ރައްޔިތުންގެ މަޖިލީހުގެ ކުރީގެ ނައިބު ރައީސް އަހްމަދު ނާޒިމް އާއި ރައީސުލްޖުމްހޫރިއްޔާގެ ސްޕެޝަލް އެޑްވައިޒަރެއްގެ މަގާމުގައި ކުރިން ހުންނެވި މުހައްމަދު ޝިހާބު ޖުމްހޫރީ ޕާޓީއަށް ސޮއިކޮށްފި އެވެ.
މިއަދު މެންދުރު މި ދެ ބޭފުޅުން ޖޭޕީއަށް ސޮއިކުރެއްވީ އެ ޕާޓީގެ ލީޑަރު ގާސިމް އިބްރާހިމްގެ އަރިހުގަ އެވެ. އެ ދެ ބޭފުޅުން އެ ޕާޓީއަށް ސޮއިކުރެއްވުމުން ގާސިމް ވަނީ ވަރަށް ބޮޑަށް އެ ބޭފުޅުންނަށް ތައުރީފް ކުރައްވައި ވާހަކަ ދައްކަވާފަ އެވެ.
"އަޅުގަނޑުގެ މައިގަނޑު މަސައްކަތަކަށް ވާނީ ރިޔާސީ އިންތިހާބުގައި ޖޭޕީގެ ކެންޑިޑޭޓަށް ރާއްޖޭގެ ރައީސަކަށް ވުމުގެ ފުރުސަތު ހޯދައިދިނުމަށް ކުރެވެން ހުރި ހުރިހާ މަސައްކަތެއް ކުރުން. އަޅުގަނޑުގެ ތަޖުރިބާގެ އަލީގައި ވަރަށް އިހުލާސްތެރިކަމާ އެކު, އޮމާން ކަމާ އެކު އިންތިހާބު ކާމިޔާބު ކޮށްދޭން ހުރިހާ ކަމެއް ކުރާނެ ކަމުގެ ފުރިހަމަ ޔަގީންކަން އަރުވަން," ޝިހާބު ވިދާޅުވި އެވެ.
މީގެކުރިން ވެސް ޖޭޕީގައި ޝިހާބު ކުޑަ ދުވަސްކޮޅަކު މަސައްކަތް ކުރެއްވި އެވެ. އެހެން ނަމަވެސް, ފަހުން މަސައްކަތް ކުރެއްވީ އެމްޑީޕީގެ އިސް ބޭފުޅެއްގެ ގޮތުގަ އެވެ.
ނާޒިމްއަކީ ރައްޔިތުންގެ މަޖިލީހުގެ ދިއްގަރު ދާއިރާގެ ގޮނޑި ވެސް ފުރުއްވި ބޭފުޅެކެވެ. އަދި, ކުރީގެ ރައީސް އަބްދުالله ޔާމީންގެ ވަރަށް އަރިސް ބޭފުޅެއްގެ ގޮތުގައި ވެސް މަސައްކަތް ކުރެއްވި އެވެ. އެހެން ނަމަވެސް, ފަހުން ޔާމީނާ މައްސަލަ ޖެހި ޖަލުގައި ވެސް ނާޒިމް ދުވަސްތަކެއް ހޭދަކުރެއްވި އެވެ. ޖަލު ހުކުމް މިންޖުވުމަށް ފަހު އޭނާ ސިޔާސީ މަސައްކަތްތަކުން ފެނިފައި ނުވެ އެވެ.
"ގައުމު މިއޮތީ ހަތަރު އަނގޮޅިއަކަށް އައިސްފައި. ގައުމު ރަނގަޅު މަގަކަށް ގެންދަން އަދި އެއްފަހަރު މަސައްކަތް ކުރަން ޖެހޭ. އިގްތިސާދީ ގޮތުން ވަރަށް ނާޒުކު ހިސާބަކަށް މިއޮތީ ގޮސްފައި. ގައުމުގެ މިސްރާބު ބަދަލުކުރުމުގެ ބާރު ޖޭޕީގައި އެބައޮތް," މި ނޫސްވެރިންގެ ބައްދަލުވުމުގައި ނާޒިމް ވިދާޅުވި އެވެ.
ސެޕްޓެމްބަރު 9, ގައި އޮންނަ އިންތިހާބުގައި ވާދަކުރަން ޖޭޕީން ގާސިމްއާ ޓިކެޓު ހަވާލުކޮށްފައިވާއިރު އެ ޕާޓީން އަންނަނީ މެމްބާޝިޕް އިތުރުކުރުމުގެ މަސައްކަތް ކުރަމުންނެވެ. އެގޮތުން, ކުރީ ސަރުކާރުތަކުގައި އިސް މަގާމުތައް ފުރުއްވާފައިވާ ބައެއް ބޭފުޅުން ވަނީ އެ ޕާޓީއާ ގުޅިވަޑައިގެންފަ އެވެ.
އެންމެފަހުން "އަދަދު" ނޫހުން މައުލޫމާތު ސާފުކުރިއިރު ވެސް ގާސިމްގެ ކުށުގެ ރެކޯޑު ސާފު ކުރުމަށް ހުށަހަޅާފައި ނުވެ އެވެ. އިންތިހާބުގައި ވާދަކުރުމުގެ މުއްދަތު ހަތަރު ދުވަހުގެ ތެރޭގައި ހަމަވާއިރު މިހާތަނަށް އިންތިހާބީ އޭޖެންޓެއް ވެސް އޭނާ ކަނޑައަޅާފައި ނުވެ އެވެ. އިންތިހާބީ ތައްޔާރީތަކުގައި އެ ޕާޓީ އުޅެނީ އެހެން ޕާޓީތަކަށް ވުރެ ފަހަތުގަ އެވެ.
ރިޔާސީ ޓިކެޓާއި ހަވާލުވި ފަހުން ގާސިމް ކެމްޕޭން ކުރިއަށްގެންދަވަނީ އޮންލައިންކޮށެވެ. ކެމްޕޭން ރެލީތަކުގައި އޭނާ ފެނިފައި ނުވެ އެވެ. އޭގެ ބަދަލުގައި ދެއްވަނީ ވީޑިއޯ މެސެޖެކެވެ. އެކަމާ ގުޅިގެން ބައެއް މީހުންގެ ފާޑުކިޔުން ވެސް ގާސިމަށް އަމާޒުވި އެވެ.
ގާސިމް ވަނީ 2008 އަދި 2013 ގައި އިންތިހާބުގައި ވާދަކުރައްވާފަ އެވެ. އެ ދެ ފަހަރު ވެސް ފުރަތަމަ ބުރުން ނާކާމިޔާބުވެވަޑައިގެން ގާސިމް ގުޅިވަޑައިގަތީ ވެރިކަމަށް އައި ކޯލިޝަންތަކާ އެކު އެވެ. އެކަމަކު, ހިޔާލު ތަފާތުވުންތައް ގިނަވެ އެ ދެ ފަހަރު ވެސް ކޯލިޝަނުން ޖޭޕީ ވަކިވީ އެވެ.
"
