އިދިކޮޅު ޕީޕީއެމްގެ ޓިކެޓުގައި ކޮންމެ ބޭފުޅަކު ވެރިކަމަށް ގެނަޔަސް މި ފަސް އަހަރުގެ ތެރޭގައި ގެނެވުނު ސިޔާސީ ހަމަޖެހުން ގެއްލޭނެ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕެއިނަށް ހދ. ހަނިމާދޫގައި މިރޭ ބޭއްވި ޖަލްސާގައި ރައީސް ސޯލިހު ވިދާޅުވީ ކުރީގެ ސަރުކާރުތަކުގައި އެ އަތޮޅުގައި 79 ޕްރޮޖެކްޓް ހިންގުނުއިރު އެމަނިކުފާނުގެ ވެރިކަމުގައި 235 ޕްރޮޖެކްޓް ހިނގަމުންދާ ކަމަށް އެމަނިކުފާނު ވިދާޅުވި އެވެ.
އެމަނިކުފާނު ވިދާޅުވީ މި ވަރަށް ހިދުމަތްތަކާއި ޕްރޮޖެކްޓްތައް ހިންގުނީ ސިޔާސީ ހަމަޖެހުން މި ފަސް އަހަރު ދުވަހުގެ ތެރޭގައި ގާއިމު ކުރެވިފައި އޮތުމުން ކަމަށެވެ. ފަސް އަހަރުގެ އިތުރު ދައުރެއް ބޭނުން ވަނީ އެ ގޮތުގައި ދިވެހި ގައުމު ކުރިއަށް ގެންދަން ކަމަށް ވެސް ވިދާޅުވި އެވެ.
"ޓެސްޓު ކުރެވިފައި މި އޮތީ، މި ސަރުކާރާއި ކުރީގެ ސަރުކާރު، ޕީޕީއެމުން ކޮންމެ މީހަކު ކެންޑިޑޭޓެއްގެ ގޮތުގައި ނުކުތް ނަމަވެސް ތަންފީޒުކުރާނީ ޕީޕީއެމްގެ ސިޔާސަތު، އެއްވެސް ކަމެއް އެ ދުވަހު ސަރުކާރަކަށް ނުކުރެވޭ ހިޔާލުތަފާތުވާ މީހަކު ޖަލަށް ލައިގެން ނޫނީ،" ރައީސް ވިދާޅުވި އެވެ.
ރައީސް މިމޭރުމުން ވާހަކަފުޅު ދެއްކެވި އިރު އިދިކޮޅު ޕީޕީއެމްގެ ރިޔާސީ ކެންޑިޑޭޓެއްގެ ގޮތުގައި އެ ޕާޓީން ކަނޑައަޅާފައިވާ ކުރީގެ ރައީސް އަބްދުﷲ ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެމަނިކުފާނުގެ ކެންޑިޑެސީ ފޯމު އިލެކްޝަންސް ކޮމިޝަނުން ބަލައިނުގަންނަން ނިންމުމުން، އެ މައްސަލަ ވަނީ ސުޕްރީމް ކޯޓަށް ވައްދައިފަ އެވެ.
ޔާމީނަށް ވާދަނުކުރެވޭ ހާލަތެއްގައި، ޕީޕީއެމާއެކު ކޯލިޝަން ހަދާފައިވާ ޕީއެންސީން ވަކި ކެންޑިޑޭޓަކާއި ރަނިން މޭޓެއް ނެރުމަށް އެތެރޭގައި ދަނީ މަޝްވަރާ ކުރެވެމުންނެވެ. ބެލެވޭ ގޮތުގައި އެ ނިންމުންތަކާއެކު ކުރިއަށް ދާނީ ސުޕްރީމް ކޯޓުން ޔާމީންގެ ކެންޑިޑެސީ މައްސަލަ ނިމިގެންދާ ގޮތަކުންނެވެ.
ޔާމީނުގެ ވެރިކަމުގައި ސިޔާސީ ހަމަނުޖެހުން ނެތް ކަމުގެ މިސާލެއްގެ ގޮތުގައި ރައީސް ދެއްކެވި އެއް ކަމަކީ އޭރު އިދިކޮޅުގައި ތިބި ހުރިހާ ސިޔާސީ ލީޑަރުން ޖަލަށް ލާން ހުކުމް ކުރުމުން ނުވަތަ ތަހުގީގު ބޭނުމަށް ހުކުމެއް ނެތި ބަންދުގައި ބެހެއްޓުމުންނެވެ. އަދި އޭރު މީޑިއާތައް ޖޫރިމަނާކޮށް، މަގުމަތީގައި ހިނގައިދިޔަ އެތައް މަރަކާއި ހަމަނުޖެހުމަކަށެވެ.
"މިއަދު ވެސް މި ހިނގަނީ ވެރިކަމެއް، އެއްވެސް މީހަކު ބަންދެއް ނުކުރަން، ސިޔާސީ ބޭނުމަކު، ނޫސްވެރިޔަކަށް ސުވާލުކޮށްލަން ވެސް ބަންދުގައި ބަހައްޓައިފައެއް ނޯންނާނެ، ވިސްނަވަންވީ އެހެން ބަޔަކު ވެރިކަމަށް އަތުވެއްޖެނަމަ ދެން ވާނެ ގޮތް، ފެށިފައި ހުރި ހުރިހާ މަޝްރޫއުތަކެއް ހުއްޓިގެން ދާނެ،" ސިޔާސީ ހަމަޖެހުން ގާއިމްކުރި ކަމަށް ވިދާޅުވެ، ރައީސް ސޯލިހު ވިދާޅުވި އެވެ.
ދެން އަންނަ ދައުރުގައި އެމަނިކުފާނު ކުރައްވާނެ ބައެއް ކަންތައްތައް ވެސް ރައީސް މިރޭ ވިދާޅުވި އެވެ. އެ ގޮތުން ހަނިމާދޫގެ ހުރިހާ މަގެއްގައި ތާރު އެޅުމުގެ މަސައްކަތާއި، އެކި ކުޅިވަރުތަކުގެ ބިނާތައް ހިމެނޭ ސްޕޯޓްސް ކޮމްޕްލެކްސްއާއި، ސިޑިބަރިއާއި ޗޭންޖު ރޫމު ވެސް ހިމެނޭހެން ޒަމާނީ ފެންވަރުގެ ފުޓުބޯޅަ ދަނޑާއި، ހަނިމާދޫގައި 100 ހައުސިން ޔުނިޓު ގާއިމް ކުރުން ހިމެނެ އެވެ.
