މޫސުން ގޯސްވުމުގެ ސަބަބުން ރައީސުލްޖުމުހޫރިއްޔާ އިބްރާހީމް މުހައްމަދު ސޯލިހު ދ. އަތޮޅަށް މިއަދު ކުރައްވަން އޮތް ކެމްޕެއިން ދަތުރު ފަސްކޮށްފި އެވެ.
އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދު މި ނޫހަށް ވިދާޅުވީ މޫސުން ގޯސްވުމުގެ ސަބަބުން ދ. އަތޮޅަށް ކުރައްވާ ދަތުރު ފަސްކޮށްފައިވާ ކަމަށެވެ. ނަމަވެސް ގދ. އަދި ގއ. އަތޮޅަށް ކުރައްވާ ދަތުރުފުޅު ޝެޑިއުލާ އެއްގޮތަށް ކުރިއަށްދާނެކަން އިބްރާހީމް ވަހީދު ފާހަގަކުރެއްވި އެވެ.
ކުރިއަށް އޮތް ރިޔާސީ އިންތިހާބުގެ ކެމްޕެއިނުގައި ރައީސް އެންމެ ފަހުން ވަޑައިގަތީ ހއ. އަދި ހދ. އަތޮޅަށެވެ.
އޭގެ އިތުރުން މިއަދު ހެނދުނު 9:00 ގައި އެމަނިކުފާނުގެ ކެންޑިޑެސީ ފޯމު އީސީއަށް ހުށަހަޅަން ހަމަޖެހިފައިވާކަން "އަދަދު" އަށް ވަނީ ކަށަވަރުވެފަ އެވެ.
މޫސުމާބެހޭ ގައުމީ އިދާރާ، މޯލްޑިވްސް މީޓިއޮރޮލޮޖިކަލް ސާވިސްއިން ވަނީ ފ. އަތޮޅުން ފެށިގެން އައްޑޫ ސިޓީއާ ހަމައަށް ހުދު ސަމާލު ނެރެފަ އެވެ.
މޫސުން ލަފާކޮށް ނެރެފައިވާ ލިޔުމުގައި ބުނެފައިވަނީ ވިލާގަނޑުގައި ގަޑިއަކު 35 މޭލު ބާރުމިނަށް ވައިގަދަވުން އެކަށީގެންވާ ކަމަށެވެ. އަދި ބޯކޮށް ވާރޭވެހުމާއި ގުގުރުން އެކަށީގެންވާކަމަށް ވެސް މެޓް އޮފީހުން ބުނެ އެވެ.
ރާއްޖެއަށް މިހާރު ކުރަމުން އަންނަ ވިއްސާރައިގައި އިއްޔެގެ ވަގުތެއްގައި މާލޭގެ އިތުރުން ގިނަ ރަށްތަކަކަށް ވަނީ އުދައަރާފަ އެވެ.
