ސެޕްޓެމްބަރު 9, ގައި ބާއްވާ ރިޔާސީ އިންތިހާބަށް ވާދަކުރަން މިއަދު ތިން ކެންޑިޑޭޓެއްގެ ފޯމު އިލެކްޝަންސް ކޮމިޝަނަށް ހުށަހަޅާފައިވާއިރު, ކެމްޕެއިން ކުރުމުގެ ހަމަހަމަ ފުރުސަތާމެދު ތިން ޕާޓީން ތަފާތު ހިޔާލުތަކެއް ފާޅުކޮށްފި އެވެ.
މިއަދު އިލެކްޝަންސް ކޮމިޝަނަށް ފޯމު ހުށަހެޅީ އެމްޑީޕީ, އެމްއެންޕީ އަދި ޑިމޮކްރެޓްސްގެ ފޯމެވެ. ރާއްޖޭގެ ސިޔާސީ މަޝްރަހު އޮތްގޮތުން ކެންޑިޑޭޓުންނަށް ކެމްޕެއިން ކުރުމުގެ ހަމަހަމަ ފުރުސަތު އޮތްތޯ ސުވާލު ކުރުމުން ބައެއް ޕާޓީތަކުން އެ ފުރުސަތު އޮތް ކަމަށް ބުނާއިރު, ބައެއް ޕާޓީތަކުން ދެކޭ ގޮތުގައި އެ ހަމަހަމަ ފުރުސަތެއް ނެތެވެ.
ޑިމޮކްރެޓްސްގެ ކެންޑިޑޭޓް އިލްޔާސް ލަބީބް ވިދާޅުވި ގޮތުގައި, ކެމްޕެއިން ކުރުމުގައި އެންމެ ބޮޑު ދައްޗެއް ކުރިމަތި ވަނީ, ކެމްޕޭން ހަރަކާތްތައް ރައްޔިތުންނާ ހަމައަށް ފޯރުކޮށްދޭ މީޑިއާތަކުން އެކަށީގެންވާ ކަވަރޭޖެއް ނުލިބުމެވެ. އަދި އިންތިހާބުގައި މީޑިއާގެ ދައުރު ބޮޑުކަން ފާހަގަކުރައްވާ, އޭނާ ވަނީ ކެންޑިޑޭޓުން ޖަވާބުދާރީ ކުރުވުމުގައި މީޑިއާތަކުން ކަވަރޭޖް ފުޅާ ކުރުމަށް އެދި ފަ އެވެ.
އެ ޕާޓީގެ ރަނިންމޭޓު ހުސެއިން އަމްރު ވަނީ, އެމްޑީޕީގެ ކެންޑިޑޭޓް އަދި ރައީސް ސޯލިހު, ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރާ ކަމުގެ ތުހުމަތު ކުރައްވާފަ އެވެ. އޭނާ ވަނީ, މި ދައުލަތުގެ ވަސީލަތްތައް ބޭނުންނުކޮށް, އެހެން ކެންޑިޑޭޓުންނާ އެއް ހަމައެއްގައި ވާދަކުރަން ނިކުތުމަށް ގޮވާލާފަ އެވެ.
އެމްޑީޕީގެ ފަރާތުން ކެންޑިޑޭޓުގެ ކެމްޕޭން އެޖެންޓު މުހައްމަދު ނާޝިޒް ވިދާޅުވީ, ދައުލަތުގެ ވަސީލަތްތައް ކެމްޕެއިނުގައި ބޭނުންކުރާ ކަމަށް ކޮންމެ މީހަކަށް ވެސް ތުހުމަތު ކުރެވިދާނެ ކަމަށެވެ. ނަމަވެސް އެ ޕާޓީގެ ކެމްޕޭން ކުރަމުން ދަނީ ދަތުރުފަތުރާއި ކެމްޕެއިން ހަރަކާތްތަކަށް ވެސް ޕާޓީން އަމިއްލައަށް ހަރަދުކޮށްގެން ކަމަށް އޭނާ ވިދާޅުވި އެވެ.
ނާޝިޒް ވިދާޅުވީ ސަރުކާރުން އަދި, އެއްވެސް އެހެން ފަރާތަކުން ވިޔަސް ކެންޑިޑޭޓަކަށް ކެމްޕެއިން ކުރުމަށް ހުރަސް ނާޅާ ކަމަށާއި, ހަމަހަމަ ފުރުސަތު އޮތް ކަމަށް ގަބޫލުކުރައްވާ ކަމަށެވެ.
އެމްއެންޕީގެ ކެންޑިޑޭޓް މުހައްމަދު ނާޒިމް ވިދާޅުވީ, މިހާރު ރާއްޖޭގައި އޮތީ ހަމަހަމަ ކަމާއެކު ކޮންމެ ކެންޑިޑޭޓަކަށް ވެސް އެކަށީގެންވާ ގޮތެއްގައި ކެމްޕެއިން ކުރެވޭނެ މާހައުލެއް ކަމަށެވެ. ނާޒިމް ވިދާޅުވި ގޮތުގައި, މިއަދާ ހަމައަށް ހަމަހަމަ ކަމާއެކު ކެމްޕޭން ކުރުމުގެ ފުރުސަތު އޮތް ނަމަވެސް ކުރިއަށް އޮތްތަނުގައި މަޝްރަހަށް އަންނަ ބަދަލާއެކު އެކަން ބަދަލުވުމުގެ ފުރުސަތު އެބަ އޮތެވެ.
ތިން ޕާޓީގެ ކެންޑިޑެސީ އީސީއަށް
ހެނދުނު 9:30 ގައި އެމްޑީޕީގެ ރިޔާސީ ކެންޑިޑޭޓް އަދި ރައީސް އިބްރާހިމް މުހައްމަދު ސޯލިހުގެ ކެންޑިޑެސީ ފޯމު އީސީއަށް ހުށަހެޅިއިރު, ރަނިންމޭޓަކަށް ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އަދި ކެމްޕޭން އެޖެންޓަކަށް ކިނބިދޫ ދާއިރާގެ މެންބަރު މުހައްމަދު ނާޝިޒް ވަނީ ހަމަޖައްސާފަ އެވެ.
އޭގެ ގާތްގަނޑަކަށް ގަޑިއިރެއް ފަހުން, 10:15 ގައި އެމްއެންޕީގެ ކެންޑިޑޭޓް އަދި ދަނގެތި ދާއިރާގެ މެމްބަރު މުހައްމަދު ނާޒިމްގެ ކެންޑިޑެސީ ފޯމު ވަނީ އީސީއަށް ހުށަހަޅާފަ އެވެ. ނާޒިމްގެ ރަނިން މޭޓަކަށް ޑރ. އަހުމަދު އަދީލް ނަސީރު ހަމަޖެއްސިއިރު, ކެމްޕެއިން އެޖެންޓަކަށް ހަމަޖެއްސީ ވިލިމާލެ ދާއިރާގެ މެންބަރު އަހުމަދު އުޝާމް އެވެ.
އެއަށްފަހު ޑިމޮކްރެޓްސްގެ ކެންޑިޑޭޓް އަދި ހުޅުދޫ ދާއިރާގެ މެންބަރު އިލްޔާސް ލަބީބްގެ ފޯމު ހުށަހެޅީ މެންދުރު 2:00 ގަ އެވެ. އިލްޔާސްގެ ރަނިންމޭޓަކަށް އެސްޓީއޯގެ ކުރީގެ އެމްޑީ ހުސެއިން އަމްރު ހަމަޖެއްސިއިރު, ކެމްޕޭން އެޖެންޓަކަށް ހަމަޖެއްސީ ޕްލޭނިން މިނިސްޓްރީގެ ކުރީގެ ނައިބު ފާތިމަތު ނިއުމާ އެވެ.
މިއަދު ހުށަހެޅި ތިން ފޯމަކީ, މިދިޔަ އަންގާރަ ދުވަހު ޕީޕީއެމްގެ ފަރާތުން ހުށަހެޅި ކެންޑިޑެސީ ފޯމު އީސީން ބަލައިނުގަތުމަށް ނިންމި ފަހުން އެ ކޮމިޝަނަށް ހުށަހެޅި ފުރަތަމަ ތިން ފޯމެވެ. ރިޔާސީ އިންތިހާބުގައި ވާދަކުރުމަށް އީސީން ހުޅުވާލާފައިވާ މުއްދަތު މާދަމާ މެންދުރު 2:00 އަށް ހަމަވާނެ އެވެ. އޭގެ ކުރިން ފޯމު ހުށަހެޅި ކެންޑިޑޭޓުންނަށް ޖަވާބު ދޭނެ ކަމަށް އީސީން ބުނެ އެވެ.
މިއަދު އީސީއަށް ތިން ކެންޑިޑެސީ ފޯމު ހުށަހެޅިއިރު, މާދަމާ ވެސް ބައެއް ކެންޑިޑޭޓުންގެ ފޯމު ހުށަހަޅަން ވަނީ ތާވަލުކޮށްފަ އެވެ. އޭގެ ތެރޭގައި ޖުމްހޫރީ ޕާޓީ އަދި ޕީއެންސީ ހިމެނެ އެވެ.
ކެންޑިޑެސީ ފޯމުތައް ބަލައިގަތުމަށްފަހު, ކެންޑިޑޭޓުންގެ ނަންތައް ތަރުތީބު ކުރުމަށް އީސީން ނިންމާފައި ވަނީ އަންނަ ބުދަ ދުވަހުގެ ހަވީރު 4:30ގަ އެވެ. މިހާރު ފޯމު ހުށަހަޅާފައިވާ ކެންޑިޑޭޓުންނަށް ނަން އަނބުރާ ގެންދިއުމުގެ ފުރުސަތު އޮތީ ނަން ތަރުތީބު ކުރުމުގެ ކުރިންނެވެ.
