މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރިޔާސީ ކެންޑިޑޭޓު މުހައްމަދު ނާޒިމްގެ ރަނިން މޭޓު އިއުލާނު ކުރާ ޖަލްސާ މިރޭ ބާއްވާނެ ކަމަށް އެ ޕާާޓީން ބުނެފި އެވެ.
އެމްއެންޕީން މިއަދު ބުނި ގޮތުގައި، އެ ޕާޓީގެ ރަނިންމޭޓު އިއުލާނު ކުރާ ޖަލްސާ އޮންނާނީ އަންނަ ހޮނިހިރު ދުވަހުގެ ރޭ 8:30 ގައި ބިލަބޮން އިންޓަނޭޝަނަލް ސްކޫލުގެ ހޯލްގައި ބާއްވާ ޖަލްސާއެއްގައި ކަމަށެވެ.
އަމިއްލަފުޅަށް އުފެއްދެވި އެމްއެންޕީގެ ރިޔާސީ ޓިކެޓު ނާޒިމް ހޯއްދެވީ ނިމިދިޔަ ޖެނުއަރީ 14، ގައި ބޭއްވި އެ ޕާޓީގެ ރިޔާސީ ޕްރައިމަރީގައި އިތުރު ބޭފުޅަކު ވާދަނުކުރެއްވުމުން ވޯޓަކާއި ނުލަ އެވެ.
މިހާތަނަށް ރިޔާސީ ކެންޑިޑޭޓުކަން އިއުލާނު ކުރައްވާފައިވާ މީހުންގެ ތެރެއިން އެއްވެސް މީހަކު ރަސްމީކޮށް ރަނިން މޭޓަކު އިއުލާނުކޮށްފައި ނުވެ އެވެ.
މިއީ، ރައީސް މުހައްމަދު ވަހީދާއި އަބްދުﷲ ޔާމީންގެ ވެރިކަމުގައި ޑިފެންސް މިނިސްޓަރުކަން ކުރެއްވި ނާޒިމް، ރިޔާސީ އިންތިހާބެއްގައި ވާދަކުރައްވާ ފުރަތަމަ ފަހަރެވެ.
ސިފައިންނާއި ފުުލުހުން ހިންގި މިއުޓިނީއެއްގެ ތެރެއިން 2011 ގައި އެއިރުގެ ރައީސް މުހައްމަދު ނަޝީދު އިސްތިއުފާ ދެއްވި ދުވަހު ހިނގައިދިޔަ ކަންތައްގަނޑުގައި، ކުރިން ސިފައިންގެ ކާނަލެއްގެ މަގާމުގައި ހުންނެވި ނާޒިމް ބޮޑު ދައުރެއް އަދާކުރެއްވި އެވެ. އޭގެ ފަހުން، އޭނާ ވަޑައިގަތީ އަލަށް އުފެދުނު ސަރުކާރުގެ ޑިފެންސް މިނިސްޓަރުގެ މަގާމަށެވެ.
ޑިމޮކްރެޓްސް އުފެއްދެވުމުގައި އިސްކޮށް އުޅުއްވާ ކުރީގެ ރައީސް މުހައްމަދު ނަޝީދާއި ޖޭޕީގެ ލީޑަރު ގާސިމް އިބްރާހިމާއެކު ބޭއްވި ބައްދަލުވުމަކަށް ފަހު ނާޒިމް ވަނީ ޕީޕީއެމް ރުހޭ ނަމަ، އިދިކޮޅު ހުރިހާ ސިޔާސީ ޕާޓީއަކުން އެއް ކެންޑިޑޭޓަކު ނެރުމަށް މީގެ ކުރިން ހުށަހެޅުއްވި އެވެ. އެކަމަކު، ނާޒިމް ވެސް ހިމެނޭހެން މިހާރު އިދިކޮޅު ހުރިހާ ޕާޓީއެއްގެ ވެސް ވިސްނުން ހުރީ ފުރަތަމަ ބުރުގައި ވަކިން ވަކިކުރާށެވެ.
މިހާތަނަށް އެއްވެސް ކެންޑިޑޭޓަކު ރަނިން މޭޓަކު އިއުލާނުކުރައްވާފައި ނުވާއިރު، ރައީސް އިބްރާހިމް މުހައްމަދު ސޯލިހު އިއްޔެ ވިދާޅުވެފައި ވަނީ ކުރިއަށް އޮތް ދެ ދުވަހުގެ ތެރޭގައި އެކަމުގައި ގޮތެއް ނިންމަވައި، ހާމަކުރައްވާނެ ކަމަށެވެ.
ޖުމްހޫރީ ޕާޓީގެ ކެންޑިޑޭޓު ގާސިމް އިބްރާހިމްގެ ރަނިން މޭޓު ވެސް ތިން ދުވަހުގެ ތެރޭގައި ކަނޑައަޅާނެ ކަމަށް އެ ޕާޓީން ވަނީ ބުނެފަ އެވެ.
ޑިމޮކްރެޓްސްގެ ކެންޑިޑޭޓު އިލްޔާސް ލަބީބުގެ ރަނިން މޭޓަކަށް އީވާ އަބްދުﷲ ހަމަޖައްސަން އުޅޭ ކަމުގެ އަޑުތަކެއް ފެތުރިފައިވާއިރު ޕީޕީއެމް/ޕީއެންސީއަށް އަދި ރިޔާސީ ކެންޑިޑޭޓަކު ނުދެއްކެ އެވެ.
