ކުރިއަށް އޮތް ރިޔާސީ އިންތިހާބުގައި ވާދަކުރައްވާ އެމްޑީޕީގެ ކެންޑިޑޭޓު، ރައީސް އިބްރާހިމް މުހައްމަދު ސޯލިހު އަދި އެމްއެންޕީގެ ކެންޑިޑޭޓު، ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމްގެ ކެންޑިޑެސީ ފޯމު މިއަދު އީސީއަށް ހުށަހެޅުމަށް ނިންމައިފި އެވެ.
"އަދަދު" އަށް ކަށަވަރުވެފައިވާ ގޮތުގައި ރައީސް ސޯލިހުގެ ފޯމު ހުށަހަޅާނީ މިއަދު ހެނދުނު 9:00 ގަ އެވެ. ނާޒިމްގެ ފޯމު ހުށަހެޅުމަށް ދީފައިވާ ވަގުތަކީ ހެނދުނު 10:00 އެވެ. މި ދެ ކެންޑިޑޭޓުންގެ ފޯމު ހުށަހެޅުން ވެސް ކުރިއަށްދާނީ ދަރުބާރުގޭގައި ހުންނަ އިންތިހާބީ މައި މަރުކަޒުގަ އެވެ.
ރައީސް ސޯލިހު އެމްޑީޕީގެ ރިޔާސީ ޓިކެޓު ކާމިޔާބު ކުރެއްވީ ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމަރީގައި އެ ޕާޓީގެ ކުރީގެ ރައީސް މުހައްމަދު ނަޝީދު ބަލިކުރައްވައިގެންނެވެ. ނަޝީދު ވަނީ އެއަށްފަހު އެމްޑީޕީ ދޫކުރައްވައި ދަ ޑިމޮކްރެޓްސް ޕާޓީ އުފައްދަވާފަ އެވެ.
ރައީސް ސޯލިހު މިއަދު ފޯމު ހުށަހަޅުއްވާއިރު އެމަނިކުފާނު އިއްޔެ ވަނީ މި އިންތިހާބުގައި އެމަނިކުފާނުގެ ރަނިން މޭޓަކަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ހަމަޖައްސަވާފަ އެވެ.
ނާޒިމް އެމްއެންޕީގެ ރިޔާސީ ޓިކެޓު ހޯއްދެވީ ޖެނުއަރީ މަހު ހުޅުވާލި އެ ޕާޓީގެ ރިޔާސީ ޕްރައިމަރީގައި އިތުރު ފަރާތަކުން ކުރިމަތި ނުލުމުން ވޯޓަކާ ނުލަ އެވެ. ނާޒިމް ވެސް އިއްޔެ ވަނީ އިންތިހާބަށް ރަނިން މޭޓަކަށް ޑރ. އަހުމަދު އަދީލް ނަސީރު ހަމަޖައްސަވާފަ އެވެ.
ރިޔާސީ އިންތިހާބުގައި ވާދަކުރުމަށް ކެންޑިޑެސީ ފޯމު ހުށަހެޅުމުގެ މުއްދަތު މާދަމާގެ މެންދުރުފަހު 2:00 އަށް ހަމަވާއިރު މިހާތަނަށް ފޯމު ހުށަހެޅީ ޕީޕީއެމްގެ ރިޔާސީ ކެންޑިޑޭޓު ކުރީގެ ރައީސް އަބްދުﷲ ޔާމީނެވެ. ނަމަވެސް އެމަނިކުފާނު މަނީލޯންޑަރިންގެ ކުށުގައި 11 އަހަރުގެ ޖަލު ހުކުމެއް ތަންފީޒުކުރަމުން ގެންދަވާތީ އީސީއިން ވަނީ ޔާމީނުގެ ކެންޑިޑެސީ ބަލައިނުގަންނަން ނިންމާފަ އެވެ. އެ މައްސަލަ ޔާމީނުގެ ފަރާތުން ސުޕްރީމް ކޯޓަށް ވައްދާފައިވާއިރު މައްސަލާގެ ހުކުމް އިއްވުން މިއަދު ހެނދުނު 10:00 ގައި އޮންނާނެ އެވެ.
ޔާމީނުގެ ކެންޑިޑެސީ ބަލައިނުގަތުމާއެކު ޕީޕީއެމުން ވަނީ އެ ޕާޓީއާއެކު ކޯލިޝަނުގައި އޮތް ޕީއެންސީއިން ރިޔާސީ ކެންޑިޑޭޓަކު 'ބެކް އަޕް' ގެ ގޮތުގައި ބެހެއްޓުމަށް ނިންމާފަ އެވެ. އެގޮތުން ޕީޕީއެމް ދޫކުރައްވައި މި މަހުގެ ހަތަރެއްގައި ޕީއެންސީއަށް ގުޅިވަޑައިގެންނެވި ޑރ. މުހައްމަދު މުއިއްޒަށް ވަނީ ޓިކެޓު ދީފަ އެވެ.
ނަމަވެސް، ހުކުރު ދުވަހު ޔާމީނުގެ ކެންޑިޑެސީ މައްސަލާގައި ބޭއްވި ޝަރީއަތުގައި ޔާމީނު އަދި ޕީޕީއެމުން ވަނީ ޔާމީނަށް ކުރިމަތި ނުލެވޭ ނަމަ އެ ޕާޓީއިން އެހެން ކެންޑިޑޭޓަކު ނެރުމަށް ފުރުސަތު ދިނުމަށް އެދިފަ އެވެ. އެއާއެކު ޕީޕީއެމްގެ ލީޑަޝިޕުންވެސް ވަނީ މުއިއްޒަކީ ޕްލޭން ސީ ކަމަށާއި ޔާމީނަށް އިންތިހާބުގައި ވާދަ ނުކުރެއްވާ ނަމަ ޕްލޭނަކީ އެ ޕާޓީން ކެންޑިޑޭޓަކު ނެރުން ކަމަށް ބުނެފަ އެވެ.
