ކުރިއަށް އޮތް ރިޔާސީ އިންތިހާބު ބޮއިކޮޓްނުކޮށް އެ އިންތިހާބުގައި ވާދަ ކުރަން އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އިން ނިންމީ ކުރީގެ ރައީސް އަބްދުﷲ ޔާމީންގެ ހައްގުގައި ކަމަށް އެ ޕާޓީން މިއަދު ބުނެފި އެވެ.
ސުޕްރީމް ކޯޓުގެ ހުކުމާ އެކު ޔާމީނަށް ކުރިއަށް އޮތް ރިޔާސީ އިންތިހާބުގައި ވާދަ ނުކުރެއްވޭތީ އެ އިންތިހާބު އިދިކޮޅު ޕީޕީއެމްއިން ބޮއިކޮޓް ކުރަން އެމަނިކުފާނު އެންގެވުމުން ޕާޓީގެ ސެނެޓުގައި މިއަދު ހޫނު ބަހުސެއް ކުރިއަށްދިޔަ އެވެ. އެ ބަހުސަށް ފަހު އެކަމާ މެދު ގޮތެއް ނިންމުމަށް މިއަދު ސެނެޓުގައި ނެގި ވޯޓު ޔާމީންގެ ފެކްޝަނަށް ކާމިޔާބުވެފައި ނުވެ އެވެ.
މިއަދު ބޭއްވި ސެނެޓުގެ ބައްދަލުވުމުގައި އިންތިހާބު ބޮއިކޮޓް ކުރަން ވޯޓު ދިނީ 45 ސެނެޓަރުންނެވެ. އިންތިހާބުގައި ބައިވެރިވާން 67 ވޯޓު ލިބުނެވެ. ޖުމްލަ 126 ސެނެޓަރަކު ޖަލްސާއަށް ހާޒިރުވި އެވެ. ނަމަވެސް, ހުރިހާ މެމްބަރުން ވޯޓުގައި ބައިވެރިއެއް ނުވެ އެވެ.
"ރައީސް ދެއްވި ހިޔާލަށް މަޝްވަރާ ކުރުމަށް ފަހު, ރައީސް މިނިވަން ކުރެވެން އަންނަނީ އިންތިހާބުގައި ވާދަކޮށްގެން ކަމަށް ފެންނާތީ އެގޮތަށް ރައީސަށް ލަފާ އަރުވަން ސެނެޓުން ނިންމައިފި. އަދި, ރައީސްގެ ހައްގުގައި ކުރަން ޖެހުނު ކޮންމެ ކަމެއް ކުރުމަށް ވެސް ސެނެޓު އެއްކޮށް އިއްތިފާގުވޭ," އެކަމާ ގުޅިގެން ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް ވިދާޅުވި އެވެ.
އިންތިހާބުގައި ޕީޕީއެމްއިން ޕާޓީން ބައިވެރިވާން ނިންމި ނަމަވެސް އަދި މިހާތަނަށް ކެންޑިޑޭޓަކު ކަނޑައަޅާފައެއް ނުވެ އެވެ. އެކަމާ ގުޅިގެން ގޮތެއް ނިންމުމަށް ސެނެޓު އެއްވާނެ ކަމަށް ބެލެވެ އެވެ.
ޔާމީނަށް ވާދަ ނުކުރެއްވޭ ހާލަތެއްގައި ޕީޕީއެމްގެ ކެންޑިޑޭޓަކު ނެރުމަށް ފުރުސަތެއް ދޭން އެ ޕާޓީން ސުޕްރީމް ކޯޓުގައި އެދުނެވެ. އިންތިހާބަށް ކުރިމަތިލުމުގެ ސުންގަޑި މާދަމާގެ ނިޔަލަށް ހަމަވާއިރު، ޔާމީނަށް ވާދަ ނުކުރެއްވޭ ހާލަތެއްގައި ނިކުންނެވުމަށް ޕީއެންސީގެ ކެންޑިޑޭޓް މާލޭގެ މޭޔަރު ޑރ. މުހައްމަދު މުއިއްޒު ހުންނެވީ ތައްޔާރަށެވެ.
ހުކުމެއް ތަންފީޒު ކުރަމުންދާ މީހަކަށް ނުވުމާއި އެމީހެއްގެ މައްޗަށް ސާބިތު ދަރަންޏެއް ނެތުމަކީ ރައީސުލްޖުމްހޫރިއްޔާކަމުގެ ޝަތުރުތަކުގެ ތެރެއިން ދެ ޝަރުތެވެ. އެ ދެ ޝަރުތު ވެސް ޔާމީނުގެ ކިބައިގައި ނެތް ކަމަށް މިއަދު ވަނީ ނިންމާފަ އެވެ.
ކުރިއަށް އޮތް ރިޔާސީ އިންތިހާބުގައި ވާދަ ކުރައްވަނީ އެމްޑީޕީގެ ކެންޑިޑޭޓް އަދި މިހާރު ރައީސް އިބްރާހިމް މުހައްމަދު ސޯލިހާއި ދަ ޑިމޮކްރެޓްސްގެ އިލްޔާސް ލަބީބާއި ޖުމްހޫރީ ޕާޓީގެ ގާސިމް އިބްރާހިމެވެ. އޭގެ އިތުރުން މޯލްޑިވްސް ނެޝަނަލް ޕާޓީގެ މުހައްމަދު ނާޒިމާއި މޯލްޑިވްސް ރިފޯމް މޫވްމަންޓުގެ ފާރިސް މައުމޫނާއި ކުރީގެ ހޯމް މިނިސްޓަރު އުމަރު ނަސީރު ވެސް އިންތިހާބުގައި ވާދަ ކުރައްވަ އެވެ.
