ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީންގެ ކެންޑިޑެސީ އިލެކްޝަންސް ކޮމިޝަން (އީސީ) އިން ބަލައިނުގަތް މައްސަލައިގެ ޝަރީއަތް މިވަގުތު ސުޕްރީމް ކޯޓުގައި ކުރިއަށްދާއިރު އެމަނިކުފާނުގެ ސަޕޯޓަރުން އެ ކޯޓު ބޭރުގައި މުޒާހަރާ ކުރަމުން އެބަދެ އެވެ.
ޔާމީނުގެ ވެރިކަމުގައި ހިންގި އެމްއެމްޕީއާރުސީގެ ބޮޑު ހިޔާނާތުގެ މައްސަލާގައި ވ. އާރަށް ކުއްޔަށް ދޫކުރުމުގެ ތެރެއިން 1.1 މިލިއަން ޑޮލަރު ރިޝްވަތުގެ ގޮތުގައި ނަގައި އެ ފައިސާ ލޯންޑަކުރި ކަމަށް ސާބިތުވެ އެމަނިކުފާނު މިދިޔަ ޑިސެމްބަރު 25 ގައި ޖަލަށް ލުމަށްފަހު އިދިކޮޅުން ދަނީ ސިލްސިލާކޮށް މުޒާހަރާކުރަމުންނެވެ. ނަމަވެސް މިއަދުގެ މުޒާހަރާގައި އާންމު އަދަދުތަކަށްވުރެ މީހުން ގިނަ އެވެ.
ކޯޓު ސަރަހައްދުގައި ތިބި ޔާމީނުގެ ސަޕޯޓަރުން ގޮވަމުން ދަނީ ވަގުތުން ވަގުތައް އެމަނިކުފާނު ދޫކޮށްލުމަށެވެ. މިއީ ޔާމީނު ޖަލުގައި އޮންނެވި 222 ދުވަހު ވެސް އެ ފަރާތްތަކުން ފާޅުކުރަމުންދިޔަ ޝުއޫރެވެ.
"ރައީސް ޔާމީނު ދޫކޮށްލާ، ރައީސް ޔާމީނު ދޫކޮށްލާ، މި [ރައީސް ސޯލިހު] ނޫން ގޮތެއް ދިވެހިން ބޭނުންވޭ" ދެން ޔާމީނުގެ ސަޕޯޓަރުން ގޮވަމުންދިޔައީ އާންމު އަހުލާގީ މިންގަޑަށްވުރެ ދަށް ބަސްތަކެކެވެ. ނަމަވެސް, މައިގަނޑު ގޮތެއްގައި ރައީސް އިބްރާހިމް މުހައްމަދު ސޯލިހަކީ ވަގެއް ކަމަށް ގޮވުމާއި ޔާމީނު ދޫކޮށްލުމަށް އެކި އިބާރާތްތައް ބޭނުންކުރަމުންދިޔަ އެވެ.
ފުލުހުން މިހާރު ވަނީ ޔާމީނުގެ ސަޕޯޓަރުން ކޯޓުގެ ކުރިމަތިން ދުރަށް ޖައްސާ އެސްޓީއޯ ޕީޕަލް ޗޮއިސްއާ ހިސާބަށް އެ ސަރަހައްދު ބަންދުކޮށްފަ އެވެ.
ޔާމީނުގެ ޝަރީއަށް މިހާރު ކުރިއަށްދާއިރު މިއަދުގެ ޝަރީއަތުގައި ދެ ބްރޭކެއް ނެގުމަށް ފަނޑިޔާރު ވަނީ ނިންމާފަ އެވެ. އެގޮތުން ފުރަތަމަ ބްރޭކް 6:00 އިން 6:45 އަށް އަދި ދެވަނަ ބްރޭކް 7:30 އިން 8:00 އަށް ނަންގަވާނެ ކަމަށް އެ ކޯޓުގެ ފަނޑިޔާރުން ވިދާޅުވި އެވެ.
ޔާމީންގެ ފަރާތުން ސުޕްރީމް ކޯޓަށް މައްސަލަ ހުށަހެޅީ އެމަނިކުފާނަށް އިންތިހާބުގައި ވާދަ ކުރަން ޝަރުތު ހަމަވާ ކަމަށް ކަނޑައަޅައިދިނުމަށް އެދި އެވެ. ޔާމީންގެ ފަރާތުން ދެކޭ ގޮތުގައި އާރަށު މައްސަލައިގައި ނިހާއީ ހުކުމެއް ނެތުމުން އެމަނިކުފާނަށް އިންތިހާބުގައި ވާދަ ކުރެވޭނެ އެވެ.
ނިހާއީ ހުކުމެއް ކަމަށް ބަލާނީ މައްސަލައެއް ދަށު ކޯޓުން ނިންމުމުން މަތީ މަރުހަލާގެ ދެ ކޯޓުން އެކަމާ މެދު ގޮތެއް ނިންމައި ހުކުމް ކުރުމުންނެވެ. އެންމެ މަތީ މަރުހަލާ ސުޕްރީމް ކޯޓުން މައްސަލަ ބަލައި ނުނިމުނަސް، އިސްތިއުނާފުގެ މުއްދަތުގެ ތެރޭގައި އިސްތިއުނާފު ނުކޮށްފި ނަމަ އެ ހުކުމެއް ނިހާއީ ހުކުމަކަށް ވާނެ އެވެ.
ޔާމީނަށް އިއްވާފައިވާ ޖަލު ހުކުމުގެ އިސްތިއުނާފު ހައި ކޯޓުގައި އޮތީ މަޑުޖެހިފަ އެވެ. އިސްތިއުނާފު އަވަސް ކުރަން ކަނޑައަޅައިދިނުމަށް އެދި ސުޕްރީމް ކޯޓަށް ދެ ފަހަރު ދުސްތޫރީ މައްސަލައެއް ހުށަހެޅި ނަމަވެސް އެ މައްސަލަތައް ކޯޓަށް ބަލައިނުގަތެވެ.
ރިޔާސީ އިންތިހާބަށް ކުރިމަތިލާން ހުޅުވާލި މުއްދަތު އަންނަ ހޯމަ ދުވަހަށް ހަމަވާއިރު ބާކީ އޮތީ ތިން ދުވަހެވެ. އެހެންކަމުން ޔާމީނަށް ކެންޑިޑެސީ ކަށަވަރު ނުވެއްޖެ ހާލަތެއްގައި ޕީއެންސީން ކެންޑިޑޭޓަކު ނެރޭ ގޮތަށް އެ ޕާޓީގެ ސެނެޓުން ވަނީ އިއްޔެ ފާސްކޮށްފަ އެވެ. އަދި އެ ކެންޑިޑޭޓަކީ ޕީޕީއެމުން ވަކިވެ އިއްޔެ އެ ޕާޓީއާ ގުޅިވަޑައިގެންނެވި، މާލޭގެ މޭޔަރު ޑރ. މުހައްމަދު މުއިއްޒު ކަމަށް ވެސް ކަނޑައެޅި އެވެ.
