިސްޓާ ޕާޓީ ޕީޕަލްސް ނެޝަނަލް ކޮންގްރެސްއިން ވަނީ މާލޭގެ މޭޔަރު ޑރ. މުހައްމަދު މުއިއްޒު ކެންޑިޑޭޓެއްގެ ގޮތުގައި އިންތިހާބުކޮށްފަ އެވެ. ނަމަވެސް ޕީޕީއެމްގެ ލީޑާޝިޕުން މިހާރު ބުނަނީ ޕީޕީއެމްގެ ކެންޑިޑޭޓެއް ނުކުންނަ ނަމަ ޕީއެންސީން މުއިއްޒު ވާދަ ނުކުރެއްވުމަށް އެއްބަސްވެފައިވާ ކަމަށެވެ.
އޭނާގެ ކެންޑިޑެސީ ފޯމު މާދަމާ ހުށަހަޅާނެ ކަމަށް މުއިއްޒުގެ ކެމްޕެއިން ޓީމުން ބުނެ އެވެ.
ކުރިއަށް އޮތް ރިޔާސީ އިންތިހާބުގައި ވާދަ ކުރައްވަނީ އެމްޑީޕީގެ ކެންޑިޑޭޓް އަދި މިހާރު ރައީސް އިބްރާހިމް މުހައްމަދު ސޯލިހާއި ދަ ޑިމޮކްރެޓްސްގެ އިލްޔާސް ލަބީބާއި ޖުމްހޫރީ ޕާޓީގެ ގާސިމް އިބްރާހިމެވެ. އޭގެ އިތުރުން މޯލްޑިވްސް ނެޝަނަލް ޕާޓީގެ މުހައްމަދު ނާޒިމާއި މޯލްޑިވްސް ރިފޯމް މޫވްމަންޓުގެ ފާރިސް މައުމޫނާއި ކުރީގެ ހޯމް މިނިސްޓަރު އުމަރު ނަސީރު ވެސް އިންތިހާބުގައި ވާދަ ކުރައްވަ އެވެ.
