ކުރީގެ ރައީސް އަބްދުﷲ ޔާމީންގެ ފަރާތުން ސުޕްރީމް ކޯޓަށް ހުށަހަޅާފައިވާ ކެންޑިޑޭސީގެ މައްސަލައިގައި އެމަނިކުފާނާ ދެކޮޅަށް ނިމިއްޖެ ނަމަ ޕީޕީއެމްއަށް އިތުރު ކެންޑިޑޭޓެއް ހުށަހަޅަން ފުރުސަތު ދިނުމަށް ވެސް އެމަނިކުފާނުގެ ފަރާތުން އެދިއްޖެ އެވެ.
އެމްއެމްޕީއާރްސީ މެދުވެރިކޮށް ވ. އާރަށު ދޫކުރުމުގެ ތެރެއިން ރިޝްވަތު ނަންގަވައި ފައިސާ ލޯންޑާ ކުރެއްވިކަން ސާބިތުވެ ޔާމީނަށް އިއްވާފައިވާ 11 އަހަރުގެ ޖަލު ހުކުމާ ހެދި ރިޔާސީ ކެންޑިޑޭޓަކަށް ވުމުގެ ޝަރުތު އެމަނިކުފާނުގެ ހަމަނުވާ ކަމަށް އިލެކްޝަންސް ކޮމިޝަނުން ނިންމާފައިވާއިރު، ޔާމީންގެ ފަރާތުން ސުޕްރީމް ކޯޓަށް މައްސަލަ ހުށަހެޅީ އެއީ ނިހާއީ ހުކުމެއް ނޫން ކަމުން، އެމަނިކުފާނުގެ ޝަރުތު ހަމަވާ ކަމަށް ކަނޑައަޅައިދިނުމަށް އެދި އެވެ.
އެ މައްސަލައިގެ ޝަރީއަތް މިއަދު ހަވީރު 4:00 ޖަހަނިކޮށް ފަށައިގެން ކުރިއަށްދާއިރު، ޔާމީންގެ ފަރާތުން އެ މައްސަލައިގައި އެދޭ ގޮތްތައް ބަޔާން ކުރަމުން ޔާމީންގެ ވަކީލު ހަމްޒާ ލަތީފު ވިދާޅުވީ، އެމަނިކުފާނަށް ކުރިމަތިނުލެވޭ ނަމަ ޕީޕިއެމްއަށް އިތުރު ކެންޑިޑޭޓެއް ހުށަހެޅުމުގެ ފުރުސަތެއް ދިނުމަށް ވެސް މައްސަލައިގެ ތެރެއިން އެދިފައިވާނެ ކަމަށެވެ.
"އަބްދުﷲ ޔާމީނަށް އެ ބޭފުޅާގެ ކެންޑިޑެސީ ހުށަނޭޅޭ ހާލަތެއްގައި ނަމަ ޕީޕީއެމްއަށް އިތުރު ހުށަހެޅުމެއް ހުށަހެޅުމުގެ ފުރުސަތު ދެއްވުމަށް އަދި އަބްދުﷲ ޔާމީނަށް ވެސް މި ކޯޓުން ނިންމާ ގޮތަކުން ކެންޑިޑެސީ ހުށަހެޅުމަށް އިތުރު ހުށަހެޅުމެއް ހުށަހަޅަން ޖެހޭ ހާލަތުގައި އެ ހުށަހެޅުން ހުށަހެޅަން ފުރުސަތު ފަހިކޮށްދިނުން،" ހަމްޒާ ވިދާޅުވި އެވެ.
ހަމްޒާ އިތުރަށް ވިދާޅުވީ، ފުރަތަމަ ކަމަކަށް އެދިފައި ވާނީ އީސީގެ ނިންމުމީ ބާތިލު ނިންމުމެއް ކަނޑައަޅައިދޭން ކަމަށެވެ. އަދި ޔާމީނަކީ ރިޔާސީ އިންތިހާބުގައި ވާދަ ކުރުމުގެ ޝަރުތު ހަމަވާ މީހެއް ކަމަށް ކަނޑައަޅައިދިނުމަށާއި، އިންތިހާބުގައި ބައިވެރިވުމަށް ކުރަން ޖެހޭ އިންތިޒާމުތައް ހަމަޖައްސަން އީސީގެ މައްޗަށް އަންގައިދިނުމަށް ކަމަށެވެ.
ޔާމީންގެ ފަރާތުން ދެކޭ ގޮތުގައި އާރަށު މައްސަލައިގައި ނިހާއީ ހުކުމެއް ނެތުމުން އެމަނިކުފާނަށް އިންތިހާބުގައި ވާދަ ކުރެވޭނެ އެވެ. ނިހާއީ ހުކުމެއް ކަމަށް ބަލާނީ މައްސަލައެއް ދަށު ކޯޓުން މައްސަލައެއް ނިންމުން ޝަރީއަތުގެ ހުރިހާ މަރުހަލާއަކުން އެ މައްސަލައެއް ބަލައި ނިމުނުންނެވެ. ޝަރީއަތުގެ އެންމެ މަތީ މަރުހަލާ، ސުޕްރީމް ކޯޓުން މައްސަލަ ބަލައި ނުނިމުނަސް، ދަށު ކޯޓުގެ ހުކުމް މުއްދަތުގެ ތެރޭގައި އިސްތިއުނާފު ނުކުރެއްޖެ ނަމަ އެއީ ނިހާއީ ހުކުމެއް ކަމަށް ބަލާނެ އެވެ.
އަންނަ ސެޕްޓޭމްބަރު ނުވަ ވަނަ ދުވަހު ބާއްވަން ހަމަޖެހިފައިވާ ރިޔާސީ އިންތިހާބަށް ކުރިމަތިލާން ހުޅުވާލި މުއްދަތު އަންނަ ހޯމަ ދުވަހަށް ހަމަވާއިރު ބާކީ އޮތީ ތިން ދުވަހެވެ.
ޔާމީނަށް ވާދަ ނުކުރެވޭ ހާލަތެއްގައި ޕީޕީއެމްއަށް އިތުރު ކެންޑިޑޭޓަކު ހުށަހެޅުމުގެ ފުރުސަތަށް ޔާމީންގެ ފަރާތުން އެދިފައިވާއިރު، ޔާމީނަށް ވާދަ ނުކުރެވޭ ހާލަތެއްގައި ބެކްއަޕް ކެންޑިޑޭޓަކަށް ޕީއެންސީގެ ފަރާތުން މާލޭގެ މޭޔަރު ޑރ. މުހައްމަދު މުއިއްޒު ނެރުމަށް އެ ޕާޓީގެ ސެނެޓުން އިއްޔެ ވަނީ ފާސްކޮށްފަ އެވެ.
ސެނެޓު މެމްބަރުންގެ މެދުގައި ނެގި އެ ވޯޓު މުއިއްޒު ކާމިޔާބު ކުރެއްވީ، މަޑުއްވަރީ ދާއިރާގެ މެމްބަރު އަދި ޕީއެންސީގެ ނައިބު ރައީސް އާދަމް ޝަރީފު އުމަރުއާ ވާދަކޮށެވެ. މުއިއްޒަށް 25 ވޯޓު ލިބިވަޑައިގެންނެވި އިރު އާދަމް ޝަރީފަށް ލިބިވަޑައިގަތީ 23 ވޯޓެވެ.
