ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ޕީޕީއެމް/ޕީއެންސީގެ ކޯލިޝަންގެ ކެންޑިޑޭޓު، ކުރީގެ ރައީސް އަބްދުﷲ ޔާމީނަށް ވާދަ ނުކުރެވިއްޖެ ނަމަ ޕީޕީއެމުން އެހެން ކެންޑިޑޭޓެއް ދައްކާނެ ކަމަށް، ޔާމީންގެ ދަރިކަލުން ޒެއިން އަބްދުﷲ ޔާމީން ވިދާޅުވެއްޖެ އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި އެގާރަ އަހަރުގެ ޖަލު ހުކުމެއް ތަންފީޒުކުރަމުން ގެންދަވާ ޔާމީނަށް ވާދަ ކުރެއްވުމުގެ ޝަރުތު ހަމަ ނުވާ ކަމަށް އިލެކްޝަންސް ކޮމިޝަނުން ނިންމި ނިންމުން ބާތިލުކުރަން ސުޕްރީމް ކޯޓަށް ހުށަހެޅުއްވި މައްސަލަ ފަށާފައި ވާއިރު، އިއްޔެ އަޑުއެހުންތައް ހަތް ގަޑިއިރަށް ކުރިއަށް ދިޔަ އެވެ.
މައްސަލައާ ގުޅޭ ގޮތުން ފަނޑިޔާރުން ސާފު ކުރައްވަންވަން ބޭނުންފުޅުވާ އިތުރު ކަމެއް ނެތް ނަމަ، ދެން އޮންނާނީ ހުކުމް ކުރުމެވެ.
އެ މައްސަލައިގައި ކާމިޔާބު ލިބޭނެ ކަމަށް އުއްމީދު ކުރައްވާ ކަމަށާއި ކާމިޔާބު ނުވެއްޖެ ނަމަ ޕީޕީއެމުން ވެސް، ޕީއެންސީން ވެސް އިންތިހާބުގެ ފުރަތަމަ ބުރުގައި ވާދަ ކުރައްވާނެ ކަމަށް ޒެއިން ވިދާޅުވި އެވެ.
"[ރައީސް ޔާމީނަށް ކުރިމަތި ނުލެވޭ ހާލަތުގައި] ޕީޕީއެމުން ވެސް ކެންޑިޑޭޓެއް ނުކުންނަވާނެ، ނުކުންނަވައިގެން [ޕީއެންސީގެ ކެންޑިޑޭޓާއި] ދެ ބޭފުޅުން ވެސް ފުރަތަމަ ބުރުގައި ވާދަ ކުރައްވާނެ،" ރޭ ސުޕްރީމް ކޯޓު ބޭރުގައި ހުންނަވައި ޒެއިން "އަދަދު" ނޫހަށް ވިދާޅުވި އެވެ.
އެ ހާލަތުގައި ތާއީދު ކުރައްވާނީ ކޮން ކެންޑިޑޭޓަކަށްތޯ ސުވާލު ކުރުމުން ޒެއިން ވިދާޅުވީ އެކަމާމެދު ވަކި އެއްޗެއް ދަންނަވަން ބޭނުންފުޅު ނުވާ ކަމަށެވެ.
އޭނާ އެހެން ވިދާޅުވިއިރު، ރައީސް ޔާމީނަށް އިންތިހާބުގައި ވާދަނުކުރެއްވޭނެ ހާލަތުގައި އިދިކޮޅު ކޯލިޝަނުގެ ފަރާތުން ރިޔާސީ އިންތިހާބުގައި ވާދަ ކުރާނެ ކެންޑިޑޭޓެއްގެ ގޮތުގައި ޕީއެންސީގެ ސެނެޓުން ވަނީ މާލެ ސިޓީގެ މޭޔަރު، ޑރ. މުއިއްޒު ކަނޑަ އަޅައިފަ އެވެ.
ސުޕްރީމް ކޯޓުން ބަލަމުންދާ ކުރީގެ ރައީސް އަބްދުﷲ ޔާމީންގެ ކެންޑިޑެސީގެ މައްސަލަ އެމަނިކުފާނާ ދެކޮޅަށް ނިމިއްޖެ ނަމަ ޕީޕީއެމްއިން އެހެން ކެންޑިޑޭޓަކު ނެރޭނެ ކަމަށާއި ޕީއެންސީގެ ކެންޑިޑޭޓަކީ ޕްލޭން ސީ ކަމަށް ޕީޕީއެމްގެ ނައިބު ރައީސް ނައިފަރު ދާއިރާގެ މެމްބަރު އަހުމަދު ޝިޔާމް ވެސް ރޭ ވަނީ ވިދާޅުވެފަ އެވެ.
ސުޕްރީމް ކޯޓުގައި މިހާރު ކުރިއަށްދާ މައްސަލައިގައި ވެސް، އިންތިހާބުގައި ޔާމީނަށް ވާދަ ނުކުރެއްވޭ ހާލަތުގައި ޕީޕީއެމުން އެހެން ކެންޑިޑޭޓެއް ނެރުމަށް ވަގުތު ދިނުމަށް އެދިފައިވެ އެވެ.
އިލެކްޝަންސް ކޮމިޝަނުން ކަނޑައަޅާފައިވާ ގޮތުން އިންތިހާބުގައި ވާދަކުރާ ފަރާތްތަކުން ކެންޑިޑެސީ ފޯމް ހުށަހެޅުމުގެ ފަހު ދުވަހަކީ އޯގަސްޓް 7 ވާ ހޯމަ އެވެ.
