އަންނަ ސެޕްޓެމްބަރު 9, ގައި އޮންނަ ރިޔާސީ އިންތިހާބުގައި ވާދަކުރައްވާނެކަން އިއުލާނު ކުރައްވާފައިވާ ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި ދަ ޑިމޮކްރެޓްސްގެ ތާއީދު ހޯދުމަށް މަޝްވަރާ ކުރަމުންދާކަން އެނގިއްޖެ އެވެ.
ޖޭޕީގެ ކެންޑިޑޭޓެއްގެ ގޮތުގައި ގާސިމް ހުންނެވިއިރު ޑިމޮކްރެޓްސްގެ ކެންޑިޑޭޓެއްގެ ގޮތުގައި ހުންނެވީ ހުޅުދޫ ދާއިރާގެ މެމްބަރު އިލްޔާސް ލަބީބެވެ. ދެ ޕާޓީގެ ކެމްޕޭން ހަރަކާތްތައް ވެސް ރާއްޖޭގެ އެކި ކަންކޮޅުތަކުގައި ކުރިއަށްދާއިރު މިހާތަނަށް ކެންޑިޑެސީ ފޯމު ވެސް އެއްވެސް ބޭފުޅަކު އީސީއަށް ހުށަހަޅާފައި ނުވެ އެވެ.
ކެންޑިޑެސީ ފޯމު ހުށަހެޅުމުގެ ސުންގަނޑި ހޯމަ ދުވަހަށް ހަމަވާއިރު، ގާސިމް ގެންދަވަނީ އިންތިހާބުގައި ޑިމޮކްރެޓުންނާ އެކު ނުކުމެވޭނެ ފޯމިއުލާއެއް ހޯދުމަށް މަޝްވަރާ ކުރަމުންކަން ވަނީ އެނގިފަ އެވެ.
މިފަދަ މަޝްވަރާ ބައްދަލުވުންތަކެއް މި ނިމޭ ހަފްތާގެ ތެރޭގައި ވެސް ކުރިއަށް ގެންގޮސްފައިވެ އެވެ. އެ ބައްދަލުވުންތަކުގައި ދެ ޕާޓީގެ ވެސް އެންމެ އިސް ފަޑީގައި ހިމެނޭ ބޭފުޅުން ދަނީ ބައިވެރިވަމުންނެވެ. އެކަމަކު, މި ބައްދަލުވުންތަކުގައި މިހާތަނަށް އެއްވެސް ކަމެއް ނިންމާފައި ނުވެ އެވެ.
ޕީޕީއެމްގެ އޮފިޝަލަކު ވިދާޅުވީ ސިޔާސީ ޕާޓީތަކުގެ ތާއިދު ގާސިމަށް ހޯއްދެވުމަށް މަސައްކަތް ކުރައްވާ ކަމަށާއި އެކި ފަރަތްތަކާއެކު ބައްދަލުވުންތައް ބާއްވަމުން ގެންދަވާ ކަމަށެވެ.
ޑިމޮކްރެޓްސްގެ އޮފިޝަލަކު ވިދާޅުވީ އެ ޕާޓީން ރިޔާސީ އިންތިހާބަށް ކެންޑިޑޭޓަކު ނެރުމަށް ހުރަސް އެޅިދާނެ އެއްވެސް މަޝްވަރާއެއް މިހާތަނަށް ޖުމްހޫރީ ޕާޓީއާއެކު ކުރެވިފައި ނެތް ކަމަށެވެ.
ރިޔާސީ އިންތިހާބުތަކުގައި ގާސިމްގެ ދައުރު
ގާސިމް ވަނީ 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރައްވައިފަ އެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. އަދި 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
ދެ އިންތިހާބުގައި ވެސް ދެ ވަަނަ ބުރަށް ދެވޭ ވަރަށް ގާސިމަށް ވޯޓު ނުލިބުނު ނަމަވެސް އެ ދެ ފަހަރު ވެސް އިންތިހާބު ކާމިޔާބުކުރީ ގާސިމްގެ ތާއީދު އޮތް ކެންޑިޑޭޓެވެ. އަދި ދެވަނަ ބުރުގައި، އެ ދެ އަހަރު ވެސް، ގާސިމް ތާއީދު ކުރެއްވީ ފުރަތަމަ ބުރުގައި ދެވަނައަށް އެންމެ ގިނަ ވޯޓު ލިބުނު ކެންޑިޑޭޓަށެވެ.
ރައީސް މުހައްމަދު ނަޝީދާއި ރައީސް އަބްދުﷲ ޔާމީން ވެސް ސަރުކާރު އެކުލަވާލީ ޖޭޕީއަށް ހިއްސާއެއްދޭ ގޮތަށެވެ.
އެންމެ ފަހުން ބޭއްވި 2018 ވަނަ އަހަރު ރިޔާސީ އިންތިހާބު އޮތް އިރު، ގާސިމް ހިމެނޭހެން އޭރުގެ އިދިކޮޅު ހުރިހާ ލީޑަރުން ތިބީ ޖަލު ހުކުމެއްގައި ނުވަތަ ހުކުމެއް ނެތި ބަންދުގަ އެވެ. އެހެންވެ ގާސިމްގެ ޖޭޕީގެ އިތުރަށް އެމްއާރުއެމާއި އަދާލަތު ޕާޓީން ތާއީދުކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށެވެ.
