ކުރިއަށް އޮތް ރިޔާސީ އިންތިހާބުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރަނިން މޭޓަކަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ހަމަޖައްސަައިފި އެވެ.
ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ރައީސް ސޯލިހުގެ ރަނިން މޭޓަކަށް އަސްލަމް ހަމަޖައްސައި އޭނާއަށް މޯލްޑިވިއަން ޑިމޮކްރެޓިކް ޕާޓީގެ ފަރާތުން މިހާރު އެކަން އަންގާފައިވާ ކަމަށް "އަދަދު" އަށް ވަނީ ކަށަވަރުވެފަ އެވެ.
އަސްލަމްގެ ކުށުގެ ރެކޯޑު ސާފު ކުރަން ޕާޓީގެ ފަރާތުން ކޯޓަށް ހުށަހަޅާފައިވާ ކަމަށް ވެސް އެނގިފައިވެ އެވެ. އަސްލަމް ނޫން އިތުރު މީހެއްގެ ކުށުގެ ރެކޯޑު ސާފު ކުރަން މިހާތަނަށް އެމްޑީޕީން ކޯޓަށް ހުށަހަޅާފައެއްނުވެ އެވެ.
ރައީސް ސޯލިހުގެ ރަނިން މޭޓަކަށް އަސްލަމް ހަމަޖެއްސިކަން އެމްޑީޕީން އަދި ރަސްމީކޮށް ނާންގަ އެވެ. އެމަނިކުފާނުގެ ރަނިން މޭޓަކަށް އަސްލަމް ހަމަޖެއްސިއިރު، ރިޔާސީ އިންތިހާބުގައި ވާދަ ކުރައްވާ ހުރިހާ ކެންޑިޑޭޓުން ވެސް ދަނީ ރަނިން މޭޓުން ހަމަޖެއްސުމުގެ މަސައްކަތް ކުރައްވަމުންނެވެ.
ރިޔާސީ އިންތިހާބުގައި ވާދަކުރަން ފޯމު ހުށަހަޅަންޖެހޭ ސުންގަޑި ހަމަވަނީ އަންނަ ހޯމަ ދުވަހުގެ 2:00 އަށެވެ.
އަސްލަމްއަކީ އެމްޑީޕީގެ ޕާލަމެންޓްރީ ގްރޫޕުގެ ރައީސެވެ. އަދި އޭނާއަކީ ރައްޔިތުންގެ މަޖިލީހުގެ މެޖޯރިޓީ ލީޑަރެވެ. މިއީ މަޖިލީހުގައި އަސްލަމް އިންނަވާތާ ހަތަރު ވަނަ ދައުރެވެ. އޭނާއަކީ ކުރިން ފެށިގެން ވެސް ރައީސް ސޯލިހާއެކު ވަރަށް ގާތުން މަސައްކަތް ކުރާ ބޭފުޅެއް ކަމަށްވެ އެވެ.
ރައީސް ސޯލިހުގެ ރަނިން މޭޓަކަށް އަސްލަމް ހަމަޖެއްސިއިރު އެމަނިކުފާނުގެ މިހާރުގެ ނައިބު ރައީސް ފައިސަލް ނަސީމް ވެސް ވަނީ އެ މަގާމަށް ޝައުގުވެރިކަން ފާޅު ކުރައްވައިފަ އެވެ. ރައީސްގެ ރަނިން މޭޓަކަށް ޖުމްހޫރީ ޕާޓީގެ މެމްބަރަކު ހަމަޖެއްސުމަށް ވެސް އެމްޑީޕީން ބޭނުންވި އެވެ. އެކަމަކު އެ ޕާޓީގެ ލީޑަރު ގާސިމް އިބްރާހިމް ވާދަ ކުރައްވަނީ ވަކިންނެވެ.
ރައީސް ސޯލިހާއި ގާސިމްގެ އިތުރުން ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަ ކުރައްވަނީ ދަ ޑިމޮކްރެޓްސްގެ އިލްޔާސް ލަބީބާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމެވެ. އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އިން ބުނަނީ އެ ޕާޓީގެ ކެންޑިޑޭޓަކީ މިވަގުތު 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީގެ ރައީސް އަބްދުﷲ ޔާމީން ކަމަށެވެ.
ޔާމީންގެ ކެންޑިޑެސީގެ މައްސަލަ މިހާރު ސުޕްރީމް ކޯޓުގައި ހިނގަމުންދާއިރު އެމަނިކުފާނަށް ވާދަ ނުކުރެވޭ ހާލަތެއްގައި ޕީޕީއެމްގެ އެހެން ކެންޑިޑޭޓަކު ނެރުމަށް އެ ޕާޓީން މަސައްކަތް ކުރާނެ ކަމަށް ވަނީ ބުނެފަ އެވެ. އޭގެ އިތުރުން، ޔާމީނަށް ވާދަ ނުކުރެވޭނެ ހާލަތެއްގައި އިންތިހާބުގައި ވާދަ ކުރުމަށް ޕީޕަލްސް ނެޝަނަލް ކޮންގްރެސްގެ ކެންޑިޑޭޓަކު ވެސް ވަނީ ނެރެފަ އެވެ. އެއީ މާލޭގެ މޭޔަރު ޑރ. މުހައްމަދު މުއިއްޒެވެ.
