ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީންގެ ކެންޑިޑެސީ އިލެކްޝަންސް ކޮމިޝަން (އީސީ) އިން ބަލައިނުގަތް މައްސަލައިގެ ޝަރީއަތް ފަށަން އޮތް ވަގުތު ޖެހުނު އިރު ސުޕްރީމް ކޯޓުން ކަރަންޓް ކެނޑިއެއްޖެ އެވެ.
ސުޕްރީމް ކޯޓު ކައިރީ މި ވަގުތު ތިބި "އަދަދު" ނޫހުގެ ނޫސްވެރިން ވަނީ މި ކަން ޔަގީންކޮށްދީފަ އެވެ. ސްޓެލްކޯގެ އޮފިޝަލަކު ވެސް ވަނީ އެ ތަނުގައި މި ވަގުތު ކަރަންޓު ނެތް ކަން ޔަގީން ކޮށްދެއްވައިފަ އެވެ.
"ކަރަންޓު ދިނުމުގެ މަސައްކަތް ކުރަމުން އެބަ ދަން،" ސްޓެލްކޯގެ އޮފިޝަލް ވިދާޅުވި އެވެ.
ސުޕްރީމް ކޯޓުގައި ކަރަންޓު ނެތުމުން ރައީސް ޔާމީންގެ ގާނޫނީ ވަކީލުންނާއި، އޭޖީ އޮފީހުގެ ވަކީލުން ވެސް ވަނީ ކޯޓު އިމާރާތުން ބޭރަށް ނުކުމެވަޑައިގެންފަ އެވެ.
ރިޔާސީ ކެންޑިޑެސީތަކާ ގުޅޭ ގޮތުން އީސީގެ ނިންމުން ހިތްހަމަނުޖެހޭނަމަ ހުށަހަޅަން އޮންނަ، ރާއްޖޭގެ އެންމެ މަތީ މަރުހަލާގެ ކޯޓުގައި ޔާމީންގެ ކެންޑިޑެސީގެ ޝަރީއަތް ފަށަން ތާވަލުކުރީ މިއަދު މެންދުރުފަހު 2:30 ގަ އެވެ.
ޔާމީން ޖަލަށް ލުމަށް ކްރިމިނަލް ކޯޓުން ހުކުމް ކުރީ އެމަނިކުފާނުގެ ވެރިކަމުގައި ހިންގި އެމްއެމްޕީއާރުސީގެ ބޮޑު ހިޔާނާތުގެ މައްސަލާގައި ވ. އާރަށް ކުއްޔަށް ދޫކުރުމުގެ ތެރެއިން 1.1 މިލިއަން ޑޮލަރު ރިޝްވަތުގެ ގޮތުގައި ނަގައި އެ ފައިސާ ލޯންޑަކުރި ކަމަށް ސާބިތުވުމުންނެވެ.
ޔާމީނަށް އިއްވާފައިވާ ޖަލު ހުކުމުގެ އިސްތިއުނާފު ހައި ކޯޓުގައި އޮތީ މަޑުޖެހިފަ އެވެ. އިސްތިއުނާފު އަވަސް ކުރަން ކަނޑައަޅައިދިނުމަށް އެދި ސުޕްރީމް ކޯޓަށް ދެ ފަހަރު ދުސްތޫރީ މައްސަލައެއް ހުށަހެޅި ނަމަވެސް އެ މައްސަލަތައް ކޯޓަށް ބަލައިނުގަތެވެ.
އެންމެ ފަހުން ރަނިން މޭޓުގެ ގޮތުގައި ޔާމީންގެ ފުރަތަމަ ނައިބު އަދި މިހާރު އެމަނިކުފާނުގެ އިސް ވަކީލެއްގެ ގޮތުގައި ހުންނެވި ޑރ. މުހައްމަދު ޖަމީލު އަހުމަދު ކަނޑައެޅުއްވުމަށް ފަހު ޔާމީނާއި ޖަމީލުގެ ނަން ކެންޑިޑެސީ ފޯމް އިލެކްޝަންސް ކޮމިޝަނަށް ހުށަހެޅި ނަމަވެސް، ކެންޑިޑެސީ ބަލައި ނުގަތެވެ.
ރިޔާސީ އިންތިހާބަށް ކުރިމަތިލާން ހުޅުވާލި މުއްދަތު އަންނަ ހޯމަ ދުވަހަށް ހަމަވާއިރު ބާކީ އޮތީ ތިން ދުވަހެވެ. އެހެންކަމުން ޔާމީނަށް ކެންޑިޑެސީ ކަށަވަރު ނުވެއްޖެ ހާލަތެއްގައި ޕީއެންސީން ކެންޑިޑޭޓަކު ނެރޭ ގޮތަށް އެ ޕާޓީގެ ސެނެޓުން ވަނީ އިއްޔެ ފާސްކޮށްފަ އެވެ. އަދި އެ ކެންޑިޑޭޓަކީ ޕީޕީއެމުން ވަކިވެ އިއްޔެ އެ ޕާޓީއާ ގުޅިވަޑައިގެންނެވި، މާލޭގެ މޭޔަރު ޑރ. މުހައްމަދު މުއިއްޒު ކަމަށް ވެސް ކަނޑައެޅި އެވެ
