ޕީޕީއެމްގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަނުކުރެވޭ ހާލަތުުގައި، ޕީޕީއެމާއެކު ކޯލިޝަން ހަދާފައިވާ ޕީއެންސީން ކެންޑިޑޭޓަކު ނެރުމަށް އެމަނިކުފާނު އަންގަވާފައިވާތީ އެ ޕާޓީގެ ސެނެޓް މެންބަރުން މާދަމާ ބައްދަލުވާ ގޮތަށް ހަމަޖައްސައިފި އެވެ.
"އަދަދު" ނޫހަށް އެނގިފައިވާ ގޮތުގައި ދެންމެއަކު ޕީއެންސީގެ ލީޑާޝިޕުން ސެނެޓު މެންބަރުންނަށް ވަނީ މާދަމާ ބައްދަލުވުމުގެ އެޖެންޑާ ފޮނުވައިފަ އެވެ. އެޖެންޑާގައި ވަނީ، އިންތިހާބަށް ކުރިމަތިލުމުގެ ވަގުތު ކުޑަތަންވެފައިވާތީ އަސާސީ ގަވާއިދަށް ގެންނަން ޖެހޭ ބަދަލުތައް ގެންނަން މަޝްވަރާ ކުރުމެވެ.
ޕީއެންސީގެ ސެނެޓު މެންބަރަކު މި ކަން ޔަގީންކޮށްދެއްވަމުން ވިދާޅުވީ ވިސްނުން އޮތީ ސެނެޓުން ކެންޑިޑޭޓަކު ކަނޑައެޅޭ ގޮތަށް ނޫނީ ޕީޕީއެމް/ޕީއެންސީގެ ރިޔާސީ ކެންޑިޑޭޓު ޔާމީނަށް އެ އިހުތިޔާރު ދޫކޮށްލައްވަން ފެންނަ ކަމަށް ފާސްކުރުމަށެވެ.
"ޕީޕީއެމް ޕީއެންސީގެ ރިޔާސީ ކެންޑިޑޭޓަކީ ރައީސް ޔާމީން، އެހެންކަމުން އެމަނިކުފާނު އެ ކަމުގައި ގޮތެއް ނިންމަވަން ދޫކޮށްލައްވަން ވެސް އެބަ ބޭނުންވޭ،" މެންބަރު ވިދާޅުވި އެވެ.
ޔާމީނަށް އިއްވާފައިވާ ޖަލު ހުކުމުގެ އިސްތިއުނާފު ހައި ކޯޓުގައި އޮތީ މަޑުޖެހިފަ އެވެ. އިސްތިއުނާފު އަވަސް ކުރަން ކަނޑައަޅައިދިނުމަށް އެދި ސުޕްރީމް ކޯޓަށް ދެ ފަހަރު މަތިން ދުސްތޫރީ މައްސަލައެއް ހުށަހެޅި ނަމަވެސް އެ މައްސަލަތައް ކޯޓަށް ބަލައިނުގަތެވެ.
އެންމެ ފަހުން ރަނިން މޭޓުގެ ގޮތުގައި ޔާމީންގެ ފުރަތަމަ ނައިބު އަދި މިހާރު އެމަނިކުފާނުގެ އިސް ވަކީލެއްގެ ގޮތުގައި ހުންނެވި ޑރ. މުހައްމަދު ޖަމީލު އަހުމަދު ކަނޑައެޅުއްވުމަށް ފަހު ޔާމީނާއި ޖަމީލުގެ ނަން ހިމެނޭ ކެންޑިޑެސީ ފޯމު ވަނީ އިއްޔެ ހުށަހަޅުއްވައިފަ އެވެ.
ކެންޑިޑެސީ ބަލައިނުގަތުމަށް އީސީން ނިންމުމުން، އެ މައްސަލަ ވަނީ ސުޕްރީމް ކޯޓަށް ވައްދައިފަ އެވެ. ޔާމީންގެ ވަކީލުން ހުށަހަޅާފައިވާ ގާނޫނީ ނުކުތާތަކުގެ ރައްދު ހުށަހަޅަން ސުޕްރީމް ކޯޓުން ވަނީ މާދަމާ ހަވީރު 3:00 ގެ ނިޔަލަށް ފުރުސަތު ދީފަ އެވެ.
ކެންޑިޑެސީގެ މައްސަލަ ޔާމީނާ އެއްކޮޅަށް ނުނިމިއްޖެ ހާލަތެއްގައި އަމަލުކުރާނެ ގޮތެއް ހަމަޖައްސަން ޕީއެންސީގެ ސެނެޓް މެންބަރުން މާދަމާ ބައްދަލުވާއިރު ޕީޕީއެމް/ޕީއެންސީގެ ލީޑާޝިޕްގައި ރިޔާސީ ޓިކެޓަށް ޝައުގުވެރިވާ އެކި ބޭފުޅުން އެބަ ތިއްބެވި އެވެ.
