ކުރީގެ ރައީސް އަބްދުﷲ ޔާމީންގެ ކެންޑިޑެސީގެ މައްސަލަ ސުޕްރީމް ކޯޓުގައި ތާވަލު ކުރި ވަގުތު ކަރަންޓު ކެނޑުނީ ކަރަންޓު ދޫކުރާ ސްޓޭޝަކަށް ދިމާވި މައްސަލައެއްގައި ކަމަށާއި ނަމަވެސް މިހާރު އެ ކަމަށް ވަގުތީ ހައްލެއް ހޯދިއްޖެ ކަމަށް ސްޓެލްކޯއިން ބުނެފި އެވެ.
މިއަދު މެންދުރުފަހު 2:30 އަށް ތާވަލުކޮށްގެން ސުޕްރީމް ކޯޓުން އަޑުއެހުން ބާއްވަން ތައްޔާރުވަމުން ދަނިކޮށް ސުޕްރީމް ކޯޓު ސަރަހައްދުން ކަރަންޓު ކެނޑުން ޝަރީއަތް ގަޑިއަށް ނުފެށި ވަނީ ލަސްވެފަ އެވެ. ޝަރީއަތް ފަށަން މިހާރު ހަމަޖެހިފައި ވަނީ 3:45 ގަ އެވެ.
ސްޓެލްކޯގެ މީޑިއާ އޮފިޝަލަކު ވިދާޅުވި ގޮތުގައި ސުޕްރީމް ކޯޓު ސަރަހައްދުން ކަރަންޓު ކެނޑުނީ އޯވަލޯޑުވެ، ސަބްސްޓޭޝަނެއްގެ ސްވިޗް ގިއަރުގައި މައްސަލަ ޖެހިގެން ކަމަށެވެ.
އެހެން ނަމަވެސް، މިހާރު އެ މައްސަލަ ހައްލުކުރަން އެހެން "އޯލްޓަނޭޓިވް" ލައިނަކުން އެ ސަރަހައްދަށް ކަރަންޓު ގުޅާފައިވާ ކަމަށް އޭނާ ވިދާޅުވި އެވެ. އަލުން ކަރަންޓު ގުޅި ފަހުން ވެސް ކަރަންޓު ކެނޑުނު ކަމަށާއި އެކަމަކު މިހާރު މައްސަލައަށް ވަގުތީ ހައްލެއް ގެނެވިފައިވާ ކަމަށް އޮފިޝަލު ވިދާޅުވި އެވެ.
ކެންޑިޑެސީގެ މައްސަލައިގެ އަޑުއެހުމަށް ކުރީގެ ރައީސް ޔާމީން ސުޕްރީމް ކޯޓަށް ވައްދަނީ -- އަދަދު ފޮޓޯ
ސުޕްރީމް ކޯޓުން ކަރަންޓު ކެނޑުމުން އެތަނަށް ވަޑައިގެން ތިއްބެވި ރައީސް ޔާމީންގެ ވަކީލުންނާއި އިލެކްޝަންސް ކޮމިޝަނުގެ ވަކީލުން ވެސް ތިބީ ސުޕްރީމް ކޯޓު ބޭރުގަ އެވެ.
ސުޕްރީމް ކޯޓުގައި މިއަދު ކުރިއަށްދާ ޔާމީންގެ ކެންޑިޑެސީގެ މައްސަލައަކީ ޔާމީންގެ މައްޗަށް ކޮށްފައިވާ 11 އަހަރުގެ ޖަލު ހުކުމާ ގުޅިގެން އެމަނިކުފާނުގެ ރިޔާސީ ކެންޑިޑެސީ އިލެކްޝަންސް ކޮމިޝަނުން ބަލައިނުގަތުމުން ހުށަހެޅި މައްސަލައެކެވެ. ޔާމީންގެ ފަރާތުން ދެކޭ ގޮތުގައި ޖަލު ހުކުމާ މެދު ނިހާއީ ހުކުމެއް ނެތުމުން އިންތިހާބުގައި ވާދަކުރެއްވޭނެ ކަމަށެވެ.
ޔާމީން ޖަލަށް ލުމަށް ކްރިމިނަލް ކޯޓުން ހުކުމް ކުރީ އެމަނިކުފާނުގެ ވެރިކަމުގައި ހިންގި އެމްއެމްޕީއާރުސީގެ ބޮޑު ހިޔާނާތުގެ މައްސަލާގައި ވ. އާރަށް ކުއްޔަށް ދޫކުރުމުގެ ތެރެއިން 1.1 މިލިއަން ޑޮލަރު ރިޝްވަތުގެ ގޮތުގައި ނަގައި އެ ފައިސާ ލޯންޑަކުރި ކަމަށް ސާބިތުވުމުންނެވެ.
އެ މައްސަލައިގެ އިސްތިއުނާފު އަޑުއެހުންތައް ހައި ކޯޓުގައި ކުރިއަށްދަނިކޮށް ފަނޑިޔާރުން ޗުއްޓީއަށް ވަޑައިގަތުމުން މައްސަލަ އޮތީ މަޑުޖެހިފަ އެވެ.
