އަންނަ ސެޕްޓެމްބަރުމަހު ރާއްޖޭގައި ބާއްވާ ރިޔާސީ އިންތިހާބުގައި ޖުމްހޫރީ ޕާޓީގެ ފަރާތުން ވާދަކުރައްވަން އެޕާޓީގެ ލީޑަރު ގާސިމް އިބްރާހީމަށް ޓިކެޓް ދީފައި އޮތް ނަމަވެސް، އެ އިންތިހާބުގައި އެމްޑީޕީގެ ކެންޑިޑޭޓް، ރައީސް އިބްރާހީމް މުހައްމަދު ސޯލިހަށް ތާއީދުކުރުމާ މެދު އެޕާޓީގެ ކައުންސިލްގައި މިއަދު އަލުން މަޝްވަރާކޮށްފި އެވެ.
ޖުމްހޫރީ ޕާޓީގެ ތަރުޖަމާނު އަލީ ސޯލިހު "އަދަދު" އަށް ވިދާޅުވި ގޮތުގައި ރައީސް ސޯލިހަށް ތާއީދުކުރުމާ މެދު ޖޭޕީ ކައުންސިލުން ލަފައެއް ދޭން އެދިވަޑައިގެންނެވީ ގާސިމެވެ. ޖޭޕީގެ ކައުންސިލުން މިއަދު ބޭއްވި ބައްދަލުވުމަށް އެކަން ހުށަހެޅުމުން، އެކައުންސިލުން ނިންމީ ރައީސަށް ތާއީދުކުރަން ނުފެންނަ ކަމަށެވެ. އެގޮތަށް ފާސްކުރީ އަލީ ވިދާޅުވި ގޮތުގައި ކައުންސިލްގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
ޖޭޕީން މިއަދު ބޭއްވި ކައުންސިލް ބައްދަލުވުމުގައި މެމްބަރުން ބައިވެރިވަނީ. ފޮޓޯ:އަބްދުﷲ އިޔާން
ރިޔާސީ އިންތިހާބުގައި ޖޭޕީ ވަކިން ވާދަކުރަން ނިންމީ އެޕާޓީން މިދިޔަ ފެބްރުއަރީ މަހު ބޭއްވި ކޮންގްރެސްގަ އެވެ. ކޮންގްރެސް އަށް ހުށަހެޅި ގަރާރަކުން އެގޮތަށް ނިންމުމުން އެޕާޓީގެ ކައުންސިލުގައި އެ ގަރާރާ މެދުގައި ވެސް މަޝްވަރާކޮށް ގޮތް ނިންމި އެވެ. ކައުންސިލުން އޭރު ވެސް ނިންމީ ގަރާރުގައި އޮތް ގޮތަށް ޖޭޕީ ވަކިން ވާދަކުރާށެވެ.
އެ ނިންމުމާ އެއްގޮތަށް ޖޭޕީން ނެރޭނެ ކެންޑިޑޭޓަކު ކަނޑައަޅަން ޕްރައިމަރީ އަކަށް ވެސް ހުޅުވައިލި އެވެ. ގާސިމަށް ރިޔާސީ ޓިކެޓް ލިބިވަޑައިގެންނެވީ ޕްރައިމަރީގައި ވާދަކުރައްވާނެ އެހެން ބޭފުޅަކު ނެތުމުންނެވެ.
އެހެން ނަމަވެސް ގާސިމް ކުރިމަތިނުލައްވައި ރައީސަށް ތާއީދުކުރައްވައިފާނެ ކަމުގެ އަޑުތައް މިފަހުން ވެސް އެރި އެވެ. އެ ވާހަކަތައް ފެތުރުނީ ޖޭޕީން ރިޔާސީ އިންތިހާބަށް އެހާ ފުޅާ ދާއިރާއެއްގައި ކެމްޕޭން ނުކުރާތީ އެކަމާ ގުޅުވައިގެންނެވެ. ގާސިމް މީގެ ކުރިން ވަނީ މީގެ ދުވަސްކޮޅެއް ކުރިން އާއްމު ކުރެއްވި ވީޑިއޯ މެސެޖެއްގައި އެވާހަކަ ތަކަށް ރައްދު ދެއްވައިފަ އެވެ.
""އެކަމާއި ބާރަށް ނޫޅެވިފައި މިތިބެނީ ޔަގީންކަން ނެތީމާއެއް ނޫން. ޔަގީންކަން އެބައޮތް. އެހެންނަމަވެސް، އަދި ކަންތައްތައް ހުރިގޮތުން މިހާރު މަޑުކޮށްލައިގެން މިހުރީ އަޅުގަނޑުގެ އަމިއްލަ ނަފްސުން އެކަން ނުކުރިއަސް އަޅުގަނޑުގެ ޕާޓީން އެކަން ކުރަމުން އެބަގެންދޭ،" ގާސިމް އޭރު ވިދާޅުވި އެވެ.
